:YDKnewsرۆژی یه‌كیشه‌ممه‌ ڕێكه‌وتی 11/7/2010 وه‌فدێكی باڵای یه‌كێتیی دیموكراتی كوردستان كه‌ پێكهاتبوون له‌ به‌ڕێزان مامۆستا عوسمان جه‌عفه‌ری و كاك محه‌مه‌د خۆشچێهره‌ و كاك مۆحسێن باوه‌جانی، سه‌ردانی مه‌كته‌بی په‌یوه‌ندییه‌ كوردستانییه‌كانی یه‌كێتی نیشتیمانیی كوردستانیان كرد و، له‌ لایه‌ن به‌ڕێزان كاك مه‌حموود حاجی ساڵح (لێپرسراوی مه‌كته‌ب) و كاك ڕێباز و كاك مه‌حموود پێشوازی لێكران و به‌گه‌رمی به‌خێرهاتن كران.
مامۆستا عوسمان جه‌عفه‌ری پیرۆزبایی یه‌كێتیی دیموكراتی كوردستانی به‌ بۆنه‌ی به‌ڕێوه‌چوونی كۆنگره‌ی سه‌ركه‌وتووانه‌ یه‌كێتی نیشتمانیی كوردستان و ئه‌نجامه‌ پوزیتیڤه‌كانی ئاراسته‌ی به‌ڕێزانی یه‌كێتی نیشتمانیی كوردستان كرد و بڕینی ئه‌و قۆناغه‌ی وه‌كوو قۆناغێكی گرنگ و مێژووی بۆ یه‌كێتی نیشتیمانی وه‌سف كرد.
له‌م په‌یوه‌ندییه‌ دۆستانه‌یه‌دا، زیاتر جه‌خت له‌سه‌ر په‌یوه‌ندییه‌ كوردستانییه‌كان  و پته‌وتر كردنی ئه‌م په‌یوه‌ندییانه‌ كرد و چه‌ند مه‌سه‌له‌ی گرینگ تاوتوێ كرا. له‌وانه‌ دۆخی هه‌نووكه‌یی هه‌رێمی كوردستان و بارناسكی ئێراق و ئه‌وه‌ی كه‌ هۆكاره‌كان و كۆسپه‌كانی دروست نه‌بوونی حوكوومه‌تی نوێی ئێراق چین. سه‌رباری ئه‌وه‌ش مه‌سه‌له‌ی ئێران و ئابلۆقه‌ نوێكانی كۆمه‌ڵگه‌ی نێونه‌ته‌وه‌یی و كاریگه‌رییه‌كانی ئه‌و له‌سه‌ر ئێران و ده‌سه‌ڵاتی سیاسی و كۆمه‌ڵگه‌ی ئێران تاوتوێكرا.
شایه‌نی باسه‌ كۆبوونه‌وه‌ له‌ كه‌شوهه‌وایه‌كی دۆستانه‌دا به‌ڕێوه‌چوو و له‌ كۆتاییدا وه‌فدی یه‌كێتیی دیموكراتی كوردستان به‌گه‌رمی به‌ڕێ كران.