ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
چاند هۆنه‌ر
سێوێکی سوور، هه‌ناره‌که‌ی خه‌وی دوێنێ (چیرۆک)
كۆردۆ موده‌بێر
19 / 11 / 2009

 ده‌م و به‌یانی یه‌كێك له‌ هاوینه‌كانی چند ساڵ له‌مه‌و به‌ر كه‌ تازه‌ تیرێژه‌كان بیلبیله‌ی چاویان ئازار ئه‌دا، به‌و سیله‌وه‌ هه‌ستا له‌ خه‌و، هه‌ستی ئه‌كرد كه‌مێك چاوی باش نابینێ و ته‌ماوییه‌. (هێشتا رق و قینی ئاژاوه‌كه‌ی شه‌وی له‌ بیربوو، هه‌ڵبه‌ت په‌شیمانیش بوو چوون هاوڕێیه‌كی گیانی به‌گیانی بوو و مخابن رۆژێك.... نه‌یگێڕینه‌وه‌ باشتره‌)
حه‌زی ده‌كرد زۆرتر راكێشێ به‌ڵام نه‌ك به‌ جۆرێ كه‌ خه‌وی لێكه‌وێته‌وه‌ له‌ لایه‌كی تره‌وه‌ پێشی ناخۆش بوو، ئیتر جێ ی كۆكرده‌وه‌ و ماندو و بێ هێز به‌ یارمه‌تی پشتییه‌كان هه‌ستا وده‌ست و ده‌مچاوی شوشت, بی راوه‌ستان جله‌كانی له‌به‌ر كرد و ویستی بێ ئه‌وه‌ی سوبحانه‌یه‌ك بخوات بچێته‌ ده‌ره‌وه‌.
هێشتا له‌به‌ر ده‌ركه‌كه‌ بوو
- دایكه‌ ئیشێكت نییه‌ من ده‌ڕۆمه‌ دره‌ره‌وه‌، زۆر ناخایه‌نێ دێمه‌وه‌.
-" كۆردۆ" گیان بۆ كوێ ئه‌ڕۆی، ده‌ستێك به‌ قژه‌ جوانه‌كانتا بهێنه‌ رۆڵه‌گیان، نۆره‌ی ئه‌وه‌م نیه‌ هاوسێكان بێن و بڵێن كۆڕه‌كه‌تان شپرزه‌یه‌ و فڵان و فیسار, ده‌یگێڕنه‌وه‌ بۆ باوكت ، باوكت قسه‌ ئه‌م خه‌ڵكه‌ نه‌بێ قسه‌ی كه‌س ناخوێنێته‌وه‌.
- دایه‌ گیان ، خۆت ده‌زانی قسه‌ی كه‌س ئه‌ویش هاوسێی به‌ساڵا چوو كه‌ ته‌مه‌نێك به‌ینمانه‌ لام هیچ نرخ و قیمه‌تێكی نییه‌، بێ ڕێزییان پێ ناكه‌م، دواییش دایه‌گیان ئه‌وه‌ جارێك بوو و باوكم كه‌وته‌ هه‌ڵه‌وه‌ و قسه‌ی ئه‌م خه‌ڵكه‌ی گوێدا ئێستا قسه‌ی وا لای نامۆی نامۆیه‌، پاشان شپرزه‌م بۆ خۆم شپرزه‌م چی زه‌ره‌ر و قازانجێكی بۆ ئه‌م و ئه‌و هه‌یه‌، وا بزانم ئه‌م خه‌ڵكی كۆڵانمانه‌ ئیشێكیان نه‌بێ جگه‌ له‌ قسه‌ وباسی كه‌سانێكی وه‌ك من؟! باشه‌ دایه‌ به‌سه‌ر چاوم.
خێرا سه‌ری شوشت و شانه‌ی كرد, خواحافیزی و رۆیشته‌ ده‌ر.
( كۆردۆ زۆرتری كاته‌كان كه‌ بێ تاقه‌ت ده‌بوو له‌ باخچه‌یه‌كی ته‌نیشت ماڵیانه‌وه‌ ده‌بوو و ئه‌م به‌ربه‌یانه‌ش به‌ره‌و ئه‌وه‌ی به‌ڕێ كه‌وت) هێواش هێواش هه‌نگاوی هه‌ڵده‌گرت و دڕۆیشت, بێ  ئه‌وه‌ی كه‌ زۆر ئاگای له‌ ده‌وربه‌ر بێ، هێشتا ره‌نگی ده‌ركه‌ی لا ون نه‌ببوو، جار جار وه‌رده‌گێڕا و و ته‌ماشایه‌كی ناو كۆڵانه‌كه‌یانی ده‌كرد, دوو منداڵی تیدا بوو, له‌به‌ر خۆیانه‌وه‌ شیعریان ده‌خوێنده‌وه‌ و ره‌شماری رێگه‌ قیره‌كه‌یان ده‌بڕی. ئه‌م جاره‌یان رێ ی خۆی گرته‌ به‌ر و چاوی له‌ به‌رپێی خۆی ده‌كرد، هه‌ناسه‌یه‌كی به‌ كوڵی هه‌ڵكێشا،  ئه‌مجار چاوی گێڕایه‌ ده‌ور و به‌ریا, هه‌ر سی میتر ئه‌ولاتری كتێبێك سه‌رنجی راكیشا لاپه‌ڕه‌كانی پاش یارییه‌كی زۆر له‌گه‌ڵ با له‌ باڵه‌ باڵ  كه‌وتبوون، چه‌ند چركه‌یه‌ك ئه‌بله‌قی كرد, دوودڵ بوو نه‌یه‌ویست به‌ره‌ پیریه‌وه‌ بچێت,(كۆردۆ زۆر جار قاقه‌ز و گۆڤاره‌كان كه‌ له‌ناو كۆڵان و شه‌قامه‌كان كه‌وتبوون هه‌ڵێده‌گرتن و ده‌یخوێنده‌وه‌ , ئه‌و بڕوای وا بوو كه‌ هه‌ر شتێكی تازه‌ یا وشه‌یه‌كی نوێ كه‌ ئه‌و هێشتا نایزانێ تێدا ده‌بینێته‌وه‌) بڕیاری كۆتایی دا و لێی نیزیك بووه‌ , كتێبێك بوو نوێ نه‌بوو، كۆنه‌ش نه‌بوو, جڵده‌كه‌شی به‌ وێنه‌یه‌كی سروشتخه‌مڵا بۆوه‌, له‌ سروشتی كوردستان ده‌چوو, زۆر سووك دانه‌وه‌وییه‌وه‌ و هه‌ڵیگرت. هه‌ر وه‌ك جاران به‌ بایخه‌وه‌ چاوێكی پیاخشاندو هه‌ر به‌ده‌م رێگاوه‌ لاپه‌ڕه‌كانی یه‌ك له‌دوای یه‌ك ده‌خوێنده‌وه‌. لاپه‌ڕه‌ی 27 بوو لاپه‌ڕه‌كه‌ ئه‌ستوور و ماندوو بوو، له‌ته‌ك لاپه‌ڕه‌ی دواتری خۆی دا  نووسا بوو, وێده‌چوو شتێكی تێدا بێ, پێش له‌وه‌ی بڕیار بدا قاقه‌زه‌كه‌ بدڕێنێ. رۆیشته‌ لاپه‌ڕه‌ی یه‌كه‌م سه‌یری كرد ناوی كه‌سی له‌سه‌ر نه‌بوو. سه‌ر جڵده‌كه‌ی سه‌رنج دا شتێكی لێنه‌نووسرا بوو. كتێبه‌كه‌ی ئه‌م دیو ئه‌و دیو كرد.
هه‌ی هه‌ی وێده‌چێ كه‌س ساحێبی ئه‌م كتێبه‌ نییه‌. خوا دایناوه‌ بۆ من، ناشی شتێكی لێ فێَر نه‌بین.
به‌ره‌و باخچه‌كه‌ به‌رده‌وام بوو، رۆیشت و له‌ شوێنی هه‌میشه‌یییه‌وه‌ به‌ڵام ئه‌مجار دڵی چیمه‌نه‌كه‌ی دڕی و له‌وێوه‌ ڕا گه‌یشته‌ ژوانی جاران، له‌سه‌ر چیمه‌نه‌كه‌ خۆی به‌ زه‌وییا كوتا و ئه‌و جار كتێبی كرده‌وه‌ و قاقه‌زی دڕاند, له‌ روخساری دا دیار بوو به‌له‌زه‌ و تامه‌زۆریه‌تی له‌ چاو تروكانێكدا ئاخروئۆخری ناوه‌رۆكی قاقه‌زه‌كه‌ی ده‌سبكه‌وێ. كه‌ لاپه‌ڕه‌كانی دڕاند دوو قاقه‌زی تیا دیت، یه‌كیان شین و دوو لۆ و ئه‌ویتر كه‌ زۆر زه‌ختی نووسینی پێوه‌ دیار بوو ره‌نگی سپی و چوار لۆ كرا بوو.
ره‌نگی شینی زۆر خۆشده‌ویست له‌به‌ر ئه‌وه‌ش بۆ یه‌كه‌م جار قاقه‌زه‌ شینه‌كه‌ی كرده‌وه‌، په‌له‌شی نه‌بوو، نه‌یه‌وه‌یست خێرا به‌سه‌ریا تێپه‌ڕێ, قاقه‌زه‌كه‌ شیعرێكی تیا نووسرا بوو:
له‌ بیرم بێ
یه‌كه‌م كۆڵانی ئاشنایی پرسیارێك بوو
له‌ بیرت بێ
راوه‌ستام و
بزه‌یه‌ك و
چه‌ند هه‌نگاوی كوێرانه‌ و
بزر بووم لێت!
جارێكی تر
پێك گه‌یشتین
رۆحی ون بووم ئه‌م جاره‌یان هه‌ڵكورما بووی،
هات و چوت بوو
جاری ون و جار جارێكیش په‌یدا ده‌بووی,
ئه‌و كات وتم:
كه‌ تۆ ون بی
ده‌زانی چی
له‌ ون بوونت منیش ونم,
دڵبه‌سته‌ نیم
دڵم به‌سته‌ی دڵی به‌سته‌ی دڵ به‌سته‌ته‌.
وه‌ڵامت دا:
كه‌ تۆش ون بی
دڵی به‌سته‌م
ده‌بێ به‌و ئاگرپژێنێ
چه‌شنی مێروله‌دانێك بێ
هه‌ر له‌ باتی خه‌می گڕكان
خه‌می دوری داته‌كه‌ێنێ.
له‌ كۆتایی دا نووسرا بوو پێشكه‌ش به‌ خۆشه‌ویستم " هه‌ناره‌كه‌ی خه‌وی دوێنی", به‌رواری 2 ی به‌فرانباری 2704 ی كوردی. ئیمزا " مه‌نسور".
- باوكم نه‌با چم كردبا خۆ ئه‌م كوردییه‌شم نه‌ده‌زانی كه‌ ئێستا رێم لێكه‌وتوه‌.
(چون كوردییه‌كه‌ی ناته‌واو بوو ده‌ست وپێ شكاولێ ی تێگه‌یشت)
قاقه‌زه‌ شینه‌كه‌ی نایه‌ لاوه‌ و خستیه‌ ژێر كتێبه‌كه‌وه‌. نۆره‌ش با نۆره‌ی سه‌رنج دان بۆقاقه‌زه‌ سپییه‌كه‌ بوو، به‌ ره‌واڵه‌ت له‌ نامه‌ ده‌چوو، ئه‌ویش ره‌نگه‌ نامه‌یه‌كی عاشقانه‌. كێ ده‌زانی، ره‌نگه‌ شتێكی تریش بێ.
قاقه‌زی هێنایه‌ پێش چاوی.
نامه‌یه‌ی ئاشقێك بوو بۆ مه‌عشوقه‌ی به‌ زمانی كوردی، وێڕای هه‌ست و سۆزی دڵداری چه‌ند شتێكی دیكه‌ كه‌ به‌ هێلی سوور دیاریكرا بوو تێیدا به‌دی ده‌كرا. هێڵه‌ سووره‌كان سه‌رنجی راكێشا.
به‌لی وا بوو ده‌بوایه‌ سه‌رنج راكێشیش با و به‌ هیلی سوورر دیاری كرد با, نامه‌كه‌ باس له‌ خۆشه‌ویستی و دڵداری بوو, هه‌ر شوێنێك كه‌ وشه‌یه‌كی قورسی تێدا بوو، دیاری كرد بوو و له‌سه‌ری شرۆڤه‌ی كرا بوو تا روونتر مانای بزانێ, هێله‌ سووره‌كانیش به‌ چوارده‌وری ئه‌و شرۆڤه‌گه‌له‌ دا كێشرا بوو , وه‌ك به‌ تاڵێ له‌ زۆلفی دڵدار چه‌ند وشه‌ی له‌سه‌ر زار ده‌رپه‌ڕیو و ئه‌فسوناوی قه‌تیس بكه‌ی.
زۆر به‌ ئارامی و له‌سه‌رخۆ خوێندییه‌وه‌ له‌سه‌ر بڕێك وشه‌ رائه‌وه‌ستا، ئه‌ینواڕییه‌ ناو چیمه‌نه‌كه‌ و ئه‌بله‌ق ئه‌بوو، حه‌زی ئه‌كرد باش باش لێی تێبگا و بزانێ بۆ كێ یه‌ و له‌ كێوه‌یه‌ و بۆ كێیه‌، تا كۆتایی رۆیشت ، هه‌ستی ده‌كرد لێ حاڵی بووه‌ ، له‌ دێڕه‌كان  و وشه‌كان قووڵ ده‌بۆوه‌.
هه‌ر له‌ سه‌ر چیمه‌نه‌كان هه‌ڵاژیا، بوو به‌ ساعه‌تێك، دوو ساعه‌ت، جوڵه‌ی نه‌ده‌كرد، بیری له‌ رووداوه‌كه‌ی دوێ شه‌و ده‌كرده‌وه‌، چه‌نده‌ ده‌هات وده‌ڕۆیشت خۆی به‌ تاوان بار نه‌ده‌زانی، چاوی ده‌به‌ست و رووداوه‌كه‌ی ده‌هێنایه‌ پێش چاوی، ورد ده‌بۆوه‌ و گوێ له‌ شه‌ڕه‌قسه‌كان ده‌گرت، له‌ پڕێكا
هه‌ر نه‌زانی چۆن چۆنی بوو ئه‌و شه‌ڕ و ئاژاوه‌یه‌؟ په‌شیمانم، زۆر زۆر په‌شیمانم.
 ئیتر خامۆش بوو، چه‌ند چركه‌یه‌ك بێ ده‌نگی و ئه‌و جار هه‌ستایه‌ سه‌ر پێ، ویستی بگه‌ڕێته‌وه‌ بۆ ماڵ، نه‌ك ئه‌وه‌نده‌ به‌ په‌له‌ به‌ڵكو وه‌ك چۆن رێگه‌ ماڵی تا باخچه‌كه‌ بڕی بوو، كتێبی له‌ سه‌ر چیمه‌نه‌كان هه‌ڵبڕی، له‌ شوێن خۆی دا راوه‌ستا و سه‌رنجێكی ده‌وروبه‌ری دا، هه‌نگاوێ، دوو هه‌نگاو(كه‌وته‌ یادی به‌ڵێنی دا بوو به‌ دایكی كه‌ زۆر نه‌خایه‌نێ و بگه‌ڕێته‌وه‌)، هه‌نگاوه‌كانی خێرا كرد، هێشتا ساعه‌ت 9:30 بوو، چیمه‌نه‌كان پاش چه‌ند چركه‌" كۆردۆ" یان لێ ئاوا بوو. وێده‌چوو هه‌ناسه‌كان، بیركردنه‌وه‌كان له‌ ناو باخچه‌كه‌ هێشتا ماون، له‌ چیمه‌نه‌كان ئاڵاون و بارێ قورسن و پشتی چیمه‌نه‌كانیان كوڕ كرد بوو، یا له‌ خه‌فه‌تی نامه‌كه‌دا ره‌نگه‌ هۆنراوه‌كه‌ش بووبێ به‌ڵام هه‌رچی بوو چیمه‌نه‌كان سه‌ریان كردبووه‌ ناویه‌كا و موڵیان دابوو.
"هه‌ناره‌كه‌ی خه‌وێ دوێنی"، هه‌ناره‌كه‌ی خه‌وی دوێنی" ئه‌مه‌ سێ وشه‌ بوون كه‌ له‌ كۆتایی هۆراوه‌كه‌دا نووسرا بوون و كۆردۆش به‌ مێلۆدییه‌كه‌ له‌به‌ر خۆی ده‌یگوته‌وه‌. زۆر پێ جوان بوو، له‌ خۆی ده‌پرسی:
تو بڵی كێ بێ، زۆر پێم خوشه‌ كه‌ بزانم هه‌ناره‌كه‌ی خه‌وێ دوێنی كێه‌ و له‌ كوێیه‌؟
خێرا خێرا هه‌نگاوی ده‌نا و په‌له‌ی بوو( زۆر جار دایكی ئیشی ناو بازاڕی هه‌بوو، ده‌بوایه‌ له‌گه‌ڵ دایكی بڕۆیشتبا)
هه‌ستی ده‌كرد سنگی ده‌ئێشێ، راوه‌ستا هێڵنجی و پاشان ته‌ماشایه‌كی ئاسمانی كرد، په‌ڵه‌ هه‌ورێكی سپی ورده‌ ورده‌ ده‌ڕۆی تیرێژه‌كانی هه‌تاو بدزێ و له‌ سه‌ر سه‌ری له‌نگه‌ری گرت، راست له‌ سه‌ر كۆڵانه‌كه‌ دا راوه‌ستا بوو، كه‌ به‌ خۆیا هاته‌وه‌ و ملێ رێ گرته‌به‌ر،چه‌ند میترێك ئه‌و لاتر  ده‌نگێ به‌ گوێدا درا،
براكه‌م، كاكه‌ ببوره‌
( ده‌نگێكی ناسك ، گه‌رم و هه‌تا بڵێ ی به‌ میهر، به‌ره‌و ده‌نگ وه‌رچه‌رخا، كچێكی خوێن شیرینی و باڵابه‌رزی رۆح سووك بوو له‌وانه‌یه‌ 22 و3 ساڵێكی ته‌مه‌نی با، یه‌كه‌م جار بوو ده‌یبینی، له‌وانه‌یه‌ خه‌ڵكی ئه‌و ده‌ڤه‌ڕه‌ نه‌بێ، هه‌ر كه‌سێك بوو, له‌ هه‌ر كوێ بوو دیاره‌ سه‌رنجی كۆردۆی پێكا.)
به‌ڵێ به‌ڵێ، له‌گه‌ڵ منتانه‌؟
به‌ڵێ براكه‌م ، سه‌ره‌تا سڵاو
سه‌رچاو
ئایا خه‌ڵكی ئه‌م ناوه‌وه‌ن
به‌ڵێ، هه‌ر دوو ماڵ خواره‌وه‌ی به‌ڕێزتان ماڵه‌وه‌مانه‌
زۆر باشه‌، راستی ئه‌وه‌یه‌ پرسیارێكم هه‌بوو، وتم ره‌نگه‌ بتوانن یارمه‌تیم بده‌ن
له‌ خزمه‌ت دام،چی له‌ توانام دا هه‌بێ درێغی ناكه‌م
رێزتان هه‌یه‌، ئه‌وه‌ی راستی بێ دوێنێ ده‌مه‌و ئێواره‌ كه‌ له‌گه‌ڵ باوك و دایكم لێره‌وه‌ راده‌بوردین كتێبێكم له‌م رێیه‌ دا گوم كرد,  له‌ ماڵه‌وه‌مان تا ئێره‌ به‌ شوێنیه‌وه‌ بووم له‌ خاوه‌ن دوكان و ژن و مێرد و ئه‌وه‌ی پێ ی گه‌یشتووم پرسم كردوه‌و، كه‌س نه‌یدیوه‌وه‌ و ئاگاشی لێ نییه‌, زۆر ده‌ترسم مندالێك یا كه‌سێك كه‌ عه‌قڵی پێ ی نه‌شكا بێ شتێكی لێكرد بێ، به‌ڕێزتان نه‌تان دیوه‌ یا ئاگاتان لێ ی نییه‌.
كتێب، وا بزانم ده‌زانم له‌ كوێیه‌، جا ئه‌گه‌ر كتێبه‌كه‌ی ئێوه‌ بێ كه‌ زۆر چاكه‌.
(خوایا زۆر سپاس بۆ تۆ) براكه‌م ده‌توانی زۆرتر رێنوێنیم بكه‌ی، له‌ كوێیه‌.
(كۆردۆ ده‌ستی هێنایه‌ پێشه‌وه‌ و كتێبه‌كه‌ی پیشاندا)
ئه‌مه‌یه‌ نا؟
به‌ڵی خۆیه‌تی
(زۆر خوشحال بوو، فرمێسكی شادی له‌ ناو چاوانی دا شه‌پۆلی ده‌دا، دیار بوو ماندوو بوونێكی زۆری بۆ دۆزینه‌وه‌ی چه‌شتوه‌، كۆردۆش ئێستا ده‌یزانی " هه‌ناره‌كه‌ی خه‌وی دوێنێ" كێیه‌، و له‌ لایه‌كی دیكه‌شه‌وه‌ نه‌یده‌زانی چۆن وه‌ڵامی بداته‌وه‌, ئاخۆ لاپه‌ڕه‌ی كتێبه‌كه‌ی كرد بۆوه‌ و نامه‌كانی دی بوو، له‌ به‌ر ئه‌وه‌ نه‌یده‌زانی چۆن وه‌ڵامی بداته‌وه‌، له‌ رووی هه‌ڵنه‌ده‌هات چی بڵێ و چی پاساوێكی بۆ ببینێته‌وه‌)
ده‌ستی بۆ راكێشا و ویستی كتێبه‌كه‌ وه‌رگرێ
ببوره‌ خاتوو پێش ئه‌وه‌ی كتێبه‌كه‌ وه‌رگرن ، با شتێك بڵێم، هیوادارم لێم ببورن.
فه‌رموو براكه‌م، گوێبیستم
چۆن پێتان بڵێم(كه‌مێك سه‌ری نه‌وانده‌وه‌) ، كه‌ كتێبه‌كه‌م دۆزییه‌وه‌ زۆر سه‌رنجی ده‌وروبه‌رم دا كه‌سم پێ شك نه‌برد خاوه‌نی ئه‌م كتێبه‌ بێ، كتێبه‌كه‌ش به‌جۆری كه‌وتبوو، وای بۆ رۆیشتم كه‌ ره‌نگه‌ هی كه‌سێكه‌و به‌كه‌ڵك نه‌هاتوه‌ و بۆ یاری و شتی وا به‌ ده‌ست منداڵێكی داوه‌, منیش ئه‌و هه‌ڵه‌یه‌م كرد و به‌ ئیزنی خۆم دوو قاقه‌زی تیا بوو كه‌  خوێندومه‌ته‌وه‌. به‌راستی لام وا نه‌بووكه‌سێك ئاوه‌ها به‌شیوێن ئه‌م كتێبه‌وه‌ بێ،تا كاتێ كه‌ نامه‌كانم خوێنده‌وه‌. هیوادارم بمبورن.
شتێكی زۆر گرنگ نین،رێزتان هه‌یه‌ براكه‌م، گرنگ ئه‌وه‌یه‌ كه‌ من كتێبه‌كه‌ و نامه‌كانم دۆزییه‌وه‌ ، له‌به‌ر ئه‌وه‌ش من سپاس ئێوه‌ ده‌كه‌م.
كتێبی وه‌رگرت و جارێكی دیكه‌ سپاسی كۆردۆی كرد و هه‌نگاوی هه‌ڵگرت. كۆردۆش وه‌ك بڵێ خۆشه‌ویستێك به‌جێ ی دێڵێ وابوو. نه‌یتونی پێشی خۆی بگرێت و لای وابوو ده‌بێ زۆرتر له‌گه‌ڵ بدوێ، خێرا وه‌رچه‌رخا، چه‌ند هه‌نگاوێك له‌یه‌ك دوور بوون، ده‌نگی لێ داكه‌وت:
ببوره‌ خاتوو
فه‌رموو به‌ڕێزم، له‌ خزمه‌تدام
ببوره‌ خاتوو، پرسیارێكم هه‌یه‌، هه‌ڵبه‌ته‌ ده‌زانم كه‌ بیڵێم, ده‌ڵێن چه‌نده‌ پۆڕووه‌،
فه‌رموون، توانیم وه‌ڵامتان ده‌ده‌مه‌وه‌، ئیتر....
ئایا " هه‌ناره‌كه‌ی خه‌وێ دوێنی" ئێوه‌.
پێتان خۆشه‌ كه‌ بزانن كێیه‌.
به‌ڵێ، به‌راستی تامه‌زرۆمه‌ بزانم كێیه‌.
ئه‌گه‌ر ئێوه‌ نه‌بان من ئه‌م ئه‌مانه‌تییه‌م له‌ده‌ست چوو بوو، ئه‌گه‌رچی ناشتاناسم به‌ڵام پێتان ده‌ڵێم, نا " هه‌ناره‌كه‌ی خه‌وی دوێنێ" من نیم، خوشكمه‌، له‌من بچووكتره‌.
(كۆردۆ خامۆش بوو، ئیتر هیچ به‌ زمانیا نه‌هات)
براكه‌م شتێكی تر نه‌بێ ، من ده‌بێ بڕۆم
جارێكی تر بمبورن , ده‌توانم بزانم خۆتان چیتان ناوه‌؟
من
(پێكه‌نینێكی كرد و به‌ نه‌رمییه‌وه‌ وتی)
"سێوه‌ سووره‌ی ساڵێكی نوێ",(زه‌رده‌خه‌نه‌یه‌كی تر) شوخی ئه‌كه‌م ناوم " رۆژین" ه‌، پرسێكی دیكه‌تان نییه‌؟
با، پرسیارێكی دیكه‌م هه‌یه‌، به‌ڵام چه‌نده‌ لێ ورد ده‌بمه‌وه‌ ده‌ڵێم عاجز ده‌بن و ره‌نگه‌ وه‌ڵامم نه‌ده‌نه‌ه‌و؟
نا فه‌رموون، ده‌توانن پرسێكی دیكه‌ش بكه‌ن؟
زۆر سپاس، ده‌توانم بزانم كێ ئه‌و نامه‌یه‌ی نوسیووه‌؟
به‌ڵێ، نامه‌ی كه‌سێكه‌ به‌ناوی " كۆردۆ", وا بزانم دێزه‌ و ده‌بێ بڕۆم،( بزه‌یه‌ك له‌ ژێر لێوه‌كانییه‌وه‌ روخساری پیشاندا و مرد) پرسێكی دیكه‌تان نییه‌؟
- (ئه‌میش به‌ بزه‌یه‌ك وه‌ڵامی دایه‌وه‌) نا زۆر خوشحاڵم به‌ ناسینتان , زۆر سپاس كه‌ وه‌ڵامتان دامه‌وه‌.
خواحافیس براكه‌م
خواتان له‌گه‌ڵ
(حه‌زی ئه‌كرد له‌وه‌ زۆرتر له‌گه‌ڵی بدوێ و له‌گه‌ڵی بێ، نه‌شی ده‌زانێ، خۆ نه‌ده‌كرا بڵێ خاتوو ده‌توانم چه‌ند خوله‌كێك كاتتان بگرم، ئه‌گه‌رچی ره‌نگه‌ قه‌بووڵی كردبا، به‌ڵام كۆردۆ له‌سه‌ر بۆ ئه‌وه‌ هه‌ستێ باشی نه‌بوو، وا بیر ده‌كرده‌وه‌ كه‌ ئه‌گه‌ر شتێكی وا بڵێ ره‌نگه‌ له‌ به‌رچاوی ئه‌و كچه‌ جۆرێكی تر بنوێنێ)
به‌رو ماڵ به‌رده‌وام بوو، جار جار وه‌رده‌گێڕا و ئه‌و كچه‌ی ده‌دیت، جارێ ، دوو جار، سێ جار، ماڵی جێهێشت
كۆردۆ، كۆردۆ، بۆ كوێ ئه‌ڕۆی رۆڵه‌؟
( دایكی كۆردۆ بوو، خۆی خستبووه‌ ڕی تا پێویستییه‌كانی ماڵه‌وه‌ بكڕێ و بگه‌ڕێته‌وه‌, كۆردۆ گێژ بوو گوێ له‌ ده‌نگی دایكی نه‌بوو)
- كۆردۆ كۆردۆ، رۆڵه‌ له‌ خه‌و هه‌سته‌، دێره‌ رۆڵه‌, رۆژین چه‌ند جار زه‌نگی بۆ لێدای، گوتی پێت بڵێم تا نه‌بووه‌ به‌ سێوه‌ سووره‌ی ساڵێكی نوێ , خێرا بگا پێم، ئه‌مشه‌ویش میوانی ئه‌وانین.



بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 61
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08
چاند هۆنه‌ر
ژیــــــان له‌ پێشی ڕوودا/ چیرۆك (4)
پایان یک راه
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی