ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
ووتاری کوردی
عەفرین و جیهانی تەماشاچی
**************
27 / 1 / 2018
لە ڕۆژی بییستی مانگەوە تا ئێستا، کەنتۆنی عەفرین لە ڕۆژاوای کوردستان لە ژێر هێرشی ئاسمانی و زەویی سوپای تورکیا بە هاوکاریی چەند گرووپ و لایەنی ئۆپۆزسیۆنی سووریا دایە. ئەوانەی بە ناوی ئۆپۆزسیۆنی سووریا لەم هێرشە بەشدارن، هەندێکیان  (لیواى سوڵتان موراد ـ كه‌ به‌شی هه‌ره‌ زۆرى پێكهاته‌كه‌ى توركمانن ‌و له‌ناوچه‌كانى حه‌له‌بن)ـ (فیرقه‌ى حه‌مزه‌ ـ به‌شی زۆرى توركمانن ‌و توركیا مه‌شق ‌و راهێنانى پێكردوون)ـ (فه‌یله‌قی شام ـ كه‌ له‌١٩ گروپ ‌و رێكخراوى ئیسلامیی پێكهاتوون ‌و ئیخوان موسلمینى سوریاش به‌شێكه‌ له‌و هێزه‌)ـ (بزوتنه‌وه‌ى نوره‌دین زه‌نگی ـ گروپێكى تیرۆرستى مه‌ترسیدارن‌و به‌مناڵكوژ ناسراون)ـ (بزوتنه‌وه‌ى رزگاری شام ـكه‌ پێكهاته‌ سه‌ره‌كیه‌كه‌یان ئاراسته‌ى سه‌له‌فیه‌كانى ناو كۆمه‌ڵگه‌ى سورین)ـ (لیواى هه‌ڵۆكانى چیا ـ كه‌ پێشتر به‌ره‌ى شۆڕشگێرانى سوریابوون)ـ (به‌ره‌ى شام ‌و سوپای سه‌ركه‌وتنیش دوو هێزى دیكه‌ن) کە لە لایەن دەوڵەتی ئاکپارتی بە سەرۆکایەتی ڕەجەب تەیب ئەردووغان پشتیبانی و بەهێز دەکرێن.
سەرەتای ساڵی ٢٠١١ کە شۆڕشی گەلانی سووریا دژ بە دەسەڵاتی بەعسیی بەشار ئەسەد دەستی پێکرد گەلی کوردیش ڕاپەڕی و پارتی یەکیتیی دیموکراتی واتە پەیەدە بەڕێوەبەرایەتی ناوچە کوردستانییەکانی ڕۆژئاوای کوردستانی گرتە دەستەوە و تەنانەت لە شاری حەلەبیش لە چەند گەڕەکی کوردنشینی ئەو شارەش توانی پارێزگاری لە گەڕەکە کورییەکان بکات و نەهێڵێت کە بکەوێتە دەستی گرووپە تووندڕەوەکان کە لەو کاتەیشدا تورکیا پشتیبانی لەو تووندڕەوانە دەکرد. 
لە ساڵی ٢٠١٢ وە گەلی کورد لە ڕۆژاوای کوردستان توانیوویەتی هەرێمەکانی خۆی بپارێزێت و سێ کانتۆنی تێدا ئاوا بکات و لە شەڕی دژی داعشیش توانی سەرکەوتنی گەورە تۆمار بکات و بەرخۆدانی کوبانی و خۆڕاگرتن لە بەرامبەر هێرشی دڕندانەی داعش و گەمارۆی توندی دەوڵەتی تورکیا، بوو بە داستانی سەدە و هەموو جیهانی مات و حەیران کرد، هەر ئەو خۆڕاگری و بەرخۆدان و قارەمانییەتەی کە شەرڤانانی یەپەگە و یەپەژە لە کوبانی، بوو بە هۆی ئەوەی کە سەرنجی جیهان ڕابکێشن بۆ پشتیبانی کردنیان بەرامبەر بە هێزی تیرۆریستیی داعش و لە هاوکێشە و ململانێکانی نێوان زلهێزە جیهانییەکانی نێو شەڕی سووریا توانییان هاوسەنگییەک درووست بکەن کە هاو کات بتوانن لە گەڵ ئامریکا بن و لە هەمان کاتیشدا لە گەڵ ڕووسەکان پەیوەندییان هەبێت .
بەڵام لە ئێستادا هەم هاوکێشەکە تێک چووە و هەمیس دەبینین کە سوپای فاشیستی تورکیا بە فەرمانی سەرۆکی ئاکپارتی، ڕەجەب تەیب ئەردووغان و بە هاوکاریی ئەو هێزە تووندڕەوە ئیسلامییانەی کە لە بن باڵ و پەڕی دەوڵەتی تورکیادا بوون، هێرشیان کردووەتە سەر کانتونی عەفرین. ئەو هێرش بردنە سەر کانتونی عەفرین لە کاتێکدا دێت کە هێزەکانی یەپەگە و یەپەژە و هەروەها هێزەکانی سووریای دموکراتیک، هاوپەیمانی هەم ئامریکا و هەمیش ڕووسیا بوون.
بێ دەنگی ئامریکا و خۆ کشانەوەی ڕووسیا لە عەفرین، بۆ گەلی کورد تەنیا واتای خەیانەتی ئەو زل هێزانە بەرجستە دەکاتەوە، هەر چەند مانگ پێش ئێستا، لە باشووری کوردستان، لە پێش چاوی هەموو جیهانیان، هیزی حەشدی شەعبی، هێرشی سەر کوردستانی کرد و شاری کەرکووک و مەخموور و شەنگال و دووزخۆرماتوو و خانەقینی داگیر کرد، ئەوە لە کاتێکدا بوو کە کورد لە باشوور و لە ڕۆژاوا بەرەنگاری هێزی تیرۆریستی داعش بوونەوە و دەوڵەتی ئیسلامیی داعشیان تووشی شکست و لە ناوچوون کردبوو و بە نوێنەرایەتی هەموو جیهان پێشمەرگە و شەرڤان، شەڕی دژی تیرۆریزم کردووە و بە هەزاران شەهید و برینداری لە پێناو پاراستنی ئاسایشی جیهان پێشکەش بە مرۆڤایەتی کردووە.
بێ ئەمەگی کۆمەڵگەی نێو نەتەوەیی بەرامبەر بە کورد بە گشتیی، دەرخەری ئەو ڕاستییە تاڵەن کە گەلی کوردستان بۆ خۆی پێی دەزانێت کە کورد لە جیهاندا بە تەنیایە، نە تەنیا هیچ وڵات و زلهێزێک پاڵپشتیی کورد نیە بەڵکوو تەنانەت ڕێکخراوی نەتەوە یەکگرتووەکانیش بە وشەی "نیگەرانین"  ڕای خۆی دەردەبڕێت و لە کردەوەدا هیچ هەڵوێستێکی نەنواندووە کە ببێتە پاڵپشتیی گەلی کورد و وەک نەتەوەیەکی زیندوو و نێزیک بە پەنجا ملیۆن مرۆڤی سەر ئەم گۆی زەوییە، حیسابێکی بۆ بکات. 
ئێستا عەفرین لە پێش چاوی جیهانیانەوە و لە پێش چاوی ڕێکخراوی نەتەوە یەکگرتووەکان و هەروەها لە بەردەم گۆڕەپانی زلهێزەکانی جیهان و هاوپەیمانانی دژەتیرۆر، هێرشی لە سەرە و بە هێزێکی نابەرابەر و بە بەکرێگیراویی هێزە تیرۆریستییەکان لە هەوڵی داگیرکردن و کاولکردنی ئەو دەڤەرەی کوردن کە ڕاستەوخۆ لە لایەن فاشیزمی دەوڵەتیی تورکیا بەڕێوە دەچێت، هۆکاری ئەو بێدەنگییەی جیهانیان و کۆمەڵگەی نێو نەتەوەیی و تەنانەت دەوڵەتەکانی ناوچەکەش، دەگەڕێتەوە بۆ بەرژەوەندییەکانیان کە سەودا بە خوێنی کوردەوە دەکەن و لەم سەودا سەرییەی ئەواندا کوردەکان بوونەتە قوربانی. 
  



بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 61
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08
ووتاری کوردی
هەرێمی کوردستانی باشوور لە نێوان یاری سیاسەت و یاسادا
ژن لە بینەرەوە تا بێژەر
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی