ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
ووتاری کوردی
ئیمامی زەمان و بۆمبی ئەتۆم/ ن: ئەكبەر گەنجی/ و: سامڕەند حەسەنخاڵی
وەرگێڕانی :سامڕەند حەسەنخاڵی
9 / 2 / 2017
"مەهدی تائیب" - سەرۆكی ئەنجومەنی ناوەندیی بڕیارگەی "عەممار" و پاڵێوراوی مەجلیسی دەستەبژێرانی رابەری – لە بەرواری ١٠ی بەفرانباری ١٣٩٤، لە لێدوانێكدا لە شاری یەزد گوتی: رابەری كۆماری ئیسلامی فەرموویەتی كە فیتنەیەك گەورەتر لە فیتنەكەی ساڵی ٨٨ بەڕێوەیە. بەڕای من، ئەم فیتنەیە، فیتنەیەكی جیهانی دەبێت.
تائێب بۆچی ئەم جارە فیتنەی جیهانی ساز دەكات؟ هەروەك چۆن رەوزەخوێنەكان هەمیشە هەڵوەدای دەشتی كەربەلا دەبن، ئەویش دەچێتە خزمەت ئیمامی زەمان بۆ ئەوەی پاساو بۆ فیتنەی جیهانی بهێنێتەوە. دەڵێ ئیمامی زەمان وەك ئیمامی پاكی ئەم سەردەمە، تووشی "داماویی" بووە، هەروەك لە دوعای "ندبە"دا گوتراوە و، پێویستی بە یارمەتییە.
كەوایە ئێمە رووبەڕووی فیتنەیەكی جیهانی بووینەتەوە. تەنیا كەسێك كە دەتوانێ فیتنەی جیهانی لەناو بەرێت، ئیمامی زەمانە، بەڵام ئیمامی زەمان خۆی گرفتاری "داماویی" بووە و پێویستی بە یارمەتی موسوڵمانانە. كۆماری ئیسلامی لە بنەڕەتدا بۆ دابینكردنی مەرجەكانی ئاشكرابوون و یارمەتیدانی ئیمامی زەمان دامەزراوە و جێگیر بووە. كۆماری ئیسلامی چۆن دەتوانێ یارمەتی ئیمامی زەمان بدات؟
تائیب لە وەڵامدا دەڵێ: "چەرخی سانتریفیوژەكانی كۆماری ئیسلامی، لەڕاستیدا چەرخی بەهێزبوونی ئەو حكومەتە ئیلاهییەیە و، لەم رێیەدا گرنگ ئەوەیە توانا و زانستی ساز كردنی بۆمبی ئەتۆم بەدەست بێنین، هەرچەند ئەو كارە بە حەرام دەزانین، بەڵام بۆ بەهێزبوونی نیزام، بە پێویستی دەزانین زانستەكەیمان هەبێت، تا بتوانین یارمەتی ئیامی زەمان بدەین".
سەبارەت بەم بانگەشەیە، چەند خاڵ شایەنی سەرنجدانن:
یەكەم- گشت ئەو گێڕانەوانەی كە شیعەكان - بە تایبەت زانایانی ئایینی - بۆ ئیمامی زەمان وەك رۆڵەی ئیمامی یازدەهەمیان هەڵبەستووە، فەزایەكی تەواو سەرەتایی دێنێتە بەرچاومان. ئیمامی زەمان، تۆڵەیەكی بەزەبر لە هەموو بكوژانی ئیمامەكان و ئەو ستەمكارانە دەكاتەوە كە مافی پێشەواكانیان پێشێل كردووە، بەڵام قسە لەسەر تۆڵەسەندنەوە بە شمشیرە، نەك شتی تر. فەزاكە هێشتاش فەزای ئاژۆتنی وشتر و ئەسپ و وڵاغە. لەحاڵەتی سروشتیدا كەس، تەنانەت ئیمامەكان و زانایانی ئایینی و ئەوانەشی حەدیسەكانیان لەسەر زار گێڕاوەتەوە - بچووكترین زانیارییان لەبارەی سەردەمی پێشەسازی نەبووە، چ بگات بەوەی كە لە گێڕانەوەكانیاندا باسی ئامرازەكانی ئەم سەردەمە بكەن.
دووهەم- هەموو ئەو پەرجۆ زەوندانەشی كە پێچەوانەی ئاوەزمەندین و لە گێڕانەوەكاندا بۆ قۆناغی دوای دەركەوتنی ئیمامی زەمان هەڵبەستراون، هەر لە هەمان فەزای هەرە دێریندا روو دەدەن. ئەو پەرجۆیانە لە فەزایەكی تەواو سەرەتایی و خێڵەكیدا روو دەدەن و هیچ ئاسەوارێكی سەردەمی مۆدێرن و تێكنۆلۆژی مۆدێرنیان تێدا بەدی ناكرێت. ئەگەر ئەوانەی حەدیسەكانیان گێڕاوەتەوە، تۆسقاڵێك زانیارییان سەبارەت بە پێشەڕۆژ هەبوایە، بە شێوازی مۆدێرن و سەروو مۆدێرن وێنەسازییان بۆ پەرجۆكان دەكرد.
سێهەم- ئیمامی زەمان و ٣١٣ كەس لە هاوەڵانی دێن، تاكو جیهان لە دەست نادادپەروەری رزگار بكەن. ئیمامێك كە لەلایەن خوداوە بەڕێوەبەرێتی جیهانی بەدەستە، هۆی بەهرە و بژێوییە، پێویستی بە یارمەتی كەس نییە. یان ئەو پەسن و هێز و پەرجۆیانەی كە دەیانخەنە پاڵ ئیمام، درۆ‌ودەلەسەن، یان ئەگەر ئەو هێزە زۆر و زەوەندەی هەبێت، پێویستی بە یارمەتی مرۆڤەكان نییە. چەمكی "خاوەن پێداویستی" لەگەڵ چەمكی "بەڕێوەبەری گشتی چەرخی گەردوون" ناگونجێت.
چوارەم- وای دادەنێین ئیمامی زەمان چاولەدەستی هیمەتی موسوڵمانانە، بەڵام بۆ یارمەتییەكە ئەتۆمییە؟ ئیامی زەمان چ پێویستی بە بۆمبی ئەتۆم هەیە؟ ئاخۆ بڕیارە وڵاتان بە بۆمبی ئەتۆم خاپوور بكات؟ گێڕانەوەكان زۆرتر سەبارەت بە تۆڵەسەندەوە لەو كەسانەیە كە زوڵمیان لە ئیمامەكان كردووە. بە پێی گێڕانەوەكان، ئەو ستەمكارانە دووبارە زیندوو دەكەنەوە تاكو بخرێنە بەر شاڵاوی تۆڵەیەكی بەزەبر.
هەڵبەستوانەكانی حەدیس و ریوایەت، هیچ وێنایەكیان لە ئامریكا، چین، روسیە، هیند، پاكستان، ئیسرائیل، فەرانسە و وڵاتانی تری خاوەن هەزاران بۆمبی ئەتۆمی نەبووە تاكو ئەوانیش بێننە ناو گێڕانەوەكانی خۆیان، بەڵام بەپێی بانگەشەكارییەكانی شیعەكان، لەبەر ئەوەی ئیمامەكان پێوارزانی (علم غیب)یان هەبووە و هەیانە، كەوایە دەبوو تەواو ئاگاداری بارودۆخی دنیای ئەمڕۆ ببوونایە و ئەمانەشیان خستبوایەتە ناو پێشبینییەكانی خۆیان لەمەڕ داهاتوو. كەوابوو دەبوایە باسی شەڕی ئەتۆمیشی تێدا هاتبا، هەروەها ئەوەی كە دەبوو موسوڵمانەكان بۆمبی ئەتۆمی دروست بكەن بۆ ئەوەی ئیمامی زەمان بەكاری بهێنێ. 
ئەوان ئەگەر ئاگاداری داهاتووش ببوونایە، دیسان ناوی ئامریكا و روسیە و چین و فەرانسە و ئیسرائیلیان نەدەخزاندە ناو كایەكەوە، چونكە ئەمەوییەكان و عەباسییەكان مافی ئیمامەكانیان پێشێل كردبوو. "ئەوانی تر" وەكو "دوژمن"، ئەو موسوڵمانە ستەمكارانە بوون كە دستیان بەسەر خەلافەتدا گرتبوو. خۆ هێزگەلە پێشكەوتووەكانی بوارەی ئەتۆمی سەدەی بیست و یەك، - بەپێی باوەڕی شیعەكان - دەستیان بەسەر خەلافەتی ئیلاهی ئیمامەكاندا نەگرتووە.
پێنجەم- ئیمامی زەمان بەو هێز و دەسەڵاتە ڕەهایەی كە هەیەتی، - بەپێی گێڕانەوەكان - ئەگەر پێویستی بە بۆمبی ئەتۆم بێت، لەو ١٦ هەزار چەكە ئەتۆمییەی ئامریكا و روسیە كەڵك وەردەگرێ. ئەگەر بێبەشە لە وەها توانایەك، ئەگەر پێویستی بە یارمەتییە، پاكستان وڵاتێكی موسوڵمانە و دەتوانێ لە بۆمبە ئەتۆمییەكانی پاكستان كەڵك وەربگرێت، بەڵام ئەستەمە پاكستانێك كە رۆژانە شیعەكانی تێدا تیرۆر دەكرێت، ڕازی بێ بەوەی بۆمبە ئەتۆمییەكانی خۆی پێشكەش بە ئیمامی زەمان بكات.
شەشەم- دەڵێی "ئیسلامی حوكمی شەرع" لای حاكمانی شەرع، جگە لە سەركوت و توندوتیژی و تۆڵەسەندنەوە و كاولكاری، هیچی تریان لە هەگبەدا نییە. ئیمامی زەمانەكەشیان پێویستی بە بۆمبی ئەتۆم - یان لانیكەم زانستی ئەتۆمی-ە. ئەگەر بۆمبی ئەتۆم بە ئیمامی زەمانەوە بلكێنن، هەمووان بە دیدەی كارەساتەكەی هیرۆشیما و ناكازاكییەوە تەماشای دەكەن.
حەوتەم- ئەگەر شیعەی وا هەن كە پێیان وایە ئیمامی یازدەهەم خاوەن وەچە بووە، من لەسەر ئەو باوەڕە نیم - كە پتر لە هەزار ساڵە نایەتە بەر چاوان و، هەر لەم جیهانەش ئامادە و چاودێرمانە. باشتر وایە بۆ ڕاكێشانی خەڵكانی تری وەك بێ خوداكان، جولەكەكان، مەسیحییەكان، موسوڵمانەكان و... هتد، تەنانەت خودی شیعەكانیش، رووخسارێكی ناتوندوتیژی بۆ بنەخشێنن. لەو وێنەسازییەدا، دەبێ بگوترێ كە ئیمامی زەمان بۆ دادپەروەری، هەموو چەكە ئەتۆمییەكان لەناو دەبات كە خاوەنەكانیان بە پێچەوانەی رێككەوتننامەی (NPT)، ئامادە نین لەناویان بەرن. روخسارێكی گاندی-ئاسا و دایكە ترێزایی بۆ بنەخشێنن، نەك ئەوەی پێویستی بە چەكی ئەتۆمی هەبێ و بەكاربەری ئەو چەكە بێت.
هەشتەم- مەهدی تائیب، یەكێك لە زانا ئایینییە دڵخوازەكانی ئایەتوڵڵا خامەنەیی و ئەنجومەنی چاودێریە. خامەنەیی و موریدەكانی بێ وچان باس لە "دزەكردنی دوژمن" و "دزەكەرەكانی دوژمنان" دەكەن، بەڵام لەڕاستیدا ئایەتوڵڵا خامەنەیی، موریدكانی و كەسانێكی وەك مەهدی تائیب، لەو ماوەیەدا بەو چەشنە قسانە، زۆرترین خزمەتی بێ بەرامبەریان بە نێتانیاهو كردووە. ئەوان بەو قسانە دەرفەتیان بۆ نێتانیاهو رەخساندووە و دەیڕەخسێنن، تاكو لە رێكخراوی نەتەوە یەكگرتووەكان و لە ئاستی جیهانیدا لەسەر مەبەستی ئێران بۆ دروست كردنی چەكی ئەتۆمی بدوێت.
نێتانیاهوو كە خاوەنی ٢٠٠ بۆ ٣٠٠ بۆمبی ئەتۆمە، ئێران-ی بێ چەكی ئەتۆمی لە جیهاندا تۆمەتبار كرد و خستیە ژێر باری قورسترین ئابڵوقەكان لە درێژایی مێژوودا. ئایەتوڵڵا خامەنەیی و بنەماخوازە تۆندڕەو و نەریتخوازەكان، سیخوڕە راستەقینەكانی رێكخراوەگەلێكی وەك (موساد) و (سی.ئای.ئەی) و (ئێم.ئای.6)ن. هەموو قسە (دۆن كیشۆت) ئاساكانیان بووبە سوود و چووە ناو باخەڵی دەوڵەتی داگیركەر و ئاپارتایدیی ئیسرائیلەوە.
نۆهەم- تیۆری پیلانگێڕی، مەزندەیەكی پڕ‌وپووچە، بەڵام "پیلانگێڕی"، لە ئاستی نێودەوڵەتیدا یەكێك لە گرنگترین ئامرازەكانی دەوڵەت بۆ بەرەوپێش بردنی بەرژەوەندییەكانیان بووە و دەبێت. بە دڵنیاییەوە، رێكخراوە سیخوڕییەكانی رۆژئاوا و ئیسرائیل لە ئێران سیخوڕیان هەبووە و هەیانە. هەندێك لە گوتار و هەوڵەكانی هەندێك لە كاربەدەستانی كۆماری ئیسلامی، ئەو گومانە بەهێز دەكات كە بە چاوی سیخوڕی گریمانەكراو تەماشا بكرێن. ئاخر چۆن دەكرێت كاربەدەستانی كۆماری ئیسلامی گوتارگەلێك دەربڕن و رەفتارگەلێك بنوێنن كە سەد لە سەد خێر‌وبێری دەوڵەتی ڕاستگەرای ئیسرائیلی تێدا بێت؟
دەیەم – شان‌ومل دانە ژێر بەرپرسیارێتی، لایەنێكی گرنگی هونەری رامیارییە. كاربەدەستانی كۆماری ئیسلامی نە لە ئاسمانەوە دابەزیون و نە بیانییەكان بەسەر ئێمەیاندا سەپاندوون. ئەوان هەڵقوڵاوی ئەم خاكەن و لەلایەن خۆمانەوە پەسەندكراون. ئەگەر حكومەتی ئایینزان-سالاری سوڵتانی هەر ماوەتەوە، هەموومان لێی بەرپرسیار بووین و هەین. ئەگەرچی رێژەی بەرپرسیارێتییەكە لای هەمووان یەكسان نەبووە و نییە. 
میسباح، جەنەتی، یەزدی، لاریجانی، موحسنی ئێژەیی، موسلیحی، نووری هەمەدانی، تائیب و... هتد، زاڵ بوون و مانەوە، لەبەر ئەوەی ئێمە هیچمان نەكرد. رەخنە و دروشمە باوەكان لەدژی رژێم، مرۆڤ خۆشناو دەكات، بەڵام رەخنەگرتن لە خود و خەڵك، مرۆڤ ناوزڕ دەكات. رەخنەگرتن لە خەڵك، پتەوترین كۆڵەكەی رووناكبیرییە، بەڵام نابێ لە یادمان بچێ كە رووناكبیرەكانیش بەشێكن لە خەڵك.

---------
سەرچاوە: سایتی رادیۆ زەمانە



بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 62
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08 09 10 11 12
ووتاری کوردی
هێژموونیی زمانی فارسی و هەوڵ بۆ سڕینەوەی زمان و شوناسی کوردی
هەنگاوی بەرەو دوا
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی