ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
ووتاری کوردی
پەیامی یەکێتیی دیموکراتی کوردستان بە بۆنەی هاتنی ساڵی نوێی کوردی و جەژنی نەورۆز و ڕاگەیاندنی هەرێمی ڕۆژئاوای کوردستان
******************
18 / 3 / 2016

ڕوو بە گەلەکەمان، گەلی کوردی خۆشەویست:

پەیامی یەکێتیی دیموکراتی کوردستان بە بۆنەی هاتنی ساڵی نوێی کوردی و جەژنی نەورۆز و ڕاگەیاندنی هەرێمی ڕۆژئاوای کوردستان

ئاوەزینگی زستانە و دەمی هەڵسانەوەی چرۆ بە دەم بای دار ئاوسەوە، شەکینەوەی گوڵی نەورۆز بە سروەی بەرەبەیان، مزگێنی ژیانەوەی پێیە کە وەرزی نوێی هیواکان و نوێبوونەوەی سرووشتە و دەسپێکی دەورە و قۆناغێکی نوێیە لە ژیانی سرووشتی و کۆمەڵایەتی و ئابووری و بۆ ئێمەی کوردیش دەسپێکێکی نوێی ژیانی سیاسیە.

كورد و نەورۆز دوو دوانەی لێك ئاڵاون كە مێژووییەكی كۆنیان لە گەڵ یەك هەیە، گەلی كورد بە درێژایی مێژوو نەورۆزی وەك هێمای هەڵسانەوە و بە گژداچوونەوەی دوژمنانی پاراستووە و لە بەرابەریشدا دوژمنانی كورد لە هەوڵی سڕێنەوە و كەمڕەنگ كردنەوەی ئەو بۆنە نەتەوەییەی كورد بوون و لە هەموو  ئایین و ئایدیایەك و هەر كەرەستەیەكی سەركووتكردن  كەڵكیان وەرگرتووە كە یان ئەو بۆنەیە بسڕنەوە یان بەتەواوەتی كەمڕەنگ و بێ بایەخی كەن و پێشی پێ بگرن، بەڵام بە خۆشحاڵیەوە گەلی كورد بە ڕۆحی كەسێتی كوردی و ناخی پڕ لە نیشتماندۆستی و كۆڵنەدانی فیكری بەرامبەر بە هێزی داگیركەر  سەركەوتووتر بووە و بە هەموو شێوەیەك توانیوویەتی پارێزەری بۆنەی نەتەوەییەكەی بێت كە هێمایەكە بۆ بەرخۆدان و زیندوو بوون و هەمیشە مانەوەی كورد بەرامبەر بە نەیارانی.

لە ئێستادا نەورۆز بووەتە بۆنەیەک بۆ مزگێنی بەخشینی ڕزگاری بە گەلی کورد و هەموو نەورۆزێک گەلی کورد چاوەڕێی موژدەیەکی خۆش دەکات کە وەک جەژنانە گوێبیستی بێت و لەم نەورۆزەشدا ڕۆژئاوای کوردستان هەنگاوێکی مێژوویی بەرەو گەیشتن بە ئامانجەکانی ناوە کە موژدە و مزگێنیەکی دڵخۆشکەرە بۆ هەموو گەلی کورد و وەک یەکێتیی دیموکراتی کوردستان پیرۆزبایی ئەم سەرکەوتنە و ڕاگەیاندنی هەرێمی ڕۆژئاوای کوردستان دەکەین.

ڕاگەیاندنی هەرێمی  ڕۆژئاوا، موژدەیەکی نەورۆزانەیە کە لە دۆخێکی سیاسی ناجێگیر و پڕ لە ئاڵۆزی و کێشە و شەڕدا ڕاگەیەنرا، گەرچی ئاڵۆزی و ململانێی سیاسی ناوچەی خۆرهەڵاتی ناوەڕست چەندین سەدەیە بەردەوامە بەڵام هیچکات وەک ئەم چەند ساڵەی دووایی نەگەیشتووەتە ئەو ئاستە مەترسیدارەی کە هەڕەشەی جیدی بێت بۆ سەر ژیانی هەموو مرۆڤ. لەم نێوەندە دا گەلی کورد توانی سەرەڕای هەموو ‌هەڕەشەکان، تا کوو هەنووکە بە هێزەوە بەرەنگاری ئەو مەترسیانە بێتەوە و خۆڕاگرانە هەم بەرامبەر بە هێزە تیرۆریستیەکان بوەستێت، تایبەت لە ڕۆژئاوا و باشوور هەمیش لە بەرابەر دەوڵەتە داگیرکەرەکان تایبەت لە باکووری کوردستان و بەرابەر بە دەوڵەتی تورکیا کە سوپا و هێزی ئەمنی ئەو وڵاتە بە دڕندانەترین شێوە لە گەڵ خۆڕاگرانی باکوور جووڵاوتەوە و تەنانەت ڕایگەیاندووە کە پیرۆز کردن و جەژنگێڕانی نەورۆز، هێمای زیندوویەتی و بوونی کورد و خۆڕاگری و بەرخۆدانی کوردان، قەدەغەیە و نابێ ئەو جەژنە لە باکوور پیرۆز بکرێت کە بە دڵنیاییەوە گەلەکەمان لە باکوور بە تووندی وڵامی ئەو جۆرە لە ئینکار و هەوڵی سڕینەوەیە دەدات و نەورۆزی ئەمساڵ دەکات بە جەژنێکی گەورە و بمێن.

لە باشووری کوردستان توانراوە بەرامبەر بە هێزە تیرۆریستیەکان سەرکەوتنی گەورە بەدەست بێت و لە هەمانکاتیشدا ڕەوشی ئابووری کاریگەری لە سەر ژیانی خەڵک داناوە  تەنانەت ململانێ سیاسیەکانی ناخۆی هەرێمی کوردستان لە باشوور بە هەمان شێوە کاریگەری خۆی لە سەر ژیانی گشتی گەلەکەمان داناوە بەڵام ململانێی سیاسی و هەوڵدان بۆ دەستاودەست کردنی دەسەڵاتی سیاسی دیاردەیەکی باوی دیموکراسیە و هیوادارین کە هێزە سیاسیەکانی باشووری کوردستان بە ڕۆحیەتی دیموکراتیک و بە دیدێکی نیشتمانیەوە لە هەوڵی یەکبوونی گووتاری نەتەوەییدا بن چوونکوو ئەزموونی باشوری کوردستان ئەزموونێکە کە کاریگەری تەواو و ستراتژیکی لە سەر ڕەوشی کورد بە گشتی و دۆزی گەلەکەمان لە هەر چوار پارچەی کوردستان هەیە و دیسان هیوادارین کە بە هێمنانە و وریاییەوە هێزە سیاسیەکان و گەلەکەمان لە باشوور جووڵە و یاری سیاسی خۆیان بکەن.

جەژنی نەورۆز و هەڵکردنی ئاگری نەورۆز لە خۆرهەڵاتی کوردستان، سەرە ڕای ئەوەی کە لەم چەند دەیەی دواییە کە کۆماری ئیسلامی لە سەر دەسەڵات بووە هەوڵدراوە کە کەمڕەنگ و بێبایەخ بکرێت و بە بیانووی جۆراوجۆر ڕێگری لە بەڕێوەچوونی شکۆمەندانە و جەماوەرانەی جەژنی نەورۆز کردووە بەڵام گەلەکەمان لە خۆرهەڵات ملکەج نەبووە بۆ بێنرخ کردنی و بێنرخ نواندنی ئەو بۆنە نەتەوەییە و هەمیشە لە هەوڵی بەرز ڕاگرتنی ئەو بۆنەیە بووە، کەشی سیاسی لە وڵاتی ئێران بە گشتی و لە کوردستان بەتایبەتی، کەشێکی ئەمنی و سەرکوتگەرانەیە لە ژێر پەردە و ڕووپۆشی ئاییندا کە هەر جۆرە بۆنە و مەراسیمێک لە دەرەوەی ئایدیا سیاسیەکەی بە فەرمی ناناسێت و ڕێگەی فەرمی بۆ بيڕێوەبردنی نادات گەرچی بە ڕواڵەت و بە گرتنی هەندێک بەنامەی ڕاگەیاندنی دەیەوێت بە دڵی خۆی پێناسەی نەورۆز و ئەو بۆنەیە بکات بەڵام گەلانی ئێرانی و تایبەت گەلی کورد بە شێوەی نەریتی و بە پێی کلتوور و داب و نەریتی خۆی ئەو بۆنەیە بەرز ڕادەگرێت.

وەک یەکێتیی دیموکراتی کوردستان نەورۆز لە هەموو گەلی کورد پیرۆز دەکەین و تایبەت ڕاگەیاندنی هەرێمی ڕۆژئاوای کوردستان ڕەنگ و بۆیەکی تر دەدات بە ئەم نەورۆزە و سەلمێنەری ئەو ڕاستیەیە کە نەورۆز، بۆنەیەکی دڵخۆشکەر و سەرکەوتنە بۆ گەلی کورد، هیوادارین گەلەکەمان لە باکوور بتوانێت بە سەرفرازی و بە سەرکەوتوویی بە بنەما گرتنی پەرەنسیبی ئاشتیخوازانە بەرامبەر بە شەڕخوازی دەوڵەتی تورکیا سەرکەوتن بەدەست بێنێت، هەروەها باشووری کوردستانیش دڵنیاین کە دۆخی ناهەمواری ئابووری تێدەپەڕێنن و سیستەمی سیاسی باشووری کوردستان هەنگاوێکی تر لە پرۆسەی سیاسی سەربەخۆیی نێزیک دەبێتەوە و هیوای سەرکەوتنی گەلی کورد بە گڕوتینەوە دەهێڵێتەوە، سەبارەت بە خۆرهەڵاتی کوردستان گەرچی باردۆخی سیاسی ناوچەکە و بەرژەوەندی نەتەوەیی لە پارچەکانی تری کوردستان کاریگەری داناوەتە سەر بزاوتە سیاسیەکانی بەڵام ئەو پارچەیە لە کوردستان لانکەی نەتەوایەتی و خۆشەویستی نیشتمانیە و چالاکوانانی ئەم پارچەیە لە هەموو کات زیاتر یارمەتیدەر و گەشەدارتر کردنی هزری سەربەستی خوازی و یەکبوونی کوردانن و لە ڕێگەی هەموو جۆرە کردار و جووڵەیەکی مەدەنی، کلتووری، ئەدەبی، ژینگەیی و سیاسی لە هەوڵی پڕ ڕەنگ کردنی داخوازیە نەتەوەییەکانی گەلەکەمانن و جێگای شانازیشە کە لە کەش و هەوایەکی سیاسی نادیموکراتیکدا توانیویانە تا ئەو ڕادەیە بە چالاکی بمێننەوە. هەر لێرەوە وەک یەکێتیی دیموکراتی کوردستان دەستخۆشی لە هەوڵ و ماندوو بوونی چالاکانی بووارە جۆراوجۆرەکان و کایە کلتووری و ئەدەبی و ژینگەیی و سیاسیەکانیان دەکەین و زیندانیانی سیاسی و چالاکانی بە ناڕەوا بەندکراو لە بیر ناکەین و یادی شەهیدانی کوردستان و ڕێگای ئاشتی و ئازادی و دیموکراسی و بەگژداچوونەوەی تیرۆریستان لە هەر چوار پارچەی کوردستان بەرز و پیرۆز ڕادەگرین و نەورۆزتان پیرۆز دەکەین.

جەژنی نەورۆز، جەژنی سەرکەوتنی کوردان پیرۆز بێت

یەکێتیی دیموکراتی کوردستان

٢٨ی ڕەشەمەی ٢٧٠١٥ی کوردی

١٨ی ئازاری ٢٠١٦ی زایینی

٢٨ی ئیسفەندی ١٣٩٤هەتاوی      

 



بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 62
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08 09 10 11 12
ووتاری کوردی
هێژموونیی زمانی فارسی و هەوڵ بۆ سڕینەوەی زمان و شوناسی کوردی
هەنگاوی بەرەو دوا
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی