ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
ووتاری کوردی
پەیامی یەکێتیی دیموکراتی کوردستان بە بۆنەی ساڵڕۆژی کیمیابارانی هەڵەبجە
یەکێتیی دیموکراتی کوردستان
15 / 3 / 2016
گەلی کورد بە درێژایی مێژوویی بوونی خۆی لە ناوچەی خۆرهەڵاتی ناوەڕاست، هەمیشە لە لایەن نەتەوە باڵادەستەکان و دەوڵەتە ستەمکار و داگیرکەرەکانەوە کراوەتە ئامانجی شەڕئەنگێزی و مێژوویەکی پڕ لە کارەساتیان بۆ گەلی کورد خولقاندووە ، گەرچی گەلی کوردیش تا دواهەناسە خۆڕاگر بووە بەرامبەر بە دەستدرێژیەکانی نەتەوە باڵادەست و دەوڵەتە داگیرکەر و دەوڵەت نەتەوەکانی ناوچەکە و کۆڵی نەداوە لە هەمبەر ئەو زۆڵم و زۆرداریەی کە کراوەتە سەری و لە پێناو بە دەست هێنانی مافی نەتەوایەتی خۆی و ئازادیە ڕەواکەی و بۆ سەربەستی و خۆبەخاوەن بوون هەموو کات لە هەوڵ دا بووە و خەباتی بۆ کردووە و لەو پێناوەش دا گەلێک قوربانی داوە و مێژووی ئەم نەتەوە پڕە لە دەیان کارەساتی دڵتەزێن کە دووژمنانی بە ناڕەوا بە سەریدا هێناویانە و هەرجارەو بەشێوەیەک و بە کەرستەیەک و بە بیانوویەک و بە هێنانەوەی پاساوێکی بێ بنەماوە، هێرشیان بۆ هێناو و دەیهێنن.
یەکێک لەو کارەساتانەی کە دەوڵەتە داگیرکەرەکەی بەعسی ڕوخاوو لە کۆتاییەکانی سەدەی ڕابردوو لە ١٦ی مانگی ئازاری ١٩٨٨ی زایینی بە سەر گەلی کوردی هێنا و دەڤەری هەڵەبجەی پڕ کرد لە لاشەی مرۆڤی کوردی پەپوولە ئاسا کە بێتاوانترین کەسەکانی سەر ئەو گۆی زەویە بوون کە تەنگی هەناسەیان پێ هەڵچنینوو و لە گازی خەردەڵدا خنکاندیانی و نەک تەنیا مافی کورد بوون بەڵکوو مافی ئینسانی و ژیانیشی پێیان ڕەوا نەبینی.
گەرچی حکوومەتەکەی سەدام و بەعس لە ناو چوو، بەڵام هەڵەبجە وەک هێمای ئاشتی و ژیانەوەی دووبارە، خۆڕاگرتر و زیندووتر لە هەمیشە ماوەتەوە و بە بێتاوانی خۆی و بە هەناسەتەنگی خۆی، بوەتە پەڵەیەکی ڕەش بە نێوچاوانی ڕژێمی لە ناوچووی بەعس و لایەنگرانی و هەروەها دووژمنانی دۆزی ڕەوای کورد. دیارە کارەساتی هەڵەبجە برینێکی سارێژنەکراوە بە جەستەی کورد و هەروەها ئازارێکی هەمیشەیی مرۆڤایەتیە کە پڕە لە وانەی فێربوون بۆ ئەمڕۆ و داهاتوو. یەکبوون بەرامبەر بە ستەم و ستەمکاری و داگیرکاری وانەی شەهید بوونی هەڵەبجەیە کە کورد ناچارە بە یەکێتیی نەتەوەیی بەرامبەر بە دڕندایەتی دووژمنانی تاکوو دووبارە بوونەوی کارەساتی وەها لە سەر نەتەوەکەمان نەبینینەوە و وانەیەکە بۆ مرۆڤایەتی کە بێدەنگی بەرامبەر بە دەسەڵاتە ستەمکارەکان، برینی قووڵ و بە ئازار لە سەر بیرەوەری ویژدانی مرۆڤایەتی بە جێدەهێڵێت کە بە هیچ شێوەیەک سارێژ نابێتەوە.  
وەک یەکێتیی دیموکراتی کوردستان یادی هەلەبجە و شەهیدانی کارەساتی کیمیابارانی ئەو شارەو هەروەها هەموو شەهیدانی ڕێگای ڕزگاری گەلەکەمان بەرز و پیرۆز ڕادەگرین و ڕایدەگەیەنین هەڵەبجە هێمای ستەملێکراویی نەتەوەیەکی بێ دەوڵەتە کە بە دەیان ساڵە لە هەوڵی ڕزگاری لە ژێردەستی و داگیرکراوی دایە و تا هەنووکە بەرخۆدان و خەباتی ئازادیخوازی خۆی درێژە پێداوە و لە باکووری وڵات تاوەکوو ڕۆژئاوای نێزیک لە ئاسۆی سەرکەوتن و باشوور تا ڕۆژهەڵاتی پڕ لە هیوای نەتەوایەتی، زیاتر لە هەر سەردەمێک نێزیک بووەتەوە لە ئامانجەکانی و تەنیا پێویستی بە یەکێتیی زیاتر و ڕۆحی ئازادیخوازی و دیموکراتیک بوونی فراوانتری هەیە کە وەک نەتەوەیەکی ئاشتیخواز، ببین بە خاوەن سەروەری خاک و وڵاتی خۆمان.
بەهیوای ئەوەی کە بتوانین وەک نەتەوەیەکی ئاشتیخواز و دیموکرات بگەین بەئامانجە ڕەواکانی نەتەوەکەمان سەری ڕێز بۆ شەهیدان دادەنوێنین و یادی هەڵەبجە هەمیشە بەزیندوویی دەهێڵینەوە.
بەرز و پیرۆز بێت یادی هەڵەبجە
یەکێتیی دیموکراتی کوردستان
١٥ئازاری ٢٠١٦



بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 62
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08 09 10 11 12
ووتاری کوردی
هێژموونیی زمانی فارسی و هەوڵ بۆ سڕینەوەی زمان و شوناسی کوردی
هەنگاوی بەرەو دوا
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی