ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
ووتاری کوردی
ئەو كاتەی سوومریەكان و پێغەمبەری ئیسلامیش دەبن بە تورك/ خوێندنەوەیەك بۆ كتێبی ‘‘ ڕاپسۆدی تورك - لە ژێر هێلانەی گورگ ،،
زمناکۆ
8 / 11 / 2015
هیچ نەتەوەیەك بێ مێژوو و بێ كلتوور و بێ بنەما نییە و شوێنی جوگرافی و ژینگەی نیشتەجێ بوون و تێپەڕبوونی زەمەن و داهێنانی داب و نەریت و هەروەها كلتوور و ئایین و ئۆستوورە و ئەفسانەی خولقێنراویان، كاریگەری هەبووە بۆ دەربڕێنی سۆز و هەست و نفرەت و هەروەها ناولێنانی كەرەستە و شوێن و درووست بوونی دیالتیك و ئاخافتن و بە پێی گەشەی كۆمەڵگە و گرێپێدراوی خزمایەتی و مێژوو و كلتوور و زمانی هاوبەش، هەڵكشان بەرەوە نەتەوە و فراوان بوونی حەشیمەتی نەتەوەیی لێ كەوتووەتەوە هەر بۆیە ئەوە ڕەوتی مێژوو و هەروەها گەشەی كۆمەڵگە و ئاسانترین شێوەی دەربڕینی وشەیە كە نەتەوەیەك دەهێڵێتەوە و زمانی نەتەوەیی هەر نەتەوەیەك بە پێیی زەمەن ڕووی لە گەشەسەندن كردووە و لق و پۆپی زیاتری لێ بووتەوە و تا ئێستا نەتوانراوە زانایان ئەوە بسەلمێنن كە زمانێك دایكی زمانەكانی ترە و زمانەكانی نەتەوەكانی تر ڕەگ و ڕیشەیان لە زمانێكی نەتەوەیەكی تایبەتەوە هاتووە و زمانی دایك، زمانی فڵانە نەتەوەیە كە لە ئێستادا بوونی هەیە، چوونكوو مرۆڤ بەم زانیاری و زانستی ئەوڕۆییەوە كە بەشێكی لە مێژووی كۆنی مرۆڤایەتی و شارستانیەتی كۆنەوە بە میرات بۆ ماوەتەوە، هێشتا نازانێت كە ئایا زمانێكی دایك بۆ هەموو نەتەوەكان بوونی هەبووە و بە تێ پەڕ بوونی زەمەن و كات لق و پۆپی لێ كەوتووەتەوە یان ئەوەی كە هەر لە سەرەتاوە هەر ناوچەیەك و شوێنی نیشتەجێ بوونێكی سەرەتایی، زمانێكی تایبەتی هەبووە و هەتا ئەوڕۆ بەردەوام لە نوێ بوونەوە و گەشە كردن دا بووە، لە ڕاستیدا بۆچوونی دووهەم بە لای منەوە زیاتر لە ڕاستی و درووستی دەچێت بە بێ ئەوەی كە بگەڕێم بە دوای بۆچوون و تیۆری هیچ زانایەكی تایبەتدا.
بەڵام زۆر جار تیۆری كەنیندار و شایەنی گاڵتە پێ كردن لە نێو نەتەوە جیاوازەكان بوونی هەیە كە لە لایەن هەندێك كەسی بەناو زانا پێشكەش دەكرێت، بۆ نموونە لە ویدیۆیەكی مەلایەكی ئایینی بیستم و بینیم كە زمانی عەرەبی زمانی قەیامەتە و هەر كەسە لە قەیامەت و لە كاتی مەحشەردا عەرەبی نەزانێت و نەتوانێت بە عەرەبی قسە بكات ئەوا خوای خولقێنەری ئەم جیهانە ڕەنگین و فراوان و جۆراوجۆرە ڕەوانەی دۆزەخی ئەكات، یان ئەوەی كە لە ناوی نەتەوەی عەرەبدا باوە كە ئەڵێن خودا بۆ خۆی عەرەبە و زمانی عەرەبی زمانی ئادەم و حەوا بووە.!! 
لە زۆرێك لە نەتەوەكانی تریش كە لە سەردەمی نوێدا لە نەتەوە و وڵاتانی تر كەوتوونەتە دواوە لە گەشەی شارستانیەتی مۆدێرَنی ئەوڕۆیی ، هەوڵی شانازی بە ڕابردوو بە فراوانی دەبینرێت و هەوڵ دەدرێت كە هەموو پێشكەوتنی جیهانی ئەوڕۆیی ببەستنەوە بە مێژوو و ڕابردووی نەتەوەكەی خۆیانەوە و جیهانی ئەوڕۆ بە قەرزداری مێژووی نەتەوەكەی خۆیان بزانن و بە جیدیش باسی كەن و سڵ لە نووسینی هیچ جۆرە نووسینێكی بێ بنەما و دوور لە ڕاستی و زانستی نەكەنەوە، نموونەش فرە و فراوانە هەر لە یۆنانیەكانەوە بگرە تا فارس و عەرەب و تورك و ئاڵمانی و تەنانەت ئێمەی كوردیش.
هەروەك چۆن لە سەردێڕی بابەتەكەدا هێناومە یەكێك لەو نموونانەی كە بە شانازییەوە باس لە دەرخستن و دۆزینەوەی نەتەوەی سەرەكی و زمانی سەرەكی دەكات و لە لایەن كەسی ناودار و خاوەن پلەی زانستی و حكومیەوە كراوە بە تیۆری و وەك بنەمای شوناسی نەتەوەی تورك هەڵساوە بە بەڵگە هێنانەوەی وەهمی و لێكچووی وشەی زمانی و نێزیكایەتی زمان و دەربڕین ، كەسێك بە ناوی قایرات ( غیرەت) زاكریانۆفە كە سەرۆكی ئاكادمی وەرزش و گەشتوگوزاری كۆماری قەزاقستانە.
قایرات زاكریانۆف دوو كتێبی لە ژێر ناونیشانی ،، ڕاپسۆدی توركی لە ژێر هێلانەی گورگ ،، و ،، دیرۆكی توركی چەنگیزخان و فاكتووری قەزاق،، نووسیوە كە لە چەندین جێگادا خەڵاتیان پێ بەخشیوە سەبارەت بە تیوریەكانی كە لەم كتێبانەی دا هێناویەتی.
با ئەوە بمێنێت كە قایرات زاكریانۆف لە كتێبی " دیرۆكی توركی چەنگیزخان و فاكتووری قەزاق"  لە هەوڵی ئەوەدایە كە سیمای خوێنڕێژی چەنگیزخان جوان و مرۆڤانەكات بەڵكوو هەموو مرۆڤایەتی و شارستانیەتی نوێی مرۆڤ بە دەیندار و قەرزداری چەنگیزخان دەزانێت كە بە لەشكركێشیەكانی شارستانیەتی نوێی بڵاو كردەوە بە هەر چوار گۆشەی جیهاندا، بەڵام لە كتێبی  ڕاپسۆدی توركی لە ژێر هێلانەی گورگدا باسی سەیروسەمەرتر دەكات كە ئادەم و حەوا كە یەكەم جار خەلق كراون بە توركی قسەیان كردووە و تەنانەت لە ئالمائاتی پایتەختی قەزاقستانیش هاتونەتە سەر زەوی!!.
ئەو لە كتێبەكەیدا ڕەچەڵەكی هەموو پەیام هێنەرانی دینی بە تورك دەزانێت و دەڵێت نوحیش تورك بووە بەو بەڵگەیەی كە سێ كوڕی هەبووە و ئێستا قەزاقەكانیش سێ تیرە و عەشیرەن و هەروەها پەیامهێنەرە دینیەكانی تریش و تەنانەت زەردەشت و بودا و كۆنفۆشیوسیش بە تورك دەزانێت و ڕەگیان دەگەڕێنێتەوە بۆ توركەكانی ئاسایای ناوین.
گەرچی توركەكانی ئێرانیش جار جارە باسیان لە لێكچوونی زمانی سوومر و تورك كردووە بەڵام زاكریانۆف زۆر بە جیدی ئەو تیۆریە دێنێتە پێشەوە و باس لەوە دەكات كە سومەرەكان لە ئاسیای ناوەڕاستەوە كۆچیان كردووە بۆ مزۆپتامیاو ڕەچەڵەكیان لە توركەكانی ئاسیای ناوەڕاستە و بۆ بەڵگەش هەندێك وشە دێنێتەوە كە نێزیكە لە نێوان وشە سوومریەكان و توركیەكان.
لێرە نامەوێ زیاتر لە ئەوەی كە پێویست بكات بڕۆمە نێوەڕۆكی كتێبەكەوە بەڵام ئەوەی كە بەو شێوەیە هەوڵ ئەدرێت گەڕانەوە بۆ مێژوو و لێكچوونی هەندێك لە وشەی ئاخاوتن و بەش بوونی عەشیرەیی و لێكچوونی ناوی چیا و دەشت و شار لە هەندێك ناوی بەناوبانگی كەسەكان وەك پێغەمبەر و زانا دینیەكان ببێت بە بەڵگە بۆ ڕەسەنایەتی بەخشین بە نەتەوە و زمانێك كە مرۆڤایەتی بە قەرزداری بزانی و هەموو نەتەوەكانی تری سەر گۆی زەوی بە ناڕەسەن بناسێنی و هەمو شانازیەك بدەیتە مێژوویەك كە جێگای بایەخ نییە بۆ ئەوڕۆكانە ، هەوڵێكی جێگای بەزەیی و لە هەمان كات مەترسیداری شۆڤینیە كە ڕەسەنایەتی بەخشین بە مێژوو تەنیا بێ بایەخ كردنی نرخی مرۆڤی هاوڕەنگ بەڵام جیاواز لە تۆیە، هەر بۆیە ئەو شێوە لە بیركردنەوەیە نەتەنیا سوودێكی بۆ ژیانی سەردەمیانەی نێوان نەتەوەكان و گەلانی سەر زەوی نابێت بەڵكوو توخمی قین و نفرەت بڵاو ئەكاتەوە و ئاكامەكەی تەنیا شەڕخوازی ە شەڕ فرۆشتنە بەو نەتەوەگەلەی كە بە نارشەسەن و قەرزدرایان دەزانی بە هەمان شێوە كە تا هەنووكە دەیبینین كە مێژووی ڕۆژهەڵاتی ناوەڕاست خنكاوی ئەو شێوە لە بیركردنەوە شوڤینەیە كە ڕەسەنایەتی لە نەتەوەكانی تر دەسێنێتە و بیانوویەك دەبێت بۆ سڕینەوە و ژێردەستە كردن و كۆیلەكردنی نەتەوەكانی تر.   

 





بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 61
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08
ووتاری کوردی
هەرێمی کوردستانی باشوور لە نێوان یاری سیاسەت و یاسادا
ژن لە بینەرەوە تا بێژەر
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی