ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
ووتاری کوردی
هاوسەنگەری ڕێبەرانی سیاسی و ئایینی خۆرهەڵاتی ناوەڕاست
خەلیل محەممەدی
25 / 9 / 2015
ئەو دیمەنانەی كە لە خۆرهەڵاتی ناوەڕاستی لانكە و پێگەی شارستانیەتی كەونی مرۆڤ بڵاو دەبێتەو بە ڕۆژانە لە سەر شاشەی تەلەفیزیۆن یان كامپیۆتر و تەبلێت و تەلەفوونەكان دەیانبینین دیمەنی دڵتەزێن و خەمهێنەرە و ڕووی هەڵماڵراوی نهێنیەكی گەورەیە كە تا ڕادەیەكی فراوان تراژدییەكی كۆمیكە كە هاوسەنگەری شەڕكەران و ڕێبەرانی سیاسی و ئایینە جیاواز و دژبەرەكان بەرامبەر بە گەلانی خۆرهەڵاتی ناوەڕاست نیشان دەدات.
ئەوەی كەی بە چاوی خۆمان دەبینین كە خۆرهەڵاتی ناوەڕاست بە دۆخێكی مەترسیداردا تێ دەپەڕێت و  كارەساتی گەورەی مرۆیی ڕوودەدات و قەیرانی گەوەر ڕووی لەم هەرێمەی جیهانی سەدەی بیست و یەكەم كردووە كە جیهان دەیەوێت ژیانێكی نوێ لە سەردەمی تەكنەلۆژیا و ئاڵوگۆڕی ئەنفۆرماتیك و زانستی پێشكەوتوو و هەروەها ڕۆحی پێكەوەژیان و پێكەوە گونجانی دیموكراتیكانە ئەزموون بكات ، هەتاكوو دێت مرۆڤی خۆرئاوایی لە ناخی جوانی و ئارامی ژیان نێزیك دەبێتەوە بەڵام دەبینین كە بە پێچەوانەوە لە خۆرهەڵاتی ناوەڕاست ڕەوتەكە ئاراستەیەكی تری گرتووتە بەر و تا دێت ئاڵۆزی فراوانتر و كاولكاری بەرینتر بەرهەم دێت.
لای دەسەڵاتدارانی خۆرهەڵاتی ناوەڕاست ، خۆرئاواییەكان ژیانیان لە بێ ڕەوشتی و بی كلتووریدا بە ڕێدەچێت و شارستانیەتی خۆرئاوا پووچە و تەنیا بەرهەمهێنەری كەرەستەی مادیە و جوانیەكانی ژیانی فرامۆش كردووە بەڵام دەبینین گەلانی خۆرهەڵاتی ناوەڕاست بۆ دەرچوون لەو دۆزەخەی كە ڕێبەرانی سیاسی و ئایینی لەم هەرێمە دیرۆكی و كەونئاراییەدا بەرهەمیان هێناوە پەنا دەبەنە بەر ئەو وڵاتانەی كە بە باوەڕی ڕێبەرانی سیاسی و ئایینی خۆرهەڵاتی ناوەڕاست پووچە لە ڕەوشت و ئەخلاق و كلتوور. دەزگا ڕاگەیاندنی و پەروەردەییەكانی دەسەڵاتدارانی خۆرهەڵاتی ناوەڕاست تا توانیویانە مێشكی مرۆڤی ئەم هەرێمەی بن دەسەڵاتی خۆیانیان پڕ كردووە لە ئەو وتە نادرووستەی كە خۆرئاوا پووچە لە ڕەوشت و ئەخلاق و كلتوور، مەبەستیشیان تەنیا بەلاڕێدا بردنی ڕای خەڵك لە ئەو ڕاستیەیە كە ژیان لە كۆمەڵگەی ئەرووپی و خۆرئاوایدا لە ئاشتی و سەقامگیری و ڕێزدا بەڕێ دەكرێت كە ئەویش بە هۆی سالار بوون و حاكم بوونی یاسایە كە دەسەڵاتدار و ڕێبەران و پیاوە ئایینەكانی ئەو ناوچانەی مل كەجی خواستی گشتی كردووە و ئەو ملكەجیەش بەرهەمی تێكۆشانی ڕێبەرانی سیاسی و دەسەڵاتدارانی خۆرئاوا بووە یاسایان سەروەر كردووە و خودی خۆیشیانیان خستووتە بن ڕەحمەتی یاساوە.
دەبینین كە دەسەڵاتدارانی خۆرهەڵاتی ناوەڕاستی نەتەنیا بە درۆ كلتوور و ڕەوشتی كۆمەڵگەكانی تری گۆی زەوی پێچەوانە نیشان دەدەن بەڵكوو هەموو هەوڵێك دەدەن كە ترس بكەن بە كەرەستەیەك بۆ زاڵ بوون بە سەر گەلانی بن دەستیان و ترسیشیان لەوەوە دێت كە دەسەڵاتداری سیاسی دەترسێت كە كورسی هێزەكەی لێ بسێنرێتەوە ، پیاوانی ئایینی دەترسن كە دەروێش و شوێنكەوتەكانی تووشی گەشەی فیكری یان لادەری فیكری بن و لە دەروێش و شوێنكەوتەكانی كەم بێتەوە هەر بۆیە دەبینین كە ترس وەك كەرەستە بووە بە گورزێك بۆ سەركوت كردنی گەلانی ناوچەكە و هاوكات كەرتێكی هاوبەشی نێوان هەموو دەسەڵاتدارنی خۆرهەڵاتی ناوەڕاستە.
ستەم و كوشتن و دەستدرێژی كردنە سەر كرامەتی گشتی لە خۆرهەڵاتی ناوەڕاست بەشێكی تری لێكچوونی ڕێبەرانی سیاسی و دەسەڵاتدارانی ئایینیە كە سەركوت كردن و ڕاوەدوونانی خەڵك بەرهەمی ئەو كردەوە هاوبەشەیانە كە ئەو ڕۆكانە خەڵك لە خۆرهەڵاتی ناوەڕاستەوە بە بەرفراوانی ڕووی لە كۆچ كردن كردووە و دەیەوێت خۆی لە بن دەسەڵاتی دەسەڵاتدرانی خۆرهەڵاتی ناوەڕاستی ئازاد بكات و خۆی بگەیەنێتە ئەو وڵاتانەی كە هەر ڕۆژەو ڕێبەرانی سیاسی و ئایینیەكەی باس لە بێ ڕەوشتی و بێ ئەخلاقی و بێ كلتووریەكەی ئەكەن.
لە ڕاستیدا بۆ زۆرینەی خەڵكی ناوچەی خۆرهەڵاتی ناوڕاست بە هۆی بوونی تەكنۆلۆژیا و ئاڵوگۆڕی ئەنفۆرماتیك و دەسكەوتنی زانیاری درووست ئەوە ڕوون بووتەوە كە ئەوەی پووچ بێت لە ئەخلاق و كلتوور ئەوا ڕێبەرانی سیاسی و ئایینی خۆرهەڵاتی ناوەڕاستە كە هەر هەموویان لە یەك سەنگەردان دژی خەڵكەكەی خۆیان و دژی گەلانی ناوچەكە، هەر لە عەلی خامنەیی ڕێبەری كۆماری ئیسلامی و حەسەن نەسرۆڵای سەركردەی حیزبوڵای لۆبنانی و تا ئەبووبەكر بەغدادی رێبەری داعش و ئەبوومحەمەد جەولانی ڕێبەری بەرەی نوسرە و میشل عەون سەرۆكی بەرەی گۆڕان و ئیسلاحی لوبنانی و بەشار ئەسەد سەرۆكی حیزبی سوسیالیستی بەعسی سوری و ژنرال سیسی سەرۆككۆماری میسر و ئەردۆغانی سەرۆككۆماری توركیا و هەر هەموو ئەوانی تر، هاوسەنگەر و هاو ڕەوشت و ئەخلاق و هاو كلتوورن، كلتوور و ئەخلاقێك كە باوەڕی بە دەنگی جیاواز و بە ڕەنگی جیاواز و بە هزری جیاواز نییە و تەنیا سەركوت كردن و كوشتن و خنكاندن و لە وڵات دەرپەڕاندن كرداری هاوبەشیانە و هاوسەنگەرن بەرامبەر بە گەلانی ناوچەی خۆرهەڵاتی ناوەڕاست.      




بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 62
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08 09 10 11 12
ووتاری کوردی
هێژموونیی زمانی فارسی و هەوڵ بۆ سڕینەوەی زمان و شوناسی کوردی
هەنگاوی بەرەو دوا
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی