ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
چاو پێکه‌وتن و وتووێژ
عوسمان جه‌عفه‌ری بۆ گۆڤاری كلیل: ئه‌گه‌ر حیزبه‌كان به‌ پێی سه‌رده‌م نه‌ڕۆن توشی ئینشقاق ده‌بن
دیداری: دیاكۆ
3 / 11 / 2011
عوسمان جه‌عفه‌ری به‌رپرسی ڕێكخراوی یه‌كێتیی دیموكراتیكی كوردستان له‌ دیدارێكی گۆڤاری كلیلدا تیشك ده‌خاته‌ سه‌ر ئیش و كاره‌كانی خۆی و خه‌باتی بۆ ڕزگاری نیشتمانی، هه‌روه‌ك هۆكاری جیابونه‌وه‌یان له‌ پژاك ئاشكرا ده‌كات و ناوبراو پێی وایه‌، هیچ كات په‌كه‌كه‌ په‌ژاكی له‌ خۆی جیانه‌كردووه‌ته‌وه‌، په‌كه‌كه‌ خۆی به‌ گه‌وره‌ترین هێز له‌ گۆڕه‌پانی سیاسی كوردستان له‌ هه‌ر چور پارچه‌ ده‌زانێت، بۆ هه‌ر كام له‌و چوار پارچه‌ ڕێكخراوی تایبه‌تی هه‌یه‌ و هه‌مویانی له‌ ژێر سێبه‌ری خۆی و ئایدۆلۆژیای خۆی به‌ڕێوه‌ ده‌بات و له‌ گۆڕ زه‌رف و شه‌رتی تایبه‌ت هه‌ركام له‌و ڕێكخراوه‌ تایبه‌تیانه‌ هه‌ڵده‌سوڕێنێت تا ئێستاش هێچكام له‌و ڕێكخراوانه‌ ئیدێعای وایان نه‌كردووه‌ كه‌ له‌ په‌كه‌كه‌ جیا بونه‌ته‌وه‌.

كلیل: كورته‌یه‌ك له‌ ژیانی سیاسی خوتانمان بۆ باس بكه‌ن و هه‌روه‌ها ئه‌و هۆكارانه‌ چی بوون وایكرد ئێوه‌ ئه‌و ئایدۆلۆژیایه‌ی پێشترتان وه‌لا بنێن و بیرۆكه‌ی ڕیكخراوێكی تازه‌تر له‌ 2005 دا دابمه‌رزێنن به‌ ناوی یه‌كێتی دیموكراتی كوردستان؟
عوسمان جه‌عفه‌ری: له‌ ساڵی 1970 له‌ شاری جوانڕۆ سه‌ر به‌ ڕوژهه‌ڵاتی كوردستان له‌ دایك بووم له‌ ساڵی 1986وه‌ تێكه‌ڵاوی كاری سیاسی بووم و وه‌ك چالاكێكی سیاسی كارم كردووه‌ بكالۆریۆسم هه‌یه‌ له‌ زمان و ئه‌ده‌بیاتی عه‌ره‌بی دا و ماجیستری مێژوی شارستانیه‌ت و ئیسلامم هه‌یه‌، له‌ ساڵی 1996وه‌ له‌ به‌ر بۆشایی فیكری و سیاسی و ڕێكخستنی كوردی به‌هێز و نه‌بوونی ڕه‌وتێك كه‌ بتوانێت وه‌ڵامده‌ره‌وه‌ی خواست و ویستی نه‌ته‌وه‌یی و سیاسی كورد له‌ ڕۆژهه‌ڵاتی كوردستان بێت له‌ گه‌ڵ چه‌ند كه‌سی تر له‌ هاوڕێیانی ده‌ورانی زانكۆ له‌ هه‌وڵدا بووین بۆ دروست كردنی بزاڤێك كه‌ بتوانێت وه‌ڵامده‌ره‌وه‌ی ئه‌و قۆناغه‌ بێت به‌ڵام له‌ به‌ر نه‌بوونی ئه‌تمۆسفێڕێكی گونجاوی دیموكراتیك له‌ ئێران و هه‌روه‌ها نه‌بوونی ئیمكاناتی مادی و چه‌ند شتی تر، ڕوومان كرده‌ په‌كه‌كه‌ و چوینه‌ نێو ریزه‌كانی په‌كه‌كه‌وه‌ گه‌رچی ئه‌و پارته‌ له‌ سه‌ره‌تاوه‌ نه‌یده‌ویست ئێمه‌ وه‌ربگرێت له‌ به‌ر دوو هۆی ئه‌ساسی، یه‌كه‌م: په‌یوه‌ندی زۆر پته‌وی له‌ گه‌ڵ ئێران هه‌بوو و نه‌یده‌ویست به‌ هۆی ئێمه‌وه‌ ئه‌و په‌یوه‌ندییه‌ی تێكبچێت ، دووهه‌م : په‌كه‌كه‌ به‌ سراحه‌ت و ڕاشكاوانه‌ ده‌یگوت ئێمه‌ هیچ پرۆژه‌ و پلانێكمان بۆ ڕۆژهه‌ڵاتی كوردستان نیه‌ و تا باكوری كوردستان ئازاد نه‌بێت هیچ هه‌نگاوێك بۆ جێگای تر ناهاوێژین ده‌بێ پارچه‌كانی تر له‌ ئێستادا له‌ خزمه‌تی شۆڕشی باكوردا بن به‌ هه‌موو ئیمكاناتی مادی و مه‌عنه‌وی خۆیانه‌وه‌.
هیچ كات په‌كه‌كه‌ په‌ژاكی له‌ خۆی جیا نه‌كردووه‌ته‌وه‌ ، په‌كه‌كه‌ خۆی به‌ گه‌وره‌ترین هێز له‌ گۆڕه‌پانی سیاسی كوردستان له‌ هه‌ر چوار پارچه‌ ده‌زانێت بۆ هه‌ر كام له‌و  چوار پارچه‌ ڕێكخراوی تایبه‌تی هه‌یه‌ و هه‌موویانی له‌ ژێر سێبه‌ری خۆی و ئایدۆلۆژیای خۆی به‌ ڕێووه‌ ده‌بات 

سه‌ره‌ڕای ئه‌و هۆیانه‌ و پێداگری ئه‌وان له‌ سه‌ر قه‌بووڵ نه‌كردنی داخوازییه‌كانی ئێمه‌ به‌ڵام دیسان ئێمه‌ هه‌ر ئه‌و پارته‌مان به‌ باش ده‌زانی كه‌ بچینه‌ ناو ڕیزه‌كانیانه‌وه‌ و له‌ ناو ئه‌واندا فێری كاری سیاسی و سیاست كردن و ڕێكخستن بین. ئه‌م ڕه‌وشه‌ به‌رده‌وام بوو تا كۆتایی ساڵی 1998 و سه‌ره‌تای 1999 كه‌ هاوكات بوو له‌ گه‌ڵ ده‌رچوونی به‌ڕێز ئاپۆ له‌ سوریا و ده‌ستگیر كردنی له‌ وڵاتی كینیا و ڕاده‌ستكردنه‌ووه‌ی به‌ توركیا. ئه‌و كات ئه‌تمۆسفێڕێكی ئیحساسی كه‌ دروست ببوو شه‌پۆلێكی زۆری گه‌نجی ڕۆژهه‌ڵاتی كوردستان به‌ بێ گوێدان به‌ هه‌ر چه‌شنه‌ به‌ربه‌ستێك ڕویان له‌ شاخه‌كانی قه‌ندیل و خنێره‌ و خواكورك و قه‌ره‌داخ كرد بۆ په‌یوه‌ست بوون به‌ په‌كه‌كه‌وه‌.
سه‌ركردایه‌تی په‌كه‌كه‌ش له‌ كاتی كۆنگره‌ی شه‌ش له‌ ساڵی 1999 وكۆنگره‌ی ئاوارته‌ی 1/1/2000 وه‌ تایبه‌ت فه‌رهاد ئوجه‌لان گرنگی تایبه‌تی ده‌دا به‌ ئه‌و په‌یوه‌ست بوونه‌ و به‌ ئه‌و په‌ڕی هێز و توانای خۆیه‌وه‌ هاوكاری ئه‌و گروپه‌ سه‌ره‌تاییه‌ی كرد كه‌ یه‌كه‌م جار پیوه‌ست بوون به‌ په‌كه‌كه‌ وه‌ و قه‌رارگای قه‌ره‌داخ تایبه‌ت به‌ كار و چالاكی ڕۆژهه‌ڵاتی كوردستان دامه‌رزا. به‌ڵام كار و چالاكی ئه‌و قه‌رارگایه‌ش ته‌نیا له‌ چوارچێوه‌ی وه‌رگرتنی هه‌رچی زۆرتری هێزی ئینسانی و مادی بوو بۆ په‌كه‌كه‌.ماوه‌ی ساڵ و نیوێك یانی تا مانگی 8/2001 وه‌كوو یه‌كێك له‌ ئه‌ندامانی به‌ڕێوه‌به‌ری ئه‌و خه‌باته‌ درێژه‌م به‌ كار و چالاكی خۆم دا دواتر له‌ كۆنفرانسی 7ی په‌كه‌كه‌ له‌ مانگی 9/2001 بۆ كاری رێكخستنی ڕۆشنبیران و خوێندكارانی ڕۆژئاوای كوردستان(سوریا) به‌ ڕێ كرام و تا كۆتایی ساڵی  2003 له‌ شاره‌كانی حه‌له‌ب و دیمشق و كوبانی و عێفرین بووم دوواتر له‌ سه‌ر داوای فه‌رهاد ئوجه‌لان بانگ كرامه‌وه‌ بۆ قه‌ندیل بۆ ساز كردنی ڕێكخراوێك تایبه‌ت به‌ ڕۆژهه‌ڵاتی كوردستان و ئه‌وه‌ بوو كه‌ له‌ ده‌سپێكی ساڵی 2004 واته‌ 24/3 یه‌كه‌م كۆنگره‌ی په‌ژاك به‌ به‌شداری نێزیكه‌ی 120 كه‌س كه‌ نیوه‌یان خه‌لكی ڕۆژهه‌ڵاتی كوردستان بوون دامه‌رزا و منیش وه‌ك ئه‌ندامی سه‌ركردایه‌تی هه‌ڵبژێردرام و وه‌ك به‌رپرسی په‌یوه‌ندییه‌ گشتییه‌كانی ئه‌و ڕێكخراوه‌ ئه‌ركدار كرام بۆ نوسینگه‌ی عێراق له‌ موسڵ و به‌غدا.
به‌ڵام به‌ داخه‌وه‌ له‌ به‌ر هه‌بوونی كێشه‌و گرفتی زۆر كه‌ به‌ هیچكام له‌ هاوڕێیانمیشه‌وه‌ نه‌ده‌توانرا چاره‌سه‌ری بۆ بدۆزرێته‌وه‌ له‌وانه‌ش پرسی سه‌ربه‌خۆیی په‌ژاك  له‌ بڕیار و كار و چالاكیه‌كانی دا ، له‌ دوای دووهه‌مین كۆنفرانسی په‌ژاك له‌ مانگی 8/2004 من و چه‌ندین هاوڕێی تر كه‌ ئه‌ندامی سه‌ركردایه‌تی بووین بڕیاری جودا بوونه‌وه‌مان له‌ په‌كه‌كه‌ دا و  به‌ نهێنی قه‌ندیلمان جێهێشت و هاتینه‌ سلێمانی و لێره‌ نیشته‌جێ بووین ده‌سمان دایه‌ هه‌وڵدان بۆ سه‌ر له‌ نوێ ڕێكخستنی خۆمان  به‌ بیر و ڕامانێكی جیاواز كه‌ له‌ سه‌ره‌تای په‌یوه‌ست بوونمان به‌ په‌كه‌كه‌ وه‌ ئامانجمان بوو.
ڕێكخراوێك بێت كه‌ تاك ئیراده‌ی به‌هێزی سیاسی و دیموكراتیكی خۆی له‌ هه‌موو به‌شه‌كانی ژیانی خۆی له‌ كۆمه‌ڵگه‌دا ده‌ربخات  و نه‌بێت به‌ قۆربانی سه‌نترالیزمی تۆخی حیزبی

ئه‌ویش ڕێكخراوێك بێت كه‌ هه‌م له‌ چوارچێوه‌ و هه‌م له‌ ناوه‌ڕۆكدا مۆدێلی سه‌ده‌ی بیسته‌م نه‌بێت واته‌ مۆدێلی ئێستالینی نه‌بێت و له‌ سه‌ر بنه‌ماكانی هه‌ل و مه‌رجی سیاسی و كلتووری سه‌ده‌ی بیست و یه‌ك بێت. ڕێكخراوێك بێت هاوشانی گۆڕانكارییه‌ سیاسیه‌كانی ئه‌مڕۆی جیهان و دوور بێت له‌ فاناتیزمی نه‌ته‌وه‌یی و دینی و ئایدۆلۆژیای حیزبی. ڕێكخراوێك بێت كه‌ تاك ئیراده‌ی به‌هێزی سیاسی و دیموكراتیكی خۆی له‌ هه‌موو به‌شه‌كانی ژیانی خۆی له‌ كۆمه‌ڵگه‌دا ده‌ربخات  و نه‌بێت به‌ قۆربانی سه‌نترالیزمی تۆخی حیزبی و هه‌موو شتێكی خۆی له‌ پێناو به‌رژه‌وه‌ندی مۆقه‌ده‌ساتی فه‌رز  كراوو به‌ سه‌ریدا، له‌ ده‌ست بدات و بێجگه‌ له‌ ڕۆبۆتێكی به‌ هێزی حیزبی شتێكی تر نه‌بێت.
ڕێكخراوێك بێت كه‌ دۆستایه‌تی هه‌موو كوردێك و حیزبێكی كوردی به‌ بنه‌ما بگرێت و هاوپه‌یمان بێت له‌ گه‌ڵا ئه‌وانه‌ی دۆستایه‌تی كورد ده‌كه‌ن و به‌رژه‌وه‌ندییان له‌ گه‌ڵا به‌رژه‌وه‌ندییه‌كانی كورده‌.
ڕێكخراوێك بێت دوور بێت له‌ موتڵه‌قگرایی فیكری و ئایدۆلۆژیایی به‌ جۆرێك بتوانێت ده‌ستی ئاوه‌ڵا بێت له‌ هه‌ر چه‌شنه‌ ڕێبازێك كه‌ خزمه‌ت به‌ گه‌له‌كه‌ی و كێشه‌ی نه‌ته‌وه‌یی و دیموكراسی ئه‌كات.
ڕیكخراوێك بێت ڕه‌نگ و سیمای سه‌ده‌ی بیست و یه‌كی پێوه‌ دیار بێت واته‌ له‌ گه‌ڵا خه‌بات و تێكۆشانی بۆ به‌ ده‌ستهێنانی مافه‌ سیاسی و دیموكراتیكانه‌ی گه‌له‌كه‌مان، خه‌بات و تێكۆشان بۆ به‌رجه‌سته‌ كردنی ڕۆڵی ژنان و گه‌نجان به‌ ئه‌ساس و بنه‌ما بگرێت. به‌ هۆی ئه‌م هۆكارانه‌ و ده‌یان هۆكاری تر هه‌شت مانگ دوای جیابوونه‌وه‌مان له‌ هاوڕێیانی پێشوو له‌ به‌رواری 20/5/2005 ڕێكخراوی یه‌كێتیی دیموكراتی كوردستانمان بونیاد نا.

كلیل: ئایا په‌كه‌كه‌ هه‌ده‌فی چیییه‌ له‌وه‌ی كه‌ په‌ژاكی له‌ خۆی جیاكردۆته‌وه‌ له‌ هه‌مان كاتیشدا په‌ژاك بڕیارده‌ری خۆی نییه‌ وا ده‌ر ده‌كه‌وێت بڕیاری له‌ په‌كه‌كه‌وه‌ بۆ دێت؟
عوسمان جه‌عفه‌ری: هیچ كات په‌كه‌كه‌ په‌ژاكی له‌ خۆی جیا نه‌كردووه‌ته‌وه‌ ، په‌كه‌كه‌ خۆی به‌ گه‌وره‌ترین هێز له‌ گۆڕه‌پانی سیاسی كوردستان له‌ هه‌ر چوار پارچه‌ ده‌زانێت بۆ هه‌ر كام له‌و  چوار پارچه‌ ڕێكخراوی تایبه‌تی هه‌یه‌ و هه‌موویانی له‌ ژێر سێبه‌ری خۆی و ئایدۆلۆژیای خۆی به‌ ڕێووه‌ ده‌بات و له‌ گۆڕ زه‌رف و شه‌رتی تایبه‌ت هه‌ر كام له‌و ڕێكخراوه‌ تایبه‌تیانه‌ هه‌ڵده‌سوڕێنێت تا ئێستاش هیچ كام له‌و ڕێكخراوانه‌ ئیدێعای وایان نه‌كردووه‌ كه‌ له‌ په‌كه‌كه‌ جیا بونه‌ته‌وه‌، به‌ڵام هه‌ر یه‌ك له‌وانه‌ كاری خۆیان ده‌كه‌ن و هه‌موویان له‌ دوو ده‌زگای تایبه‌تی په‌كه‌كه‌ به‌ ناوه‌كانی (كه‌جه‌كه‌) و (كۆنگره‌ی گه‌ل) كۆ ده‌بنه‌وه‌ و فیكر و ڕێبازی په‌كه‌كه‌ له‌ هه‌موو هه‌ڵسو كه‌وتێك به‌ ئه‌ساس ده‌گرن.

كلیل: ڕاتان چییه‌ له‌ سه‌ر ئینشقاق له‌ ناو حیزبه‌ كوردییه‌كاندا به‌ گشتی له‌ كوردستان؟
عوسمان جه‌عفه‌ری: وه‌ك ده‌زانین هه‌موو حیزب و ڕێكخراوه‌كانی كوردستان پاشماوه‌ی دوای شه‌ڕی دووهه‌می جیهانین و له‌ ده‌ورانی شه‌ڕی سارددا بنیات نراون و نیو سه‌ده‌یان زیادتر تێپه‌ڕاندووه‌، ئێستاش سه‌ده‌یه‌كی تازه‌یه‌ و ئه‌م سه‌ده‌یه‌ ناتوانێت ئه‌و مۆدێل و شێوازه‌ی ئه‌و سه‌ده‌یه‌ی ڕابردوو قه‌بووڵ بكات ، بۆیه‌ ده‌بینین ده‌وڵه‌ته‌كانیش یه‌ك له‌ دوای یه‌ك و له‌ ساڵه‌كانی 1990وه‌ به‌م لاوه‌ تا ئێستا ده‌ڕوخێن و سیسته‌می نوێ ساز ده‌بێت بۆیه‌ له‌ ئاست حیزبه‌ كوردیه‌كانیشدا یا ئه‌بێ به‌ پێی تایبه‌تمه‌ندیه‌كانی ئه‌م سه‌ده‌ تازه‌یه‌ خۆیان بگۆڕن و تازه‌ ببنه‌وه‌ یان تووشی ئینشقاق و تێكچوون و نه‌مان ده‌بن.
هه‌روه‌ها ئه‌مه‌ شتێكی سروشتی و زانستیشه‌ و له‌ زۆر لایه‌نه‌وه‌ باشه‌ بۆ كۆمه‌ڵگه‌ی كوردی تا گه‌شه‌ بكات و خۆی له‌ دونیای پێشكه‌وتووی ئه‌مڕۆدا ببینێت به‌ فیكر و رێبازی كۆن به‌ ڕێوه‌ نه‌برێت.

كلیل: ئایا ئینشقاق وای نه‌كردووه‌ كه‌ ئه‌زموون و مێژوی سیاسی كورد بخاته‌ ژێر پرسیاره‌وه‌؟  
عوسمان جه‌عفه‌ری: به‌ ڕای من ئینشقاق، ئه‌زموون و مێژوی سیاسی كورد ناخاته‌ ژێر پرسیاره‌وه‌ ئه‌گه‌ر بێت و هیچ چاره‌یه‌ك بۆ پێشگرتن به‌و ئینشقاق و لێكدابڕانه‌ نه‌مابێت. ئه‌وه‌ی ده‌كه‌وێته‌ ژێر پرسیاره‌وه‌ ئه‌زموونی فیكره‌ كۆنه‌كان و ده‌سه‌ڵاتدارانی ئه‌و حیزبانه‌یه‌، كورد خاوه‌ن كێشه‌ و دۆزێكی مێژوییه‌ له‌ هیچ كات و ساتێكدا ڕه‌وایی ئه‌و خه‌بات و تێكۆشانیه‌ ناكه‌وێته‌ ژێر پرسیاره‌وه‌ ئه‌گه‌ر چی له‌وانه‌یه‌ بۆ كورت ماوه‌ توشی هێندێك گرفت و نه‌هامه‌تی بێت.

كلیل: پێگه‌ و حاڵی كورد له‌ ئاینده‌ی ئێراندا چۆن ده‌بینن؟
عوسمان جه‌عفه‌ری: ئێران وڵاتێكی گه‌وره‌ و فره‌ نه‌ته‌وه‌یه‌ و هه‌ر نه‌ته‌وه‌یه‌ك پانتاییه‌كی زۆری له‌ خاكی ئێرانی بۆ خۆی ته‌رخان كردووه‌ و كورد له‌ مێژوی سی ساڵی ڕابردوودا له‌ هه‌موو نه‌ته‌وه‌كانی تری ژێر ده‌سه‌ڵاتی ئێران زۆرترین خه‌بات و تێكۆشانی هه‌بووه‌ و توانیویه‌تی له‌ زۆر ڕووه‌ خۆی به‌جیهان بناسێنێت و جیهانیش ئه‌وه‌ ده‌زانێت كه‌ كێشه‌ی كورد له‌ ئێران به‌رچاوترین و زه‌قترین كێشه‌یه‌، بۆیه‌ ده‌توانم بڵێم ئه‌مه‌ ده‌گه‌ڕێته‌وه‌ بۆ سیاسیه‌كانی كوردی كوردستانی ئێران كه‌ چه‌نده‌ به‌ توانا ده‌بن له‌ داهاتوودا كه‌ پێگه‌ و جێگای تایبه‌تیان هه‌بێت له‌ نێو حكومه‌تی داهاتوودا. به‌ڵام به‌ دڵنیاییه‌وه‌ پێگه‌ی كوردی كوردستانی ئێران وه‌ك ئه‌وه‌ی له‌ كوردستانی عێراق هه‌یه‌ نابێت و نییه‌ و هۆكانیشی زۆر ڕوون و ئاشكرایه‌.

كلیل: ئایا خۆێندنه‌وه‌ت چییه‌ له‌ سه‌ر ڕۆڵ و پێگه‌ی سیاسی كوردستانی باشور له‌ عێراقدا؟
عوسمان جه‌عفه‌ری: كوردستانی عێراق ئێستا وه‌ك مه‌رجه‌عێكی نه‌ته‌وه‌یی ه‌ سیاسی و كلتووری و ئابورییه‌ بۆ هه‌موو پارچه‌كانی تر و به‌ دڵنیاییه‌وه‌ ئه‌مه‌ ده‌ستكه‌وتێكی نه‌ته‌وه‌ییه‌ بۆ هه‌موو كوردێك و ده‌بێ به‌ هه‌موو هێز و تواناییه‌كه‌وه‌ پاراستنی لێبكرێت. به‌ هه‌رچی پێشكه‌وتنی ئه‌م پارچه‌یه‌ بۆ قۆناخی سه‌روو تر هه‌موو كوردان له‌ خواست و مافه‌ مێژوییه‌كانیانه‌وه‌ نێزیكتر ده‌بنه‌وه‌ و به‌ پاشكه‌وتنیشی شتی وا ڕوو ده‌دات كه‌ قه‌ت قه‌ره‌بوو ناكرێته‌وه‌.

كلیل:  له‌ كۆتاییدا بۆچونتان چییه‌ له‌ سه‌ر شۆڕشی مه‌بده‌یی و شۆڕشی پاره‌ ؟
به‌ ڕای من ئینشقاق، ئه‌زموون و مێژوی سیاسی كورد ناخاته‌ ژێر پرسیاره‌وه‌ ئه‌گه‌ر بێت و هیچ چاره‌یه‌ك بۆ پێشگرتن به‌و ئینشقاق و لێكدابڕانه‌ نه‌مابێت. ئه‌وه‌ی ده‌كه‌وێته‌ ژێر پرسیاره‌وه‌ ئه‌زموونی فیكره‌ كۆنه‌كان و ده‌سه‌ڵاتدارانی ئه‌و حیزبانه‌یه‌

عوسمان جه‌عفه‌ری: له‌ هه‌ر سه‌رده‌مێكدا ئه‌م دوو جیهان بینیه‌ هه‌یه‌ به‌ڵام پێم وایه‌ ئه‌وه‌ی بۆ پاره‌ بكرێت ده‌سته‌وواژه‌ی شۆڕشی بۆ ناگونجێت، گه‌رچی زۆر شۆڕش له‌ پێشدا مه‌بده‌یی بوونه‌ به‌ڵام دوای سه‌ركه‌وتن له‌ مه‌بادیئی شۆڕش لایان داوه‌ و خه‌تی فیكری و ئایدۆلۆژیه‌كه‌یان به‌ لاڕێدا بردووه‌ و خۆیان و وڵات و گه‌له‌كه‌یان تووشی خراپی كردووه‌، به‌ڵام له‌ ڕۆژی ئه‌مڕۆدا ئه‌گه‌ر شۆڕشه‌كان به‌ چه‌ك و كوشتن و توند و تیژی بێت ئه‌گه‌ری ئه‌وه‌یان هه‌یه‌ دواتر ببنه‌ شۆڕشی پاره‌.

كلیل: جیاوازی به‌ره‌ی كوردستانی و به‌ره‌ی دیموكراتیك له‌ چیدایه‌؟
عوسمان جه‌عفه‌ری: به‌ره‌ی كوردستانی دیاره‌ له‌ ئه‌و ڕێكخراو و لایه‌نانه‌ پێكدێت كه‌ خاوه‌نی پێناسه‌ی كوردستانیه‌ و له‌ چوار چێوه‌ی فیكر و ڕێبازێكی نه‌ته‌وه‌یی پێكدێت بۆ ته‌حه‌دای لایه‌نه‌ غه‌یره‌ كورده‌كان. به‌ڵام به‌ره‌ی دیموكراتیك میكانیزمێكه‌ له‌ زۆر لایه‌نی جیاواز له‌ ڕووی نه‌ته‌وه‌یی و مه‌زهه‌بی و ئایدۆلۆژی و سیاسی پێكدێت، هه‌ر له‌ به‌ر ئه‌مه‌ش ئه‌جیندای هر كامیان جیاوازتره‌ له‌ ئه‌وی تریانه‌.




بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 57
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08
چاو پێکه‌وتن و وتووێژ
ئه‌گه‌ر ده‌رفه‌تێك هه‌بێت له‌ناوخۆی ئێراندا بۆ خه‌باتی سیاسی ئێمه‌ یه‌كه‌م رێكخراو ده‌بین كه‌ ده‌گه‌ڕێینه‌وه‌.
موحسین باوه‌جانی: لایه‌نانێك هه‌ن یه‌كگرتوویی پارته‌ كوردییه‌كان لایان وه‌ك جامی ژه‌هره‌ هیوادارم نۆشی گیانیان بێت
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی