ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
چاو پێکه‌وتن و وتووێژ
”ئه‌گه‌ر حیزبه‌كان به‌پێی پێویستییه‌كانی كۆمه‌ڵگه‌ خۆیان نه‌گۆڕن و پێداچوونه‌وه‌یه‌ك له‌سه‌ر جۆری خه‌باتیان نه‌كه‌ن، شتێكی سروشتی ئه‌بێ كه‌ كۆمه‌ڵگه‌ پێویستی به‌ ئه‌م شێوازی كۆن و كلاسیكه‌ی حیزبایه‌تی نه‌مێنێ“
سازدانی دیمانه‌: هاوار موده‌بێر
17 / 10 / 2010
ده‌توانم بڵێم ئۆپۆزیسیۆنی ئێرانی و له‌ویشدا كورد، له‌ شوێنێكدا ڕاوه‌ستاوه‌ كه‌ پلان و پرۆژه‌یه‌كی ئه‌وتۆی به‌ده‌سته‌وه‌ نییه‌، به‌ڕێزتان له‌م حاڵه‌ته‌دا دۆخی هه‌نووكه‌یی ئۆپۆزیسیۆنی كوردی به‌ به‌راورد ده‌گه‌ڵ ئۆپۆزیسیۆنێكی ئه‌كتیڤ و چالاك چۆن ده‌بینن؟
ئه‌م بارودۆخه‌ی كه‌وا حیزبه‌ كوردییه‌كانی خۆرهه‌ڵاتی تێدایه‌ بۆ هه‌موومان ڕوون و ئاشكرایه‌ و ئۆپۆزیسیۆنی چالاكیش پێناسه‌ی تایبه‌تیی خۆی هه‌یه‌. دیاره‌ ئۆپۆزیسیۆن هێزێكی سیاسییه‌ و له‌ پێناو گه‌یشتن به‌ ده‌سه‌ڵات له‌ نێو پارلماندا ململانێ له‌گه‌ڵ هێزی ده‌سه‌ڵاتدار ده‌كا و، ئه‌ویش كۆی چه‌ند حیزب و لایه‌نێكه‌ یا تاكه‌ حیزبێكی به‌قووه‌ته‌، بۆیه‌ ئه‌مه‌ جۆرێكی ئۆپۆزیسیۆنه‌ كه‌ له‌ نێوخۆی ده‌سه‌ڵاتدا به‌پێی یاساكانی سالار له‌ وڵاتدا خه‌بات و جه‌موجووڵ ده‌كات. جۆرێكی تری ئۆپۆزیسیۆن ئه‌و حیزب و لایه‌نانه‌ن كه‌ دژ به‌ سیستمی سیاسیی حاكم و ده‌سه‌ڵاتدار له‌ وڵاتدا، خه‌بات و تێكۆشان ده‌كه‌ن كه‌ به‌ناچار له‌ ده‌ره‌وه‌ی جوگرافیای سیاسی وڵاتی نیشته‌جێ ده‌بێت, وه‌كوو ئه‌و دۆخه‌ی كه‌ حیزبه‌كانی ئێمه‌ به‌رامبه‌ر به‌ كۆماری ئیسلامیی ئێران هه‌یانه‌. به‌ڵام له‌ڕاستیدا ئۆپۆزیسیۆنی ده‌ره‌وه‌یی چالاك، ئه‌و ئۆپۆزیسیۆنه‌ ده‌بێ كه‌ به‌رنامه‌یه‌كی یه‌كگرتووی هه‌یه‌ بۆ ئاڵترناتیڤ دانانی سیستمی سیاسی و گۆڕینی ده‌ستور و یاسای سیاسی، ئابووری، كۆمه‌ڵایه‌تی، فه‌رهه‌نگی و هه‌روه‌ها په‌روه‌رده‌ له‌ وڵاتدا كه‌ به‌چالاكبوونی خۆی ده‌سه‌ڵاتی سیاسی ده‌خاته‌ ژێر گوشارێكی نێوخۆیی و ناوچه‌یی و تا ڕاده‌یه‌كیش نێونه‌ته‌وه‌یی و، ڕه‌نگدانه‌وه‌ی چالاكییه‌كانی له‌ نێو كۆمه‌ڵگه‌ و له‌ نێو دام و ده‌زگا ڕاگه‌یاندییه‌كاندا به‌ڕوونی و به‌هێزی ده‌رده‌كه‌وێت. به‌ڵام به‌داخه‌وه‌ بارودۆخی هه‌نووكه‌یی حیزبه‌كان چ كوردییه‌كان و چ فارسه‌كان و ئه‌وانی تریش ئه‌وه‌ نییه‌ كه‌ خاوه‌ن به‌رنامه‌یه‌كی یه‌كگرتوو بن بۆ ئاڵترناتیڤكردنی سیستمی سیاسی له‌ ئَێراندا و هه‌ر كامه‌یان به‌باوه‌ڕ و فیكری سیاسی خۆی خاوه‌ن به‌رنامه‌ و پرۆگرامی تایبه‌ته‌ له‌ به‌گژداچوونی سیستمی كۆماری ئیسلامیی ئێراندا. به‌ڵام ئه‌مه‌ به‌ته‌نیا به‌س نییه‌ كه‌ پێناسه‌ی ئۆپۆزیسیۆنی پێ بكرێت، چوونكه‌ وڵاتی ئێران، وڵاتێكی گه‌وره‌ و فره‌نه‌ته‌وه‌یه‌ و بیر و هزری جیاوازی ئایدۆلۆژی و ئایینی و فه‌رهه‌نگیی تێدا جێگیره‌ و، ئه‌م فاكتۆره‌ش پێویستی به‌ پرۆژه‌ و پرۆگرامێكی سیاسیی و یه‌كگرتوو هه‌یه‌ بۆ له‌یه‌ك تێگه‌یشتن و گۆڕینی سیستمی سیاسی به‌گوێره‌ی پێویست. به‌ڵام له‌ حه‌قیقه‌تدا ئه‌م پرسیاره‌ش هه‌یه‌ كه‌ ئایا به‌گوێره‌ی پێویست كار بۆ ئه‌م مه‌به‌سته‌ كراوه‌ یا هه‌ر تێكڕای ئۆپۆزیسیۆنی ده‌ره‌وه‌یی هه‌وڵیان داوه‌ پرۆژه‌ و پرۆگرامێك بخه‌نه‌ِوو؟ دیاره‌ تا ئێستا نه‌كراوه‌، هه‌ر بۆیه‌ وه‌ڵامی من بۆ ئه‌م پرسیاره‌تان ئه‌وه‌یه‌ كه‌ تا كاتێك دۆخی حیزبه‌كانی ئێمه‌ ئاوه‌ها بێ، به‌دڵنیاییه‌وه‌ ئێمه‌ چالاك نین و ناتوانین پێناسه‌ی ئۆپۆزیسیۆنی چالاك بۆ خۆمان بكه‌ین، ئه‌گه‌رچی ئۆپۆزیسیۆنین و له‌ ده‌ره‌وه‌ی وڵات نیشته‌جێین.
ئه‌م پرسیاره‌شم هه‌ندێ گرێدراوی پرسیاری یه‌كه‌مه‌، بۆیه‌ لێتان ده‌پرسم ئایا پێتان وانییه‌ نه‌بوونی یه‌كڕیزی له‌ ناو هه‌ندێ حیزبدا وای كردووه‌ له‌ ناو ئۆپۆزیسیۆنی كوردییشدا یه‌كڕیزی ساز نه‌بێ؟
دروستبوونی یه‌كڕیزی له‌ ناو ڕیزه‌كانی ئۆپۆزیسیۆنی كوردیدا ته‌نیا ناگه‌ڕێته‌وه‌ بۆ نه‌بوونی یه‌كڕیزی له‌ ناو هه‌ندێ حیزبدا. هۆكاری جیاواز هه‌ن و منیش پێم وایه‌ فاكتۆرێكی سه‌ره‌كی بۆ دروستنه‌بوونی ئه‌م یه‌كڕیزییه‌ نه‌بوونی باوه‌ڕ به‌ هزر و بیری فره‌چه‌شنییه‌، خۆبه‌زلزانینه‌ له‌ گۆڕه‌پانی سیاسه‌تی كوردیدا كه‌ ئه‌ویش له‌ نه‌بوونی لێكۆڵینه‌وه‌یه‌كی ڕاسته‌قینه‌ی سیاسی له‌ دۆخی پێگه‌ی كۆمه‌ڵایه‌تی و بوونی ڕێكخراوه‌یی هزره‌ سیاسییه‌ جیاواز و خه‌وتووه‌كان له‌ نێو كۆمه‌ڵگه‌ی كوردستاندایه‌. ئه‌و قسه‌ی جه‌نابیشتان ڕاسته‌ كه‌ نه‌بوونی یه‌كڕیزی له‌ نێو هه‌ندێ له‌ حیزبه‌كاندا وای كردووه‌ تا یه‌كڕیزی له‌ ئۆپۆزیسیۆنی كوردییشدا دروست نه‌بێ، ئه‌ویش ده‌گه‌ڕێته‌وه‌ یه‌كه‌م بۆ هه‌مان بیرۆكه‌ی تاكه‌ حیزبی و نه‌بوونی باوه‌ڕی بنه‌ڕه‌تی به‌ دیموكراسی له‌ كۆمه‌ڵگه‌ و دامه‌زراندنی سیستمێكی سیاسی نوێ و، دووهه‌م ململانێی باڵه‌ جیاجیاكانی نێو حیزبه‌كان كه‌ نایانه‌وێ لایه‌نێكی نێوخۆیی حیزبه‌كه‌یان شه‌ره‌فی تێكۆشان و هه‌وڵ بۆ یه‌كڕیزكردنی هێزی كوردی به‌لای خۆیدا بشكێنێته‌وه‌.
 








ئێمه‌ پشتگری له‌ ده‌نگ هه‌ڵبڕین و داخوازییه‌كانی كۆمه‌ڵگه‌ی ئێران و هه‌ر جۆره‌ بزوتنه‌وه‌ و جووڵانه‌وه‌یه‌ك ئه‌كه‌ین كه‌ هه‌ره‌س به‌ بنه‌ماكانی باوه‌ڕی و یاسایی كۆماری ئیسلامیی ئێران بێنن

ئه‌وه‌ی به‌ڕێزتان له‌سه‌ری دوان په‌یوه‌ندیی بوو به‌ سیستمی حیزبی و بڕواكانیان، به‌ڵام سه‌رباری ئه‌مانه‌، كاتێ ئێمه‌ جوانتر ده‌ڕوانینه‌ هه‌لومه‌رجی زه‌ینی و كۆمه‌ڵایه‌تی و، ڕه‌چاوی چه‌ند ساڵی ڕابردووی حیزبه‌كان ده‌كه‌ین و دواتریش وێنایه‌ك له‌ كۆمه‌ڵگه‌ی كوردی له‌ خۆرهه‌ڵاتی كوردستان ده‌خه‌ینه‌ پێش چاوی خۆمان، پرسیارێكی زۆر گرینگ به‌رجسته‌ ده‌بێته‌وه‌ به‌م شێوه‌یه‌ كه‌ ئایا ئه‌م كۆمه‌ڵگه‌یه‌ پێویستی به‌م جۆره‌ حیزبایه‌تییه‌ ماوه‌؟
ئه‌وه‌ ڕاستییه‌كه‌ كه‌ هیچ كۆمه‌ڵگه‌یه‌ك به‌ بێ ڕێكخراو و سیستمی سیاسی ناتوانێت گه‌شه‌ بكات و به‌رده‌وام بێ له‌ ژیانی ئاسایی خۆی وه‌ك كۆمه‌ڵگه‌یه‌كی پێشكه‌وتوو. بوونی حیزب و ڕێكخراوی سیاسی پێویستییه‌كه‌ و كۆمه‌ڵگه‌ ناچاره‌ به‌دروستكردنی له‌ ئه‌گه‌ری نه‌بووندا، به‌ڵام به‌ پێوانه‌ی هزر و باوه‌ڕی كۆمه‌ڵایه‌تی و سیاسی و هه‌روه‌ها پێوانه‌ی ئابووری له‌گه‌ڵ فه‌رهه‌نگی كۆمه‌ڵایه‌تیی ژیانی كۆمه‌ڵگه‌دا. زیاده‌ له‌سه‌ر ئه‌وه‌ش ده‌بێ بڵێم بۆ تێگه‌یشتن له‌ هه‌ر كۆمه‌ڵگه‌یه‌ك ده‌بێ ڕاسته‌وخۆ بوونت بێ له‌وێدا, تا بتوانی به‌پێی پێویست, ستراتژی و پلانی سیاسی و ئابووری و فه‌رهه‌نگیی بۆ داڕێژیت و، به‌شێوازێكی سیستماتیك كار بۆ گه‌شه‌ی كۆمه‌ڵگه‌ بكه‌یت تا وه‌ك پێویستییه‌ك له‌ پێش چاو كۆمه‌ڵگه‌دا ده‌ركه‌ویت. ئێستا كۆمه‌ڵگه‌ی كوردی له‌ خۆرهه‌ڵاتی كوردستان به‌ به‌راورد له‌گه‌ڵ ساڵانی پێشووتر له‌ هه‌موو بوارێكه‌وه‌ پێشكه‌وتنی به‌ خۆیه‌وه‌ بینیوه‌، هه‌م له‌ ئاستی ئابووری و باری كۆمه‌ڵایه‌تییه‌وه‌ و هه‌م له‌ باری فه‌رهه‌نگییه‌وه‌. هه‌ر بۆیه‌ گه‌شه‌سه‌ندنی ئه‌م فاكتۆرانه‌ هۆكارێكی كاریگه‌رن بۆ گۆڕینی هزری سیاسی و بیری كۆمه‌ڵایه‌تی و تاكه‌كه‌سی له‌ كوردستاندا، ئه‌گه‌رچی به‌به‌راوردكردنی له‌گه‌ڵ گه‌شه‌ی جیهانی و تایبه‌مه‌ندییه‌كانی ژیانی ئه‌مڕۆیی له‌ ئاستێكی زۆر نزمتردایه‌ به‌ڵام، به‌ به‌راورد له‌گه‌ڵ ساڵانی ڕابردوودا گه‌شه‌ی زۆری بینیوه‌ و داخوازی نوێی له‌گه‌ڵ خۆیدا به‌رز كردۆته‌وه‌. ئێستا ئه‌گه‌ر سه‌رنجی بارودۆخی حیزبه‌كان به‌ سێ ده‌یه‌ نه‌بوونی تێكه‌ڵاویی راِسته‌وخۆ له‌گه‌ڵ كۆمه‌ڵگه‌دا بده‌ین, دیاره‌ كه‌ هه‌ڵگری ئه‌و هه‌موو داخوازییه‌ نوێیانه‌ نییه‌ كه‌ ئه‌مڕۆ له‌ كۆمه‌ڵگه‌ی كوریدا سه‌ری هه‌ڵداوه‌. حیزبه‌كانمان هه‌مان حیزبه‌كانن به‌هه‌مان پێكهاته‌ی فیزیكی و كه‌سایه‌تییه‌وه‌ كه‌ له‌ سێ ده‌یه‌ی ڕابردوودا بوون و، توانای نوێبوونه‌وه‌یان نه‌بووه‌ ئه‌گه‌رچی هه‌ندێ گۆڕانكاریشیان له‌ دروشم و به‌رنامه‌ی ڕووتینیاندا كردووه‌. به‌ڵام ئه‌وه‌ ڕاستییه‌كی حاشاهه‌ڵنه‌گره‌ كه‌ به‌هۆی پێكهاته‌ی كلاسیكیی حیزبی و ڕه‌چاونه‌كردنی بارودۆخی گه‌شه‌ی فه‌رهه‌نگی و ڕۆشنبیریی كۆمه‌ڵگه‌وه‌, جیاوازییه‌كی ئێجگار زۆر ده‌بینین له‌ نێوان حیزبه‌كان و كۆمه‌ڵگه‌دا، بۆ ئه‌م ڕاستییه‌ش به‌ڵگه‌ دۆخی حیزبه‌كانه‌ كه‌ ئه‌و كه‌سانه‌ی ڕوو له‌ حیزبه‌كان ده‌كه‌ن له‌ چ ئاستێكدان و هه‌ڵگری چ بیر و بۆچوونێكن؟ ئه‌گه‌ر لێكۆڵینه‌وه‌یه‌ك بێ و ئه‌م دۆخه‌ هه‌ڵسه‌نگێنێ، هه‌ر به‌م ده‌ره‌نجامه‌ ده‌گات كه‌ بۆشاییه‌كی ئێجگار زۆر له‌ ناوبه‌ر به‌شی زۆری كۆمه‌ڵگه‌ی كوردی له‌ خۆرهه‌ڵاتی كوردستان و حیزبه‌كاندا هه‌یه‌. به‌ڵام ئه‌گه‌ر بێتو حیزبه‌كان به‌ پێی پێویستییه‌كانی كۆمه‌ڵگه‌ به‌رنامه‌ و كاری سیاسیی خۆیان نه‌گۆڕن
 -"-
به‌چه‌ك ناتوانین مافه‌كانمان ده‌سته‌به‌ر بكه‌ین، به‌ڵام ئه‌توانین وه‌ك خۆپاراستن له‌ ئێستا و پاراستنی ده‌سه‌ڵاتی سیاسی له‌ داهاتوودا به‌كاری بێنین
و، جۆری خه‌باتی خۆیان پێداچوونه‌وه‌ی پێدا نه‌كه‌ن و پلانی گه‌وره‌تر و به‌پیتتر دانه‌ڕێژن بۆ كاروخه‌بات، ئه‌و بۆشاییه‌ پڕ نابێته‌وه‌ و شتێكی سروشتیش ئه‌بێ كه‌ كۆمه‌ڵگه‌ پێویستی به‌ ئه‌و شێوازی كۆن و كلاسیكه‌ی حیزبایه‌تی نه‌مێنێ، به‌ڵام كۆمه‌ڵگه‌ له‌ هه‌موو كات و ساتێكدا پێویستی به‌ ڕێكخراو و حیزبی سیاسی و لێهاتوو هه‌یه‌ و، ئه‌و هێز و پوتانسیێله‌ له‌ حیزبه‌كانی ئێمه‌دا هه‌یه‌ كه‌ پێویستییه‌كانی كۆمه‌ڵگه‌ به‌ پلان و به‌رنامه‌ی حیزبییه‌وه‌ پڕ كه‌ینه‌وه‌. به‌بێ خوێندنه‌وه‌ی دۆخی كۆمه‌ڵگه‌ و سیاسه‌ته‌كانی ڕژێمی كۆماری ئیسلامی و هه‌ڵسوكه‌وت له‌ چوارچێوه‌ی فیكریی چه‌ند ده‌یه‌ی ڕابردوودا, ئێمه‌ ناتوانین ئه‌و خاڵانه‌ی كه‌ مه‌به‌ستمانه‌ و ده‌مانه‌وێ نه‌ته‌وه‌ و وڵاته‌كه‌مانی پێ ڕزگار بكه‌ین بیپێكین.
كاك محه‌مه‌د به‌ڕێزتان وا ده‌ڵێن كه‌ وه‌ستانێكی چه‌ند ساڵه‌یی له‌ ئۆپۆزیسیۆندا به‌رامبه‌ر به‌ كۆمه‌ڵگه‌ هه‌بووه‌ و ئه‌وان له‌سه‌ر هه‌مان میتۆدی كۆن به‌ڵام به‌ هه‌ندێ گۆڕانكاریی ڕه‌واڵه‌تی به‌رده‌وام بوون، دیسان به‌و حاڵه‌شه‌وه‌ من له‌ به‌ڕێزتان ده‌پرسم ئایا ئۆپۆزیسیۆنی كوردی له‌ جۆری ڕێبازی خه‌باتدا دابه‌ش ده‌كه‌نه‌ چه‌ن ده‌سته‌وه‌، كام ده‌سته‌ سه‌ركه‌وتووتر ده‌زانن، ئایا هۆكه‌ی چییه‌؟
دیاره‌ كار و خه‌باتی ئۆپۆزیسیۆن، كار و خه‌باتێكی سیاسییه‌ به‌ هه‌موو جۆره‌ بیر و هزرێكی سیاسییه‌وه‌، به‌ هه‌موو بیر و باوه‌ڕێكی ئایینی و ئایدیۆلۆژییه‌وه‌. ئۆپۆزیسیۆنی كوردی ئه‌و هه‌لومه‌رجه‌ی تێدایه‌ هه‌لومه‌رجێكی نه‌خوازراوه‌، بۆیه‌ هه‌موو كاتێك به‌ناچار خه‌باتی چه‌كداریی وه‌ك پێویستییه‌ك بۆ چه‌سپاندنی مافه‌ سیاسییه‌كان تووشی ئۆپۆزیسیۆنی كوردی كراوه‌. هه‌ڵگرتنی چه‌ك نه‌ك له‌ به‌ر دڵخوازیی نه‌ته‌وه‌ی كورد بووه‌، به‌ڵكوو ئه‌وه‌ هه‌ڵوێست و هه‌ڵسوكه‌وتی دوژمنانی كورد وای كردووه‌ كه‌ كورد هه‌موو جارێك و به‌شێوازی جۆراوجۆر په‌نا بۆ چه‌ك و شاخ ببات بۆ ده‌نگ ده‌ربڕینی خۆی و سه‌پاندنی مافه‌كانی خۆی به‌سه‌ر دوژمندا. هه‌موومان ده‌زانین دوژمنانی كورد به‌هێزتر و پڕچه‌كترن له‌ نه‌ته‌وه‌ی كوردن و هه‌ر له‌مێژه‌وه‌ ئێمه‌ی كورد چه‌وساوینه‌ته‌وه‌ و، به‌شمه‌ینه‌ت كراوین له‌ یاسا و ڕێسای سیاسی و ئابووریی وڵاتانی هه‌رێمه‌كه‌دا، له‌ حاڵێكدا كه‌ ئێمه‌ تێیدا ده‌ژین و زێدمانه‌. به‌ڵام ئه‌قڵییه‌تی سیاسی ئه‌ڵێت ئه‌وه‌ی دوژمنه‌كه‌ت مه‌به‌ستیه‌تی ئه‌نجامی بده‌یت و، به‌كرده‌وه‌ بیكه‌یت و بیری له‌سه‌ر بكه‌یه‌وه‌ مه‌یكه‌. من پێناسه‌ی جۆراوجۆر بۆ ئۆپۆزیسیۆنی كوردی ناكه‌م، ئه‌و بۆ خۆی پێناسه‌كه‌ی له‌گه‌ڵ خۆیدا هه‌ڵگرتووه‌ و له‌مێژه‌ له‌گه‌ڵ خۆی هێناویه‌تی. ئه‌ویش خه‌باتی چه‌كدارانه‌ی زۆر ڕوونتر و زه‌قتره‌ له‌ جۆری خه‌باتی سیاسییه‌كه‌ی. خه‌باته‌ چه‌كدارییه‌كه‌ی وه‌ك ئامرازێك بۆ خۆپاراستن به‌كارهێناوه‌ و قه‌ت هێرشی بۆ سه‌ر لایه‌نه‌كانی تر نه‌كردووه‌. به‌ڵام خه‌باتی سیاسیشی به‌پێی پێویست ئه‌نجام نه‌داوه‌, بۆیه‌ نه‌یتوانیوه‌ قورسایی خۆی له‌سه‌ر سه‌نگی ته‌رازووی ده‌سه‌ڵات له‌ ئێران دابنێت. لاوازیی هێزی كوردی له‌ ئێراندا نه‌بوونی قورسایی سیاسی و خه‌باتی سیاسیی پێویست بوو كه‌ توانایی نه‌بووه‌ مافه‌كانی به‌ده‌ست بێنێت. په‌یوه‌ندیی سیاسه‌توانانی كورد له‌گه‌ڵ لایه‌نه‌ سیاسییه‌ جیاوازه‌كان و نه‌ته‌وه‌كانی تری ئێران و هه‌روه‌ها له‌گه‌ڵ توێژ و ناوچه‌ جیاوازه‌كانی كوردستاندا له‌ ڕابردوودا زۆر لاوازتر له‌وه‌ بووه‌ كه‌ بتوانێ لایه‌نگر و هاوپه‌یمان بۆ خۆی ده‌سته‌به‌ر بكات. له‌ خوێندنه‌وه‌ی مێژووی كورددا، هه‌لی زۆر بووه‌ بۆ ده‌سته‌به‌ركردنی مافه‌كانی، به‌ڵام نه‌یتوانیوه‌ قورسایی سیاسی خۆی وه‌ك سیاسه‌تكردن بپارێزێت و، گه‌شه‌ی پێ بدات تا بتوانێ كاریگه‌ریی خۆی له‌سه‌ر ده‌سه‌ڵات دابنێ. حاشا نابێ بكه‌ین له‌و ڕاستییه‌ی كه‌ ئێمه‌ی كورد به‌ هه‌مووی توانایی و پڕچه‌كبوونێكه‌وه‌ ناتوانین ده‌سه‌ڵاتی سیاسی له‌ ئێراندا بگۆڕین, ئه‌ویش به‌ شێوازی كرده‌وه‌ی چه‌كدارانه‌.
دیسانه‌وه‌ش له‌ ئه‌گه‌ری هه‌ر چه‌شنه‌ ڕووداوێكی گۆڕانخوازانه‌ له‌ ده‌سه‌ڵاتی سیاسی له‌ ئێراندا ئه‌وه‌نده‌ نه‌یارمان هه‌یه‌ كه‌ به‌ سیاسه‌ت دیسان له‌ ده‌سه‌ڵاتی سیاسی و به‌ده‌سهێنانی مافه‌كانی نه‌ته‌وایه‌تیی خۆمان دوورمان بكه‌نه‌وه‌، با ئه‌و دۆخه‌ی باشووری كوردستانی تێدا دژی و له‌ ئێراقدا به‌شداری ده‌سه‌ڵاته‌, له‌ به‌رچاو بگرین كه‌ چۆن هه‌موو هه‌وڵێك ده‌درێت بۆ دووركردنه‌وه‌ی كورد له‌ ده‌سه‌ڵاتی سیاسی. ئێمه‌ی كوردیش له‌ ئێران، چ له‌ ئێستا و چ له‌ داهاتووشدا زۆر ئاڵۆزتر و قورستر له‌ باشووری كوردستان تووشی كێشه‌ و گرفتی سیاسی ده‌بینه‌وه‌ له‌گه‌ڵ لایه‌نه‌ سیاسییه‌كان و نه‌ته‌وه‌كانی تری ئێرانیدا، ئه‌ویش به‌ڕوونی له‌ خوێندنه‌وه‌ی هه‌ڵوێستی ڕێكخراوه‌ سیاسییه‌كانی ده‌ره‌وه‌ی و ناوخۆیی ئێران ده‌رده‌كه‌وێت. بۆیه‌ چاره‌سه‌ر ته‌نیا شه‌ڕی سیاسییه‌ و به‌ سیاسه‌تكردن ده‌توانین مافه‌كانمان به‌ده‌ست بێنین, نه‌ك به‌ چه‌ك و شه‌ڕ له‌ شاره‌كانی كوردستاندا كه‌ ماڵوێرانییه‌كه‌ی بۆ كورد و كوردستان ده‌گه‌ڕێته‌وه‌. سیاسه‌ت ئه‌توانێ ماڵی كورد و به‌رژه‌وه‌ندییه‌ نه‌ته‌وه‌ییه‌كان به‌ده‌ست بێنیت، هاوهه‌ڵوێستبوون ئه‌توانێ خزمه‌تی گه‌وره‌ به‌ نه‌ته‌وه‌كه‌مان بكات و سیاسه‌تكردنمان به‌قووه‌ت بكا، به‌چه‌ك ناتوانین مافه‌كانمان ده‌سته‌به‌ر بكه‌ین به‌ڵام ئه‌توانین وه‌ك خۆپاراستن له‌ ئێستا و پاراستنی ده‌سه‌ڵاتی سیاسی له‌ داهاتوودا به‌كاری بێنین.
وه‌ك ئاماژه‌تان پێدا ته‌نانه‌ت ئه‌گه‌ر ئامانجی سه‌ره‌كیی حیزبه‌كان یه‌كێك بێ، به‌ڵام دیسان ڕێگه‌ و جۆره‌كانی خه‌بات جیاوازن، تا شوێنێك ئێمه‌ ئاگادارین به‌م جیاوازییه‌شه‌وه‌ له‌م چه‌ند ساڵه‌ی ڕابردوودا چه‌ند جار هه‌وڵی دروستكردنی به‌ره‌ی كوردستان دراوه‌ به‌ڵام، پێكنه‌هاتووه‌، ئایا پێكهاته‌ی حیزبه‌كان زه‌مینه‌ی كاری هاوبه‌شی نییه‌ یا شتی تره‌؟ به‌ڕاستی هۆكه‌ی چییه‌؟ ئایا هیوای ئه‌وه‌ هه‌یه‌ دروست ببێ؟
ڕاسته‌ كه‌ چه‌ندجار هه‌وڵدراوه‌ بۆ دروستكردنی به‌ره‌ی كوردستانی، به‌ڵام به‌داخه‌وه‌ پێكنه‌هاتووه‌. هه‌ندێك هۆكار هه‌بوون بۆ دروستنه‌بوونی ئه‌و به‌ره‌یه‌ كه‌ فاكتۆری سه‌ره‌كی، خۆبه‌زلزانین و نه‌بوونی ئه‌قڵییه‌تی سیاسیی پێشكه‌وتووی یه‌كتر قه‌بووڵكردن بووه‌. زۆرجاران ده‌نگ و ڕه‌نگی جیاواز قه‌بووڵ نه‌كراوه‌، كاتی واش هه‌بووه‌ حه‌ساده‌ت و به‌خیڵی و كێشه‌ی كه‌سایه‌تییه‌ك وای كردووه‌ كه‌ به‌ره‌ دروست نه‌بێ.هۆكاری دیكه‌شی جیابوونه‌وه‌كانی نێو حیزبه‌كان بوو كه‌ ئه‌و ئینشیعاب و دابڕانانه‌ وای كرد تا حیزبه‌كان زیاتر له‌ جاران له‌ یه‌ك دوور ببنه‌وه‌ و ببنه‌ چه‌ند لایه‌نی جیاواز و چه‌ند هه‌ڵوێستی نه‌گونجاو. زۆرینه‌ی حیزبه‌كان زه‌مینه‌ی كاری هاوبه‌شیان هه‌یه‌ به‌ڵام، به‌داخه‌وه‌ ئه‌و هۆكارانه‌ تا ئێستاش ڕێگربوون له‌ دروستكردنی به‌ره‌دا. به‌ره‌ش ده‌توانێ دروست ببێ به‌ڵام به‌گۆڕینی ئه‌و ئه‌قڵییه‌ته‌ كه‌ له‌ كۆنه‌وه‌ زاڵه‌ به‌سه‌ر هه‌ندێ له‌ حیزبه‌كاندا و نایه‌وێ بیرۆكه‌ی جیاوازی سیاسی و هه‌روه‌ها حیزبی نوێ بێته‌ ناو به‌ره‌وه‌. پێم وایه‌ دروست ئه‌بێ، به‌ڵام ئه‌گه‌ر پێویستییه‌كی مێژووی و هه‌لومه‌جێكی زه‌ختاوی بێته‌ ئاراوه‌.
دیاره‌ ئه‌م پێویستیی مێژووییه‌ تا ئێستا نه‌بووه‌ تا حیزبه‌كان به‌ره‌یه‌ك پێك بێنن، ئێمه‌ گریمانه‌مان له‌سه‌ر ئه‌وه‌ داده‌نێین كه‌ ئه‌م پێویستی مێژووییه‌ دروست نه‌بێ، ئایا ئێوه‌ ئاڵترناتیڤێكتان هه‌یه‌ بۆ به‌ره‌ی كوردستانی؟
ڕاسته‌ چه‌ندجار هه‌وڵدرا بۆ دروستكردنی به‌ره‌ی كوردستانی و بێ ئاكام مایه‌وه‌، به‌ڵام وه‌كوو یه‌كێتیی دیموكراتی كوردستان بانگه‌شه‌ی دروستكردنی به‌ره‌یه‌كی نه‌ته‌وه‌ییمان كرد كه‌ بێ وه‌ڵام مایه‌وه‌. هه‌روه‌ها به‌ دروستبوونی ئینشیعابه‌كان ده‌نگۆی دروستبوونی دوو به‌ره‌ هه‌بوو له‌ نێو ئۆپۆزیسیۆنی كوردیدا، كه‌ ئه‌ویش بۆ خۆی نوقسانی و كێشه‌ی خۆی هه‌بوو. جا به‌ڕاستی ئێمه‌ به‌ له‌به‌رچاوگرتنی به‌رژه‌وه‌ندیی نه‌ته‌وایه‌تی و ڕوانگه‌یه‌كی داهاتووبینانه‌ بۆ نه‌ته‌وه‌كه‌مان, به‌ره‌ی نه‌ته‌وایه‌تیمان پێ باشتره‌ و ده‌توانێ زۆرێك له‌ لایه‌نه‌كان كۆ بكاته‌وه‌.
پێم باشه‌ ئاوڕێكی بارودۆخی ئێرانیش بده‌ینه‌وه‌ و تاوتوێی گۆڕانكارییه‌كان بكه‌ن، بۆ نموونه‌ باسی بزوتنه‌وه‌ی سه‌وز و ڕۆژه‌ڤبوونی ئه‌و له‌ ساڵی پار تا ئێستا، گه‌رم و گوڕ بووه‌ و زۆرینه‌ی حیزبه‌ ئۆپۆزیسیۆنه‌كان و ڕووناكبیرانی كورد و نه‌ته‌وه‌كانی تریش، لایه‌نگری له‌م بزوتنه‌وه‌یه‌ ده‌كه‌ن، ئه‌مه‌ش تا شوێنك ڕۆشتووه‌ هه‌ندێ حیزب و لایه‌ن له‌ ڕاده‌به‌ده‌ر خۆیان به‌و بزوتنه‌وه‌ هه‌ڵواسی و ئه‌م بزوتنه‌وه‌یه‌ش تا دێ ورده‌ورده‌ كه‌مڕه‌نگ ده‌بێته‌وه‌، به‌ڵام ئێوه‌ له‌ سه‌ره‌تاشه‌وه‌ هه‌ڵوێست و خوێندنه‌وه‌ی ڕوونتان به‌رامبه‌ر بزوتنه‌وه‌ هه‌بوو، پرسیارم لێره‌دا ئه‌وه‌یه‌ ئایا بزوتنه‌وه‌ی سه‌وز له‌ چ ناوه‌ڕۆك و چه‌مكێكدا خۆی ده‌بینێته‌وه‌؟ ئایا خوێنده‌وه‌تان به‌رامبه‌ر بزوتنه‌وه‌ی سه‌وز نه‌گۆڕاوه‌؟
ئێمه‌ خوێندنه‌وه‌مان به‌رامبه‌ر بزوتنه‌وه‌ی سه‌وز نه‌گۆڕاوه‌، به‌پێی ئه‌و خوێندوه‌ی ئێمه‌ش باسی ئه‌وه‌مان كرد كه‌ بزوتنه‌وه‌ی سه‌وز شه‌ڕی ده‌سه‌ڵاتی ناوخۆیی لایه‌نه‌ جۆراوجۆره‌كانی ڕژێمی كۆماری ئیسلامیی ئێرانه‌ و ئه‌وه‌ ئه‌وانن كه‌ شه‌ڕی به‌رژه‌وه‌ندی لایه‌نی و چینه‌كانی خۆیان ئه‌كه‌ن بۆ به‌ده‌سه‌ڵات گه‌یشتن له‌ هه‌مان چوارچێوه‌ی یاسایی كۆماری ئیسلامیی ئێراندا. ئه‌گه‌رچی له‌ دروشمدا هه‌ندێ بیرۆكه‌ی جیاواز ده‌رئه‌خه‌ن، به‌ڵام ئه‌مه‌ش ته‌نیا بۆ به‌ده‌سه‌ڵات گه‌یشتنه‌ له‌ چوارچێوه‌ی یاسای حاكمدا و چاره‌سه‌ریش بۆ كێشه‌ی كورد و نه‌ته‌وه‌كانی تر و پرسی دیموكراسی له‌ ئێران ناهێنێته‌دی.ئه‌وانه‌ی ئه‌مڕۆ له‌سه‌ر ده‌سه‌ڵاتن پاسدارانی كۆماری ئیسلامی و سه‌ركرده‌كانی شه‌ڕن كه‌ نه‌ته‌وه‌ی كوردیشیان قڕاند و كوردستانیان له‌ ژێر پۆستاڵی خۆیان نا، ئه‌وانه‌ش كه‌ سه‌ركردایه‌تیی بزوتنه‌وه‌ی سه‌وز ده‌كه‌ن تیۆریسیه‌نه‌كانی كۆماری ئیسلامی و دامه‌زرێنه‌رانی سوپا، ئایدیۆلۆژیا و پرۆگرامی ئه‌و هێزه‌ن.هه‌ر ئه‌و سه‌ركردانه‌ی بزوتنه‌وه‌ی سه‌وز بوون كه‌ تیۆری گه‌شه‌ و هه‌نارده‌كردنی شۆڕشی ئیسلامییان داڕشت و كاریان بۆ كرد.
 -"-
كاتی واش هه‌بووه‌ حه‌ساده‌ت و به‌خیڵی و كێشه‌ی كه‌سایه‌تییه‌ك وای كردووه‌ كه‌ به‌ره‌ دروست نه‌بێ

جا به‌نیسبه‌ت كێشه‌ی كورد و نه‌ته‌وه‌كانی تری ئێرانی و هه‌روه‌ها پرسی دیموكراسی له‌ ئێران, هه‌ر دوولا وه‌ك یه‌ك وان، ئه‌گه‌رچی له‌ دروشم و سیاسه‌تكردندا جیاوازییان هه‌یه‌. به‌ڵام سه‌رباری ئه‌مانه‌ ئێمه‌ پشتگری له‌ ده‌نگ هه‌ڵبڕین و داخوازییه‌كانی كۆمه‌ڵگه‌ی ئێران و هه‌ر جۆره‌ بزوتنه‌وه‌ و جووڵانه‌وه‌یه‌ك ئه‌كه‌ین كه‌ هه‌ره‌س به‌ بنه‌ماكانی باوه‌ڕی و یاسایی كۆماری ئیسلامیی ئێران بێنن. پێمان وابوو شه‌ڕی ئه‌و دوو لایه‌نه‌ هه‌ره‌س هێنان به‌ كۆماری ئیسلامیی ئێران زووتر بێنێته‌دی، له‌ هه‌مانكاتدا بڕوامان وابوو نابێ نه‌ته‌وه‌ی كورد و نه‌ته‌وه‌كانی تریش خۆیان بخه‌نه‌ ژێر سه‌یوانی بزوتنه‌وه‌ی سه‌وزه‌وه‌، چوونكه‌ بزوتنه‌وه‌ی سه‌وز و سه‌ركرده‌كانیان باسی ده‌رچوون له‌ چوارچێوه‌ی ده‌سه‌ڵاتدارێتیی یاسای كۆماری ئیسلامی ناكه‌ن و نایانه‌وێ ڕژێم بگۆڕن، به‌ڵام كورد بۆ خۆی ده‌توانێ هاوكات له‌گه‌ڵ ئه‌وه‌دا به‌شێوازێكی تر بزوتنه‌وه‌یه‌كی تر به‌ ناو و ڕه‌نگێكی تر هه‌ڵبژێرێ و له‌گه‌ڵ بزوتنه‌وه‌ی سه‌وز و ئه‌گه‌ری هه‌ر چه‌شنه‌ ڕووداوێكدا خۆی بباته‌ پێشه‌وه‌ و خه‌بات و تێكۆشانی خۆی بكات بۆ به‌ده‌ستهێنانی ئامانجه‌كانی.
من پێم وایه‌ ئه‌م بزوتنه‌وه‌یه‌ شتی باشیشی هه‌بوو، بۆ نموونه‌ به‌بڕوای زۆر كه‌س ده‌ركه‌وتنی بزوتنه‌وه‌ی سه‌وز هه‌ندێ زیاتر ڕوخساری حوكوومه‌تی سه‌ربازیی سوپای پاسدارانی بۆ بیری گشتیی ئاشكرا كرد، ته‌نانه‌ت له‌مانگی پێشوودا خاتوو هیلاری كلینتۆن باسی ئه‌وه‌ی كرد گوایه‌ حوكوومه‌تی ئێران به‌ره‌و ئه‌وه‌ ده‌ڕوات كه‌ هه‌موو پۆست و پێگه‌كان بكه‌وێته‌ ده‌ست كه‌سانی سه‌ربازی، به‌ڕێزتان قسه‌كانی خاتوو هیلاری چۆن هه‌ڵده‌سه‌نگێنن؟ بڕوای خۆتان چۆنه‌؟
خاتوو هیلاری كلینتۆن وه‌ك وه‌زیری كاروباری ده‌ره‌وه‌ی ئه‌مریكا زۆر دێرتر له‌وه‌ باسی كرد كه‌ ڕوویداوه‌. ده‌ست به‌سه‌رداگرتنی پۆسته‌ گرینگه‌كانی ده‌سه‌ڵات له‌ ئاست ده‌وڵه‌ت و پارلماندا له‌ لایه‌ن هێزی سوپای پاسدارانه‌وه‌ بۆ چه‌ند ساڵ ده‌چێ كه‌ ڕوویداوه‌، ئه‌وه‌ی كه‌ ئه‌و باسی كرد ڕاستییه‌كی ده‌سه‌ڵاتدارانی ئه‌مڕۆیی كۆماری ئیسلامیی ئێرانه‌ كه‌ سوپای پاسداران و سه‌ركرده‌كانی ئه‌م هێزه‌، زۆرێك له‌ ده‌سه‌ڵاتیان قۆرخ كردووه‌ و سه‌ركه‌وتنی ته‌واوه‌تی ئه‌وان له‌ ده‌سه‌ڵاتدا ده‌گه‌ڕێته‌وه‌ بۆ هه‌ڵبژاردنه‌كه‌ی پارلمان كه‌ سێ ساڵ و نیو پێش ئێستا ڕوویدا و، زۆرێك له‌ پاڵێوراوانی ڕیفۆرمخوازانیان له‌ فیلتره‌كانی ئه‌نجومه‌نی چاودێری ره‌د كرانه‌وه‌.ئه‌و كات محه‌مه‌دعه‌لی جه‌عفه‌ری فه‌رمانده‌ی سوپای پاسداران, باسی له‌وه‌ كرد كه‌ شۆڕشێكیان كردووه‌ له‌ ناو شۆڕشی كۆماری ئیسلامیی ئێراندا، هه‌ر ئه‌ویش بوو ئه‌و ڕاستییه‌ی ڕاگه‌یاند كه‌ سه‌ركرده‌كانی پێشووی شه‌ڕ و پاسداره‌كان ده‌سه‌ڵاتیان به‌ده‌سته‌وه‌ گرتووه‌. من پێم وایه‌ به‌چاوخشاندنێك به‌ مێژووی كۆماری ئیسلامی، هه‌ر له‌ سه‌ره‌تای ده‌سپێكردنییه‌وه‌ ئاستی ده‌سه‌ڵاتی سوپای پاسداران ده‌رئه‌كه‌وێت,چ له‌ هێرش و له‌شكركێشی بۆ سه‌ر كوردستان و چ له‌ شه‌ڕی ئێراق و ئێراندا كه‌ سوپای پاسداران و سه‌ركرده‌كانی خوازیاری ئه‌و شه‌ڕانه‌ و درێژه‌پێدانی ئه‌و شه‌ڕانه‌ بوون. به‌ڵام له‌ كاتی ده‌سه‌ڵاتدارێتیی ڕه‌فسه‌نجانی و خاته‌میدا نرابوونه‌ لاوه‌ و، ئه‌مه‌ش بۆ ئه‌وان قورس بوو بۆیه‌ له‌ ڕێگه‌ی ئابووری و ده‌ستبه‌سه‌راگرتنی پرۆژه‌ گه‌وره‌ و زه‌به‌لاحه‌كانی گه‌شه‌ی ئابووریی ئێران، ده‌ستیان كرد به‌ داگیركردنی ده‌سه‌ڵاتی سیاسی له‌ ئێران و ئێستاش به‌ ئاشكرا له‌ سه‌ر ده‌سه‌ڵاتن. ئه‌و كێشه‌ و ئاڵۆزیانه‌ش كه‌ ئه‌مڕۆ له‌ ئێران ڕوویداوه‌ و بزوتنه‌وه‌ی سه‌وزی خولقاندووه‌، هۆكاری ئه‌و شه‌ڕه‌ ده‌سه‌ڵاته‌ بووه‌ كه‌ سوپای پاسداران بۆ به‌رژه‌وه‌ندیی خۆی هه‌ڵیگیرساندووه‌ و ده‌سه‌ڵاتی مه‌لا و كوڕه‌ مه‌لاكانیان له‌ ڕژێمدا كه‌م كردۆته‌وه‌ و فه‌رمانده‌كانی سوپا ده‌ستیان به‌سه‌ریدا گرتووه‌.له‌ كابینه‌ی ئه‌م دواییه‌ی ئه‌حمه‌دی نژادیشدا زۆرینه‌ی ئه‌وانه‌ی له‌ ئاست وه‌زیر و جێگری یه‌كه‌م و بگره‌ تا سێهه‌م دامه‌زراون، هه‌مووی له‌ سوپای پاسداران بوون و ئێستا به‌ته‌واوه‌تی ده‌سه‌ڵاتی سیاسی و ئابووری و یاسایی ئێران له‌ ده‌ستی ئه‌و هێزه‌ سه‌ربازییه‌ی حوكوومه‌تدایه‌.
ڕۆژه‌ڤترین كه‌س له‌ كابینه‌ی سه‌ربازیی ئه‌حمه‌دی نژد ئیسفه‌ندیار ڕه‌حیم مه‌شایی سه‌رۆكی ده‌فته‌ری ئه‌حمه‌دی نژاد و ڕاوێژكاری ئه‌وه‌ له‌ كاروباری خۆرهه‌ڵاتی ناویندا، ئه‌ویش قسه‌ی تازه‌ و نوێی دركاندووه‌ وه‌كوو مه‌كته‌بی ئێرانی، هه‌ر ئه‌مه‌ وایكرد زۆرێك  له‌ مه‌لا خاوه‌ن ده‌سه‌ڵاته‌كانیش وه‌كوو جه‌نه‌تی ناڕه‌زایه‌تی به‌رامبه‌ر ده‌ربڕن، ئێوه‌ چۆن ئه‌و قسانه‌ی ڕه‌حیم مه‌شایی تاوتوێ ده‌كه‌ن و پێتان وایه‌ له‌ كوێوه‌ سه‌رچاوه‌ ده‌گرێت؟
ئه‌گه‌ر چاو له‌ مێژووی كۆماری ئیسلامیی ئێران بكه‌ین، به‌شی زۆری ئه‌ده‌بیاتێك كه‌ به‌كار ڕۆشتووه‌ هه‌م له‌ ڕاگه‌یاندن و هه‌م له‌ سیستمی په‌روه‌رده‌ییدا و كراوه‌ته‌ كولتووری كۆماری ئیسلامی، دژایه‌تیكردنی ده‌سه‌ڵاتی پاشایه‌تی كۆن و به‌گژداچوونی مێژووی كۆنی ئێران بووه‌ و، وه‌كوو شۆڕشیش، شۆڕشی گه‌لانی ئێران دژ به‌ رژێمی پاشایه‌تی بوو كه‌ مه‌لاكان ده‌ستیان به‌سه‌رداگرت. سی ساڵ دژایه‌تی مێژوویه‌ك كرا كه‌ زۆرێك له‌ ئێرانییه‌كان، تایبه‌ت فارسه‌كان شانازیی پێوه‌ ده‌كه‌ن و به‌ به‌ده‌سه‌ڵات گه‌یشتنی سوپای پاسداران له‌ ئێراندا، سه‌ركرده‌كانی كۆماری ئیسلامی به‌و ڕاستییه‌ گه‌یشتوون كه‌ ناسیۆنالیزمی ئێرانی له‌ ناو ئێران و فارسه‌كاندا به‌هێز بووه‌ و، لایه‌نگری له‌ باوه‌ڕی ئایینی به‌هه‌مان ڕاده‌ كه‌م بۆته‌وه‌، ئینجا هۆكاری ئه‌م گه‌شه‌سه‌ندن و كزبوونه‌وانه‌ش, شێوازی هه‌ڵسوكه‌وتی مه‌لا ده‌سه‌ڵاتداره‌كانن و خه‌ڵكێكی زۆریش له‌ كۆمه‌ڵگه‌ی ئێراندا له‌ دۆخی ئێستای ده‌سه‌ڵاتی سیاسی ناڕازییه‌ و لایه‌نگری مێژوو و كولتووری ئێرانی ڕابردوو و سه‌دان ساڵ پێشتره‌ كه‌ جێگه‌ی شانازییه‌ بۆ ئێرانییه‌كان. ئه‌مه‌ له‌ ناخی خۆیدا مه‌ترسییه‌كی ناوخۆییه‌.له‌ لایه‌كی تریشه‌وه‌ هه‌ڵسوكه‌وتی وڵاتانی ناوچه‌ تایبه‌ت توركیا و عه‌ره‌به‌كان كه‌ به‌شێوازێكی نه‌ته‌وایه‌تیی زه‌ق و به‌رچاو ده‌سه‌ڵاتدارێتی ده‌كه‌ن و مێژووی خۆیان به‌ شانازییه‌وه‌ باس ده‌كه‌ن, دوو هۆكاره‌ بۆ ئه‌وه‌ی هه‌م هێزی خوێندكاریی ناوخۆی وڵات بۆ لای خۆیان و ده‌سه‌ڵاتی سوپای پاسداران ڕابكێشن و هه‌م ئۆپۆزیسیۆنی ده‌ره‌وه‌ كه‌ به‌شێوازێكی ناسیۆنالیزمی بانگه‌شه‌ بۆ دژایه‌تیی ڕژێم ده‌كات لاوازتر بكات و هه‌روه‌هاش بۆ خۆنواندێك به‌رامبه‌ر ده‌سه‌ڵاتی مه‌لاكان به‌كاری دێنن كه‌ پێگه‌یه‌كی جه‌ماوه‌رییان له‌ ناو ئێران به‌تایبه‌ت چینی گه‌نج و خوێندكار نه‌ماوه‌.
زۆر سوپاس بۆ وه‌ڵامه‌كانتان، من شتێكم نه‌ماوه‌، ئه‌گه‌ر به‌ڕێزتان شتێكت هه‌یه‌ فه‌رموون.
منیش ده‌ستخۆشی له‌ به‌ڕێزت ده‌كه‌م. سه‌ركه‌وتوو بن.
 


بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 61
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08
چاو پێکه‌وتن و وتووێژ
ئه‌گه‌ر ده‌رفه‌تێك هه‌بێت له‌ناوخۆی ئێراندا بۆ خه‌باتی سیاسی ئێمه‌ یه‌كه‌م رێكخراو ده‌بین كه‌ ده‌گه‌ڕێینه‌وه‌.
موحسین باوه‌جانی: لایه‌نانێك هه‌ن یه‌كگرتوویی پارته‌ كوردییه‌كان لایان وه‌ك جامی ژه‌هره‌ هیوادارم نۆشی گیانیان بێت
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی