ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
چاند هۆنه‌ر
ژیــــــان له‌ پێشی ڕوودا/ چیرۆك (1)
ن: رۆمه‌ن گاری / وه‌رگێڕان له‌ فارسییه‌وه‌: هیوای نوێ
12 / 9 / 2009
یه‌كه‌مین شتێك كه‌ ده‌توانم بیڵێم ئه‌وه‌یه‌ كه‌ له‌ نهۆمی شه‌شه‌می ئاپارتمانێك ژیانمان ده‌كرد كه‌ ئاسانسۆری(سه‌رخه‌ر) نه‌بوو، ئه‌مه‌ بۆ رۆزاخانم ــ به‌و كێشه‌ی قورسه‌ی كه‌ به‌ملاوبه‌ولادا رایده‌كێشا ــ ئه‌ویش ته‌نیا به‌ دوو پێ ــ و سه‌ره‌ڕای هه‌موو ناره‌حه‌تی و ئێشه‌كانی، ده‌بوونه‌ بیانوویه‌ك بۆ قسه‌ و ده‌ردی دڵ كردنه‌كانی. هه‌ركات ئیدی بیانوویه‌كی بۆ ده‌ردی دڵ و سكاڵا نه‌ده‌دۆزیه‌وه‌ ــ ئاخۆ جوله‌كه‌ش بوو ــ ئه‌مه‌ی به‌ بیرمان ئه‌هێنایه‌وه‌. ته‌ندروستیه‌كه‌شی باش نه‌بوو. هه‌ر له‌ ئێستاوه‌ پێشتان بڵێم ژنێك بوو كه‌ شایانی ئه‌وه‌ بوو ئاسانسۆری هه‌بێت.
له‌ ته‌مه‌نی سێ ساڵی دا بووم كه‌ بۆ یه‌كه‌م جار رۆزاخانمم بینی، پێش له‌م ته‌مه‌نه‌ مرۆڤ شتێك به‌ بیری نایه‌ت و له‌ نه‌زانی ره‌ها دا ژیان ئه‌كات. له‌ سێ ساڵان دا له‌م نه‌زانی ره‌هایه‌ ــ كه‌ هه‌ندێك جاریش بیری ئه‌كه‌مه‌وه‌ ــ هاتمه‌ده‌ره‌وه‌. له‌"بێل ویل" جوله‌كه‌ و عه‌ره‌ب و ره‌ش پێستی زۆر بوون. به‌ڵام رۆزاخانم ناچاربوو هه‌ر به‌ ته‌نیایی له‌ شه‌ش نهۆم خوه‌ی سه‌ربخات. ده‌یوت ئاخره‌كه‌ی له‌سه‌ر ئه‌م قادرمه‌گه‌له‌ ده‌مرێ  و هه‌مووی مناڵه‌كان ده‌ست ده‌كه‌نه‌ گریان، چونكو هه‌میشه‌ كاتێك كه‌سێك ده‌مرێت ئه‌بێ بۆی بگریت، ئێمه‌ هه‌ندێك جار شه‌ش هه‌فت كه‌س بووین, هه‌ندێك جاریش زۆرتر ده‌بووین.
له‌ سه‌ره‌تاكانه‌وه‌ نه‌مده‌زانی كه‌ رۆزاخانم به‌ هۆی ئه‌و پاره‌یه‌ كه‌ له‌ كۆتایی هه‌رمانگ بۆی دێت من به‌خیۆ ده‌كات. كاتێك ئه‌مه‌م زانی، شه‌ش هه‌فت ساڵم ته‌مه‌ن بوو، و كاتێك زانیم كه‌ بۆ مانه‌وه‌م لای رۆزاخانم پاره‌ ده‌ده‌ن شۆكه‌ بووم. تا ئه‌و كاته‌ وام ده‌زانی كه‌ رۆزاخانم به‌ بۆنه‌ی خوه‌مه‌وه‌ خۆشمی ئه‌وێ و هه‌ر كامه‌مان بۆ یه‌كتری نرخێكی تایبه‌تیمان هه‌یه‌. شه‌وێك هه‌تا به‌یانی گریام و ئه‌مه‌ یه‌كه‌م خه‌می گه‌وره‌م بوو.
رۆزاخانم كاتێك زانی غه‌مبار بوومه‌، بۆمی گێڕایه‌وه‌ كه‌ خێزان شتێكی بێ واتایه‌، ته‌نانه‌ت كه‌سانێكیش هه‌ن كاتێك ده‌چن بۆ پیشوودان و سه‌یران, سه‌گه‌كه‌یان به‌ داریه‌كه‌وه‌ ئه‌بستنه‌وه‌ و به‌م شیۆه‌یه‌ هه‌ر ساڵ نزیكه‌ی سێ هه‌زار سه‌گ له‌ بێ سۆزی ده‌مرن, منی له‌ سه‌ر ئه‌ژنۆكانی دانا و سوێندی خوارد كه‌ خۆشه‌ویسترین كه‌سی ژیانیم. به‌ڵام هه‌ر ئه‌و كاته‌ من پاره‌كه‌ی سه‌ر مانگم كه‌وته‌وه‌ بیر و یه‌كسه‌ر گریام و رۆیشتم.
 رۆیشتم بۆ كافه‌كه‌ی ئاغای "دریس" كه‌ له‌ خواره‌وه‌ی ماڵمان بوو و رووبه‌ڕووی ئاغای "هامیل" دانیشتم، ئاغای هامیل له‌ فه‌رانسا ده‌گه‌ڕا و قاڵی ئه‌فرۆشت و سارد وگه‌رمی رۆژگاری چه‌شتیبوو. به‌ڕێز هامیل چاوگه‌لێكی میهره‌بانی هه‌یه‌ كه‌ هه‌موو شتێكی ده‌وروبه‌ری باش و جوان كردووه‌. هه‌ر له‌و كاته‌وه‌ كه‌ ناسیم پیر بوو، ئیتر له‌و كاته‌ به‌ دواوه‌ش جگه‌ له‌ پیر بوون كارێكی تری نه‌كرد.
ــ ئاغای هامیل، بۆچی هه‌میشه‌ پێ ئه‌كه‌نی ؟
ــ مۆمۆ چكۆله‌، من هه‌ر رۆژ شوكری خوا ئه‌كه‌م كه‌ بیر و هۆشێكی باشی داومه‌تێ...
ناوی من محه‌مه‌ده‌. به‌ڵام هه‌مووان بۆ ئه‌وه‌ی ته‌مه‌نم چكۆله‌ كه‌نه‌وه‌ مۆمۆ بانگ ده‌كه‌ن.
ــ... شه‌ست ساڵ به‌ر له‌ ئێستا كه‌ گه‌نج بووم، ژنێكی گه‌نج و جوانم ناسی. منی خۆشه‌ئه‌ویست و منیش خۆشم ئه‌ویست. هه‌شت مانگ تێپه‌ڕی و دوایی ماڵه‌كه‌ی گۆڕی. ئێستاش كه‌ شه‌ست ساڵ تێپه‌ڕیوه‌ هێشتاش له‌ بیریدام، پێم وت: له‌بیرت ناكه‌م. ساڵان رۆشتووه‌ و منیش له‌بیرم نه‌كردوه‌. هه‌ندێك جار ترس دایده‌گرتم چونكو هه‌نوز ژیانێكی درێژم له‌ پێشه‌وه‌ بوو، وه‌ چۆن ده‌متوانی به‌خوه‌م، به‌ خوه‌می بێچاره‌, باوه‌ڕی بده‌م، كاتێك پاكۆكه‌ره‌وه‌ به‌ده‌ست خودایه‌؟ به‌ڵام ئێستا ئارامم. ئیدی جه‌میله‌ له‌بیر ناكه‌م. كاتی زۆرم نه‌ماوه‌. پێش له‌وه‌ی له‌بیری كه‌م ده‌مرم.
كه‌وتمه‌ بیری رۆزاخانم، كه‌مێك دڕه‌دۆنگ بووم ودواتر پرسیم:
ـ ئاغای هامیل ئایا بێ ئه‌وین ده‌كرێ بژی ؟
وڵامی نه‌دایه‌وه‌. تۆزێك چای نه‌عنا كه‌ بۆ ته‌ندروستی باشه‌ ی خوارده‌وه‌. ئاغای هامیل هه‌میشه‌ عه‌بایه‌كی خۆڵه‌میشی له‌ به‌رده‌كرد تاكو ئه‌گه‌ر بۆ ئه‌و دونیاكه‌ی تر بانگهێشت كرا به‌ قات و پانتۆڵه‌وه‌ دیپرێس نه‌بێت. نواڕی پێما و بێده‌نگ بوو، له‌وانه‌یه‌ لای خوه‌ی وای بیر ده‌كرده‌وه‌ هێشتا مناڵم و ناكرێت له‌ زۆرشت بزانم وسه‌ریان له‌به‌ر ده‌ركه‌م. ده‌بوایه‌ هه‌فت یان هه‌شت ساڵم بوایه‌ت. هێشتا پێناسه‌یان بۆم نه‌گرتبوو. به‌ هه‌ر حاڵ كاتێك یه‌كتر باشتر بناسینه‌وه‌، تێده‌گه‌ن ـــ هه‌ڵبه‌ت ئه‌گه‌ر زانینه‌كه‌ی به‌هایه‌كی هه‌بێ.
ــ ئاغای هامیل، بۆچ وڵامم ناده‌نه‌وه‌؟
ــ تۆ زۆر بچكۆله‌ی و كاتێكیش مرۆڤ زور بچكۆله‌بێ ، پێویست ناكات زۆر شت بزانێت.
ــ ئاغای هامیل ئایا به‌ بێ ئه‌وین ده‌كرێ بژی؟
وتی: "به‌ڵێ" دواتر، وه‌كو ئه‌وه‌ی كه‌ شه‌رمه‌سار بێت، سه‌ری خسته‌خواره‌وه‌. ده‌ستم كرد به‌ گریان.
تا ماوه‌یه‌كی زۆر نه‌مده‌زانی عه‌ره‌بم، چون هیچكه‌س جنێوی پَیم نه‌ده‌دا. ئه‌مه‌م له‌ قوتابخانه‌ پێ زانی. به‌ڵام قه‌ت شه‌ڕ و لێدانم نه‌كرد چونكو لێدان ئیشی هه‌یه‌.
رۆزا خانم له‌ له‌هێستان، جوله‌كه‌ له‌دایك بوو. به‌ڵام به‌ساڵان له‌ مه‌راكێش وئه‌لجه‌زایر بووه‌ و جه‌وری خوه‌ی كێشاوه‌. زمانی عه‌ره‌بیی وه‌ك زمانی زكماكی قسه‌ ده‌كرد. زمانی جوله‌كه‌شی هه‌ر به‌م هۆیه‌ ده‌زانی. زۆرجار پێكه‌وه‌ به‌و زمانه‌ قسه‌مان ده‌كرد. زۆرینه‌ی كرێنشینه‌كانی بیناكه‌ ڕه‌ش پێست بوون. له‌ كۆلانی بیسۆن سێ ماڵی ره‌شه‌كان و دووی تریش هه‌یه‌ كه‌ وه‌كو عه‌شیره‌یه‌ك له‌ ناو یه‌كا ده‌ژین. راست وه‌ك بڵێ له‌ ئێستاش له‌ ئه‌فریقان. زۆرتری دانیشتوانی ئه‌م گه‌ڕه‌كه‌ ئه‌فریقاین، كه‌ هه‌ژماریان زۆره‌ و سێنێگالیه‌كان و گینه‌ییه‌كانیش ژماره‌یان كه‌م نیه‌. عه‌شیره‌ی تریش له‌ كۆڵانی بیسۆن ده‌ژین. به‌ڵام كاتم نیه‌ ناوی هه‌موویانتان پێ بڵێم. ئه‌و مرۆڤه‌كانی تری كۆڵان و بولواری بیل ویل جوله‌كه‌ و عه‌ره‌بن، هه‌روه‌ها به‌م شیۆه‌ ده‌ڕوات تا"گۆت دوور" و دوایش گه‌ره‌ِگی فه‌رانسه‌ییه‌كان ده‌ست پێ ده‌كات.
سه‌ره‌تا نه‌مه‌ه‌زانی دایكم نیه‌، ته‌نانه‌ت نه‌شمده‌زانی مرۆڤ ئه‌بێ دایكی هه‌بێت. رۆزاخانم پێ ی خۆش نه‌بوو له‌وباره‌یه‌وه‌ قسه‌ بكات چون نه‌یده‌ویست من زۆر بیر له‌و شتانه‌ بكه‌مه‌وه‌. نازانم بۆچی له‌ دایكبووم و به‌راستی چی روویداوه‌. هاورێیم "لوماهوت" كه‌ زۆر له‌ من مه‌زنتره‌ وتی: ئه‌م دۆخه‌، ده‌رئه‌نجامی هه‌له‌ومه‌رجی خراپی (ته‌ندروستی) یه‌. ئه‌و له‌ كازبای ئه‌لجه‌زایر له‌دایك ببوو و ئێستاش له‌ فه‌رانسه‌ ده‌ژیا. كاتێك له‌ دایك بووه‌ هێشتا له‌وێ باری ته‌ندروستی چاك نه‌بووه‌. چونكو نه‌ ئامرازی شوشتن هه‌بووه‌ و نه‌ ئاوی خواردنه‌وه‌ و نه‌ هیچی تریش. لوماهوت هه‌مووی ئه‌مانه‌ی دواتر زانی ــ كاتێ باوكی ویستویه‌تی پاكانه‌ی خوه‌ی بدات و سوێندی بۆ خواردبوو كه‌ هیچ كه‌س نایه‌وێ له‌ ناخی دڵه‌وه‌ خراپه‌ بكات.
لوماهوت پێمی وت ئه‌و ژنانه‌ی كه‌ خوه‌یان جه‌وری خوه‌یان ئه‌كێشن، ئێستا حه‌بێكی ته‌ندروستیان هه‌یه‌. به‌ڵام ئه‌و زووتر له‌و حه‌به‌ له‌دایك ببوو.
هه‌ندێك دایك بوون كه‌ له‌ هه‌فته‌یه‌ك یه‌ك یان دوو جار لای ئێمه‌ په‌یدایان ده‌بوو، به‌ڵام هه‌میشه‌ بۆ دیتنی مناڵانی تر ده‌هاتن. هه‌موو ئه‌و مناڵانه‌ی كه‌ لای رۆزاخانم ده‌ژیاین هه‌موو ز... بووین، و كاتێك دایكه‌كان بۆ دابینكردنی ژیانیان بۆ چه‌ند مانگ ده‌رۆیشتن بۆ شار، پێش و پاش سه‌فه‌ره‌كه‌یان سه‌ردانی مناڵه‌كانیان ده‌كرد. ئیتر به‌م شێوه‌ بوو كه‌ گله‌یی له‌ دایكم ده‌ستی پێكرد. وابزانم هه‌موو كه‌س دایكی هه‌بوو جگه‌ له‌ من. ده‌ستم كرد به‌ زك ئێشه‌ و بێ تاقه‌تی تا مه‌گه‌ر به‌و جۆره‌ دایكم راكێشی ئێره‌ بكه‌م. له‌و به‌ری ماڵمانه‌وه‌ منالێك بوو كه‌ بادباده‌كی هه‌بوو و ده‌یوت: كاتێك زكی ده‌ئێشێ دایكی سه‌ردانی ده‌كات. زكم ئێشیا به‌لام سوودی نه‌بوو، دوایی بێتاقه‌تیم كرد به‌ڵام ئه‌ویش سوودی نه‌بوو. ته‌نانه‌ت بۆ ئه‌وه‌ی سه‌رنج راكێشتر بم هه‌موو جێگه‌یه‌كی ئاپارتمانه‌كه‌م دا به‌ پیساییه‌وه‌. به‌ڵام دیسان هیچ خه‌به‌رێك نه‌بوو، دایكم نه‌هات. رۆزاخانمیش پڕجنیۆی كردم. پێمی وت: عه‌ره‌بی قون نه‌شۆر. یه‌كه‌م جاربوو كه‌ جنیۆی پێدام. به‌ڵام خۆ فه‌ره‌نسی نه‌بوو. به‌گریانه‌وه‌ پێم وت: ئه‌مه‌وێ دایكم ببینم و تا چه‌ند هه‌فته‌ بۆ تۆڵه‌سه‌ندنه‌وه‌ هه‌ر ئه‌پارتمانه‌كه‌ پیس ئه‌كرد. ئیتر رۆزاخانم پێمی وتم: ئه‌گه‌ر ئه‌و كاره‌م درێژه‌ بده‌م ئه‌وا سه‌روكارم له‌ ته‌ك په‌روه‌رشگه‌یه‌. ئه‌مه‌ی كه‌ وت زۆر ترسام، چون په‌روه‌رشگه‌ یه‌كه‌م شت بوو مناڵه‌كان پێ ی ده‌ترسان. نه‌وتراو نه‌مێنیت من هه‌ر درێژه‌م به‌ پیسكردنی ئاپارتمانه‌كه‌ ده‌دا. به‌ڵام حاڵ و رۆژێكی خۆشم نه‌بوو. له‌و كاته‌ هه‌فت مناڵی دایك ق... بوین كه‌ لای رۆزاخانم ده‌ژیاین، وه‌ هه‌ر هه‌فته‌كه‌مان تا ئه‌و جێگه‌ی ده‌مانتوانی پیسایمان ده‌كرده‌ ئاپارتمانه‌كه‌وه‌. چونكو له‌لاسایی كردندا كه‌س وه‌كو مناڵان نییه‌. ئه‌وه‌نده‌ پیساییمان كرده‌ هه‌موو شوێنێك كه‌ ئه‌وه‌ی منی تێدا ون ببوو.
رۆزاخانم ئیدی پیر و ماندوو ببوو. ئه‌گه‌ریش پیر و ماندوش نه‌بوایه‌ بێگومان هه‌ر بێزار ده‌بوو. به‌ هه‌ر حاڵ له‌به‌ر جوله‌كه‌ بوونیش تێری خوه‌ی ئێشی كێشابوو. رۆژێ چه‌ند جار به‌و به‌ كێشی نه‌وه‌د و پێ كیلۆ و دوپێ ی بێچاره‌كه‌ی له‌ قادرمه‌كان سه‌رده‌كه‌وت وكاتێكیش ده‌هاته‌ ماڵه‌وه‌ و هه‌ر بۆی پیسایی به‌ لوتی دا ده‌هات به‌هه‌مووی كۆڵ و كه‌ل و په‌له‌كانی ده‌ستیه‌وه‌ خوه‌ی به‌سه‌ر مۆبڵه‌كاندا به‌رده‌دا وده‌ستی به‌گریان ده‌كرد. ئاخۆ ده‌بێ هه‌ست به‌ ئێشه‌كه‌ی بكه‌یت. فه‌ره‌نسه‌ییه‌كان په‌نجا ملێون كه‌س بوون و ئه‌و ده‌یوت: ئه‌گه‌ر هه‌موو فه‌رنسیه‌كانیش ئه‌و كارانه‌ی ئێمه‌یان بكردبایه‌ت ئاڵمانیه‌كان زووتر بێ تاقه‌ت ده‌بوون و له‌وێ ده‌چوون و ون ده‌كرد. رۆزاخانم ئه‌ڵمانیای له‌كاتی شه‌ڕ زۆر جوان ده‌ناسی، به‌ڵام گیانی زیندوی به‌ ده‌ر كردبوو. هه‌ر كه‌ ده‌هاته‌وه‌ ماڵ و بۆی پیسایه‌كه‌ی ده‌بیست، هاواری به‌رز ده‌بووه‌وه‌ و ده‌یوت: ئاشویتس یانی ئه‌مه‌! ئاشویتس یانی ئه‌مه‌! چونكو جوله‌كه‌ بوو بردبوویان بۆ ئاشویتس. به‌ڵام هه‌میشه‌ له‌ به‌رامبه‌ر جیاوازی ره‌گه‌زی دروست بیری ده‌كرده‌وه‌، بۆ نموونه‌ له‌ نێوان ئێمه‌دا "موسا" یه‌كی بچوك هه‌بوو كه‌ رۆزاخانم وه‌كو عه‌ره‌بێكی پیس له‌گه‌ڵیا هه‌ڵسوكه‌وتی ده‌كرد. به‌ڵام له‌گه‌ڵ مندا هه‌رگیز. ئه‌و كاته‌ نه‌مده‌زانی له‌گه‌ڵ ئه‌و كێشه‌ قورسه‌شیا جوانیگه‌لێكیشی هه‌یه‌. له‌ كۆتاییدا كاتێك زانیم سوودی نیه‌ و دایكم نایه‌ت ده‌ستم هه‌ڵگرت. به‌ڵام زك ئێشه‌ و بێ تاقه‌تیم تا ماوه‌یه‌كی درێژ به‌رده‌وام بوو. ته‌نانه‌ت ئێستاش زۆر جار دڵم ده‌ئێشێ. دواتر بریارم دا به‌ شیۆه‌یه‌كی تر سرنج راكێش بم، ئه‌ویش ئه‌وه‌ بوو كه‌ ده‌ستمدا به‌ دزی كردن له‌ نێو دوكانه‌كان. ته‌ماته‌یه‌ك یان تاڵبیه‌كم هه‌ڵده‌گرت، هه‌میشه‌ش راده‌وه‌ستام تا كه‌سێك بمبینێ, كاتێك دوكانداره‌كه‌ ده‌هات زله‌یه‌كی لێم ئه‌دا و منیش هات و هاوارم به‌رز ده‌بوه‌وه‌. به‌ڵام به‌هه‌رحال كه‌سێك په‌یدا بوو و كه‌ ئاوڕم  لێ بداته‌وه‌.
جارێك هێلكه‌یه‌كم له‌ دوكانێك دزی. فرۆشیاره‌كه‌ كه‌ ژن بوو بینیمی. پێم خۆشبوو له‌و جێگانه‌ دزی به‌كه‌م كه‌ ژنی تیا بێت. چونكو ته‌نیا شتێك كه‌ پێ ی دڵنیا بووم ئه‌وه‌ بوو كه‌ دایكیشم ژنێكه‌ و ناتوانێت جۆرێكی تر بێت. هێلكه‌یه‌كم هه‌ڵگرت خستمه‌ گیرفانمه‌وه‌. فرۆشیار هات. چاوه‌ڕوان بووم زیله‌یه‌كی ئاودارم لێ بدات تا هه‌مووان سه‌نجم بده‌ن، به‌ڵام ئه‌و له‌ ئاستم كۆم بۆوه‌ وده‌ستی به‌ سه‌رما كێشا، ته‌نانه‌ت پێی وتم: تۆ چه‌نده‌ جوانكیله‌ی.
 سه‌ره‌تا وامه‌زانی ئه‌یه‌وێ به‌زمانی نه‌رم هێلكه‌كه‌م لێ بگرێته‌وه‌، به‌ توندی هێلكه‌كه‌م له‌ گیرفانم ده‌گوشی و ئاخنیمه‌ سووچی گیرفانه‌كه‌م. ده‌یتوانی به‌ زیله‌یه‌ك ته‌مێم كات هه‌ر وه‌كو ئه‌و دایكانه‌ كه‌ ئه‌یانه‌وێ به‌ مناڵه‌كانیان بڵێن كه‌ هه‌ڵه‌یان كردوه‌. به‌ڵام ئه‌و هه‌ستا رۆێشتو هێلكه‌یه‌كی تری هێنا و پێ ی دام، دواتر ماچمی كردم. له‌ پڕێكا شادی سه‌رتاپێمی داگرت، به‌شێوه‌یه‌ك كه‌ ناتوانم بیڵێمه‌وه‌ چون نابێت. تا نیوه‌ڕۆ له‌ پێش دوكانه‌كه‌  چاوه‌ڕوان وه‌ستام و نه‌مه‌ده‌زانی چاوه‌روانی چیم، هه‌ندێك جار ئه‌و خانمه‌ چاكه‌ پێكه‌نینێكی بۆم ده‌نارد و منیش هه‌ر له‌وێ هێلكه‌ به‌ ده‌ست مابوومه‌وه‌. شه‌ش ساڵ، یان  ته‌مه‌نم هه‌ر له‌و ده‌وره‌به‌ردا بوو كه‌ به‌ هێلكه‌یه‌كه‌وه‌ وام ده‌زانی هه‌موو دونیا هی منه‌. هاتمه‌وه‌ بۆ ماڵ و تا شه‌و دڵم ده‌ئێشا. رۆزاخانم بۆ شایه‌تی درۆ كه‌ لۆلاخانم داوای لێ كردبوو بیدات, رۆیشتبوو بۆ ئیداره‌ی پۆلیس.
 لۆلاخانم له‌و جله‌ نه‌شیاوانه‌ی له‌به‌ر ئه‌كرد و له‌ نهۆمی چواره‌مدا ده‌ژیا. له‌ نێو دارستانی "بۆلۆنیش" ئیشی ده‌كرد. پێش له‌وه‌ی بێت بۆ ئێره‌، له‌ سێنێگال پاڵه‌وانی بۆكس بوو. له‌ "بوا دوو بۆلۆنی"یش مشته‌كۆڵه‌یه‌كی  له‌ ته‌پڵی سه‌ری موشته‌ریه‌ك كوتابوو و دۆخێكی خراپی بۆ هاتبووه‌ پێشه‌وه‌. و لایه‌نی به‌رامبه‌ریش كه‌ نه‌خۆشی خه‌ڵك ئازار دانی هه‌بوو نه‌یزانیبوو مه‌سه‌له‌كه‌ چۆن چۆنیه‌. رۆزا خانمیش چوو بوو كه‌ شایه‌تی بدات، ئه‌و شه‌و له‌ ته‌ك لۆلاخانم رۆیشتبوون بۆ سینه‌ما و دوایش هاتبوونه‌وه‌ وسه‌یری ته‌له‌فزیۆنیان كردووه‌. دوایی زۆرتر باسی لۆلاخانمتان بۆ ده‌كه‌م. به‌راستی جیاوازی زۆری له‌گه‌ڵ كه‌سانی تربوو. هه‌ندێك جار له‌م مرۆڤانه‌ په‌یدا ده‌بوون. هه‌ر بۆیه‌ زۆر خۆشم ئه‌ویست.


بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 61
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08
چاند هۆنه‌ر
ژیــــــان له‌ پێشی ڕوودا/ چیرۆك (4)
پایان یک راه
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی