ده‌سپێک l مقالات l هه‌واڵ l به‌یاننامه‌ و ڕاگه‌یاندن l سکرتێری گشتی l چاوپێکه‌وتن و وتووێژ l چاند و هونه‌ر l به‌رنامه‌ و په‌یڕه‌و l برنامه‌ و اساسنامه
چاند هۆنه‌ر
تاوانبار كێ یه‌؟ / چیرۆك
ن: سارا
10 / 6 / 2008
ئێوارانێكی تاڵ و خه‌ماوی بوو كانی سپی له‌و رۆژه‌وه‌ كه‌ یه‌كه‌م خشت و به‌ری ژیان تێیدا له‌ سه‌ر یه‌ك دانراوه‌ هه‌تاكو ئێستا ئێواره‌یه‌كی وه‌ها ناخۆش و دڵته‌نگی به‌ خۆیه‌وه‌ نه‌بینیوه‌. ئه‌تووت زه‌وی و ئاسمان به‌ سه‌ر كانی سپیدا شین ئه‌كه‌ن. له‌ ئارای چه‌ند كات ژمێردا ئه‌و گونده‌ سه‌رسه‌وزه‌ و خنجیلانه‌ كه‌ ژیان په‌یتا په‌یتا تێیدا شه‌پۆلی ئه‌دا و دارو به‌ردو ئاو و شاخ هه‌ر كامه‌یان شاهیدێك بۆ جوانی بێ وێنه‌ی كانی سپی بوون. به‌ ئانێك ئه‌تووت ببوو به‌ هه‌واری مردوان و ره‌نگی وێرانی یه‌كه‌مین مۆری خۆی له‌ كانی سپی خست, ئه‌و  ئێواره‌ ئه‌تووت هیچكات له‌م شوێنه‌ ژیان تێنه‌په‌ڕیوه‌. هه‌وا به‌ره‌و تاریك بوون ده‌چوو، هه‌ستم ده‌كرد خۆر بۆ هه‌تا هه‌تایه‌ له‌ كانی سپی ماڵئاوایی ده‌كات و ئه‌و گونده‌ تا قه‌یامه‌ت له‌ نێو تاریكیدا به‌ جێ ئه‌هێلێ. قاترێكی بۆر له‌ نێو تاریكی دا خۆی كرده‌ نێو گونده‌كه‌ وه‌كو بڵێی شتێكی قورس له‌ سه‌ر پشتیه‌تی ، مام سالار خه‌ریك بوو ده‌رگای دوكانه‌ كه‌ی داخا و بگه‌رێته‌وه‌ بۆ ماڵ كه‌ له‌ ناكاو ته‌ماشای كرد قاترێك به‌ره‌وڕووی دێ, كه‌ چاوی به‌ قاتره‌كه‌ كه‌وت ناسییه‌وه‌, به‌ هه‌ردو ده‌ست دای به‌ سه‌ری خۆیدا و وه‌كوو شێت به‌ره‌و پیری قاتره‌كه‌ چوو هه‌ر كه‌ چاوی به‌ ته‌رمی بێگیانی سه‌عید كه‌وت ئێشێكی جه‌رگ بڕ سه‌رتاپێی داگیر كرد, بۆ چه‌ند چركه‌ زمانی ڵال بوو دوای چه‌ند چركه‌ كه‌ هۆشی هاته‌وه‌ سه‌ر خۆی له‌ ناخه‌وه‌ قیڕه‌یه‌كی كرد كه‌ هه‌موو گیانداره‌و بێ گیانێكی كانی سپی له‌رزین و ته‌كانیان خوارد، ئه‌وه‌نده‌ت زانی خه‌ڵكی گوند به‌ ژنه‌ و پیاو و منداڵه‌وه‌ وه‌ك مه‌ل و مۆر رژانه‌ به‌ر دوكانه‌كه‌ی مام سالار, منیش له‌ گه‌ڵ دایكم به‌له‌ز پلیكانه‌كه‌ی كۆڵانه‌كه‌مان دوان دوان و سیان سیان  باز ئه‌دا بۆ ئه‌وی زووتر بزانین كه‌ له‌ نێو گوند چ قۆماوه‌، نزیكی دوكانه‌كه‌ی مام سالار بویینه‌وه‌ ئیدی ده‌رزیت هه‌ڵخستایه‌ نه‌ده‌گه‌یشته‌ زه‌وی. "سه‌ردار" كوڕه‌بچكۆله‌كه‌ی مام سالار هاواری كرد "بابه‌ بابه‌"، "باجی نه‌سرین" هات، خه‌ڵكه‌كه‌ هه‌موویان ئاوڕیان له‌ پاش خۆیانه‌وه‌ دا  هه‌ر كه‌س و ته‌ماشای ئێمه‌ی ده‌كرد سه‌ری داده‌خست ، رێگه‌یان بۆ ئاوه‌ڵا كردین تا بچینه‌ پێشه‌وه‌, مام سالار هاواری ده‌كرد و ده‌گریا، ئێشێكی كوت و پڕ هه‌موو جه‌سته‌می داگرت ئێشێكی وه‌ها رووخێنه‌ر كه‌ هێز و توانای هه‌نگاونان به‌ره‌و پێش و پاشی لێ ده‌گرتم، ئه‌وه‌نده‌ ئاگام لێ بوو كه‌ دایكم چریكاندی و بورایه‌وه‌, مام سالار له‌ سه‌ر ته‌رمه‌كه‌ی باوكم دانیشتبوو سه‌ری باوكمی نابووه‌ سه‌ر ئه‌ژنۆی  ووه‌كوو بارانی  به‌هاری  فرمێسكی به‌ سه‌ر باوكمدا ئه‌باراند ، نه‌مده‌زانی خه‌و ده‌بینم یان نا، نه‌مده‌توانی له‌ شوێنی خۆم جوڵه‌ بكه‌م ، بڵێی به‌ زه‌یه‌وه‌ بزمار رێژ كراوم ، نه‌مده‌زانی فریای باوكم كه‌وم یان دایكم. باوه‌رم نه‌ده‌كرد یانی ئه‌وه‌ ته‌رمی باوكی منه‌؟! یانی من هه‌تیو كه‌وتم و دایكم بێوه‌ژن، یانی باوكم ئیدی هه‌رگیز ناگه‌ڕێته‌وه‌ بۆ ماڵ ، دوو كه‌س هاتن و ده‌ستیان گرتم و بردمیانه‌ سه‌ر ته‌رمه‌كه‌ی بابم .
ئه‌مه‌ هه‌ر ئه‌وه‌ پێشهات و نه‌هامه‌ته‌ بوو كه‌ دایكم هه‌میشه‌ لێی ده‌ترسا ، زۆری به‌ باوكم گوت مه‌كه‌ ، هه‌موو به‌یانییه‌ك كه‌ باوكم ده‌چو بۆ بژاری زه‌ویه‌كه‌ دایكم پێی ده‌گوت: سه‌عید بیكه‌ به‌ خاتری خوداو پێغه‌مبه‌ر واز له‌م زه‌ییه‌ نه‌گبه‌ته‌ بێنه‌ ئه‌م زه‌ویه‌ مین رێژ كراو بۆ ئێمه‌ نابێته‌ زه‌وی، نابێته‌ ماڵ  سه‌ری تۆش ئه‌دا به‌ با، وازی لێ بێنه‌ ئه‌م زه‌وییه‌ داهاتووی نیه‌ بۆی ئێمه‌.
 جه‌سته‌ی باوكم له‌ت و په‌ت ببوو ده‌ست و قاچێكی نه‌ما بوو، عه‌قڵ و شێتی  له‌ نێوان شه‌رێكی بێ ناوبه‌ر بوون بۆ مانه‌وه‌ یان هه‌ره‌س هێنانم . جوان خاس و و پاڵه‌وانی نێو ئاوایی بوو به‌رێز بوو، گه‌وره‌ و بچوكی ئاوایی به‌ سه‌ری سوێندیان ده‌خوارد له‌ سه‌رته‌رمه‌كه‌ی كه‌سێك نه‌بوو ئێش و كه‌سه‌ر  سه‌ر  تاپێی به‌نج نه‌كات، هه‌موو به‌ كوڵ بۆی ده‌گریان .
نیوه‌ی خه‌ڵك له‌ سه‌ر ته‌رمی باوكم بوون و نیوه‌ی تر له‌ سه‌ر جه‌سته‌ی بێ هۆشی دایكم. منیش له‌ نێوان شێتی و خۆراگری په‌له‌ قاژه‌م ده‌كرد. بۆ كورێكی 18ساڵان زۆر سه‌خت بوو باری ئه‌و كاره‌ساته‌ جه‌رگ بڕه‌ هه‌ڵگرێت، چاره‌ نه‌بوو بابم له‌ ده‌ست چوو ئه‌گه‌ر منیش له‌ سه‌ر خۆم نه‌بوایه‌م  ئه‌وا دایكیشم له‌ ده‌ست ئه‌چوو .
ئاخ ئه‌گه‌ر بمزانیایه‌ كه‌ ئه‌مه‌ سه‌رتای بێ به‌ختی و تاوانه‌ هه‌ر له‌ لای ته‌رمه‌كه‌ی باوكم خۆمم ده‌كوشت .
ئه‌و شه‌وه‌ هه‌تا به‌یانی له‌ سه‌ر ته‌رمی بێ گیانیی باوكم و جه‌سته‌ی نیوه‌گیانی دایكم چیم كێشاو چیم به‌ سه‌ر هات ته‌نها خۆم ده‌یزانم. خه‌ڵكی گوند هه‌موویان بگره‌ مناڵانیش ئه‌و شه‌وه‌ لای ئێمه‌یان بۆ یه‌ك چركه‌ش چۆڵ نه‌كرد، مام سالاریش له‌ تاوی دایك و بابم نیوه‌ گیان بوو ئه‌ونده‌ گریا و دای به‌ سه‌ر وچاوی خۆیا به‌ قورسی هه‌ناسه‌ی ده‌دا .
به‌یانی زوو چه‌ند كه‌س ته‌رمه‌كه‌ی باوكمیان برد بۆ مزگه‌وت كه‌ بیشۆرن و كفنی بۆ بدورن و بۆ هه‌تا هه‌تایه‌ سپی پۆشی كه‌ن .هه‌موو پیاوانی گوند رۆیشتن بۆ قه‌برستان كه‌ ماڵی هه‌تا هه‌تایی باوكم ، ئاماده‌ كه‌ن. دایكم هێدی هێدی هۆشی ئه‌هاته‌وه‌ سه‌ر خۆی، كه‌ گه‌یشته‌ چێشته‌نگاو به‌ ته‌واوه‌تی هۆشی هاته‌ سه‌ر خۆی و ئه‌و كاته‌ هه‌ستی كرد چی به‌ سه‌ر هاتووه‌ و چۆن ماڵ وێران بووه‌ ، دایكم وه‌كو شێت ده‌گریا و ئه‌یدا به‌ سه‌رو چاوی خۆیدا ، خوێن به‌ گۆناو روومه‌تیه‌وه‌ وه‌ك جۆگه‌له‌ كه‌وته‌ رێ ، خه‌ریك بوو دڵم له‌ ده‌مم بێته‌ ده‌ر تاقه‌ت و هێزی ئه‌و حاڵته‌ی دایكم نه‌بوو ، خه‌ریك بوو شێت بووم . خۆم خسته‌ باوه‌شی دایكمو زۆر گریام ، پێم گوت ئه‌گه‌ر ئاوه‌ها به‌ خۆت بكه‌ی ئه‌وا منیش خۆم ئه‌كوژم .
به‌ بیستنی ئه‌و قسانه‌ دایكم كه‌مێك هێور بووه‌وه‌ ،به‌ڵام ده‌مزانی كه‌ هه‌ناوی بڵێسه‌ ئه‌كێشێ .
ته‌رمه‌كه‌ی باوكمیان نه‌خسته‌ نێو ئۆتۆمبیله‌وه‌، چه‌ند كه‌س له‌ پیاوانی گوند داربه‌ستێكیان دروست كرد و ته‌رمی باوكم له‌ سه‌ر شانی خه‌ڵكی ئاوایی بۆ ماڵه‌ تازه‌كه‌ی به‌رێ كه‌وت .
باوكم وه‌كو جاران جوان و خاوێن و بێ گوناح، له‌ نێو ماڵه‌ تازه‌كه‌ی خه‌وت .
ره‌نگی ژیان رۆژ له‌ رۆژ له‌ ماڵماندا كاڵتر و كاڵتر ئه‌بوو.
سێ مانگ به‌ سه‌ر مردنی باوكم تێپه‌ری. هێدی هێدی باوه‌ڕم كردبوو كه‌ ئیدی باوكم نییه‌ و من ئه‌بێ ببم به‌ گه‌وره‌ی ماڵ و نان هێنه‌ری ماڵ .
ده‌ستم له‌ خوێندن هه‌ڵگرت و به‌ ئیشی به‌نزین فرۆشتن سه‌رقاڵ بووم، چوارونیوی به‌یانی له‌ خه‌و هه‌ڵده‌ستام و رێگه‌ی سنوورم ده‌گرته‌ به‌ر و یانزه‌ و دوانزه‌ی شه‌و ده‌گه‌ڕامه‌وه‌ ، نه‌مده‌ویست دایكم ئه‌وه‌نده‌ به‌ ته‌نیا له‌ ماڵ بێت ، چون ده‌مزانی له‌ ته‌نیایدا ئێش و خه‌فه‌ته‌كانی هه‌زار به‌رامبه‌ر ده‌بن ، به‌ڵاًم چاره‌یه‌كم نه‌بوو، بۆ ئه‌وه‌ی دایكم به‌ موحتاجی نه‌بینم و ده‌ست له‌ خه‌ڵكی درێژ نه‌كه‌ین ده‌بوایه‌ ئیشم بكردابا.
به‌یانیه‌ك له‌ خه‌و هه‌ڵسام ، سفره‌كه‌ی دایكم وه‌كوو هه‌میشه‌ ئاماده‌ بوو ، وه‌كو هه‌میشه‌ زه‌رده‌خه‌نه‌یه‌كی زۆره‌كی بۆ خۆشحاڵ كردنی من له‌ سه‌ر لێوانی نه‌خشی به‌ستبوو.( ته‌نیا دڵگه‌رمی و ئومێدم له‌م دونیا بێ به‌زه‌ییه‌دا دایكم بوو, هه‌موو كه‌س وكار و ژیانم بوو ، به‌ بۆنه‌ی دایكم ده‌ژیام و هه‌ناسه‌م ده‌كێشا)
ئاوێكم به‌ ده‌م وچاومدا كردو له‌ سه‌ر سفره‌كه‌ دانیشتم ، له‌ دایكم ڕامام هه‌ستم ده‌كرد له‌ و سێ مانگه‌دا زۆر پیر بووه‌ ، شكابوو، دایكم كه‌ یه‌كه‌م پاروی خسته‌ ده‌می تێكچوو و ره‌شایه‌وه‌( كه‌ نه‌خۆش ده‌بوو ودونیام لێ تاریك ده‌بوو) ویستم بیبه‌م بۆ دكتۆر به‌ڵام رازی نه‌بوو. دوای ئه‌و رۆژه‌ چه‌ند جاری تر دایكم تووشی ئه‌و حاڵته‌ بوو كه‌ ئیدی تاقه‌تم نه‌هێناو به‌ زۆر بردم بۆ دكتۆر، له‌وێ وتیان ئه‌بێ سینۆگرافی بدات، كه‌ وه‌ڵامی سینۆگرافیه‌كه‌م  له‌ به‌یانیه‌كه‌یدا وه‌رگرت ، خه‌ریك بوو عه‌قڵ له‌ سه‌رم ده‌رپه‌ڕێ دونیا له‌ سه‌رم به‌ یه‌ك جار خراپ بوو خوایه‌ ئه‌م هه‌موو به‌دبه‌ختیه‌ چی بوو منت بۆی دروست كرد. نه‌مده‌زانی چی بكه‌م نه‌مده‌زانی بۆ كوێ بڕۆم ، دایكم سكی پڕ بوو. من بۆ یه‌ك چركه‌یش گومانم له‌ پاك و خاوێنی دایكم نه‌كرد ، رۆیشتم بۆ لای دكتۆره‌كه‌ و به‌ ته‌واوه‌تی دڵنیا بووم كه‌ ئه‌و منداڵه‌ یان برا یان خوشكی منه‌. به‌ڵام دیسان حاڵم خراپ بوو دیسان دونیام لێ ئاخر بوو، ئاخۆ من چۆن ده‌متوانی بێ گوناهی و پاكی دایكم به‌و هه‌موو خه‌ڵكه‌ بسه‌لمێنم. باش ده‌مزانی دایكم به‌رگه‌ی ئه‌مه‌یانه‌ ناگرێ و له‌ ناو ده‌چێت .
رۆیشتمه‌وه‌ بۆ ماڵ به‌ڵام هیچم به‌ دایكم نه‌ووت و نه‌مخسته‌ رووی ، به‌ڵام دایكم باش ده‌یزانی .
رۆژ له‌ رۆژ سكی دایكم گه‌وره‌تر ده‌بوو ئه‌ونده‌ی كه‌ هه‌ر كه‌س بینیبای ده‌یزانی سكی پڕه‌ .
ئێوارانێك هات و له‌ لام دانیشت و ووتی: هێمن گیان تۆ گومانت له‌ پاكی دایكت هه‌یه‌ ؟ به‌ بیستنی ئه‌و قسه‌ له‌ زاری دایكم ئاگر به‌ هه‌ناوم كه‌وت و خۆم فرێ دایه‌ باوه‌شی ووه‌كو هه‌وری به‌هار به‌ سه‌ریدا باریم و  گووتم دایه‌ گیان تۆ پاكترین و خاوێنترین ژنی دونیای من چۆن ده‌توانم گومانم له‌و شته‌ بێت. به‌ڵام دایه‌ گیان با له‌م ئاواییه‌ برۆین  بۆ شارێكی دوور  نامه‌وێ تۆ ئازار ببینی. دایكم قه‌بووڵی نه‌كرد و به‌ ده‌نگێكی زه‌ڵاڵ كه‌ هیچ نیشانه‌یه‌ك له‌ ترس و نیگه‌رانی تێدا نه‌بوو ووتی: كوڕم هێمن گیان من كه‌ تاوانێكم نه‌كردووه‌ كه‌ وه‌ك تاوانبار سه‌ری خۆم هه‌ڵگرم و روو له‌ شوێنێكی تر بكه‌م. ئه‌م منداڵه‌ هی باوكی تۆیه‌ ،هه‌ر لێره‌ ئه‌یهێنمه‌ دونیا  هه‌ر لێره‌ گه‌وره‌ی ده‌كه‌م .هه‌ر كه‌سیش هه‌ر چی ده‌ڵێ با بڵێ من گوێ بۆ قسه‌ی هه‌ڵیت و په‌ڵیتی خه‌ڵكی راناگرم ، تكایه‌ ئه‌گه‌ر تۆش باوه‌ڕ و متمانه‌ت به‌ دایكت هه‌یه‌ خۆت له‌ به‌رامبه‌ر هه‌موو قسه‌ و قسه‌ لۆركێك كه‌ڕ كه‌, هێمن گیان رۆژه‌ سه‌خت و ناله‌باره‌كه‌مان زۆر سه‌خترو ناله‌بارتر ده‌بێت، ده‌بێ كوڕێكی ئازا و خۆراگر و به‌ ئیراده‌ بیت ، نابێت قسه‌ و به‌یت و بالۆره‌ی خه‌ڵك له‌ پێ بتخات ، ئه‌وه‌ خاڵه‌كانته‌ كه‌ به‌ هۆی ناڕازی بوونیان بۆ شووكردنم به‌ باوكت حه‌ز ناكه‌ن سه‌ر به‌ لاشه‌مه‌وه‌ بێت، ئه‌وه‌ش له‌ باوكت كه‌ قه‌ره‌چۆڵی نیه‌. ته‌نیا پاڵپشت و خه‌م ره‌وێنم تۆی، ئه‌بێ له‌مه‌و به‌دواوه‌ پاڵپشتم بی.
قسه‌كانی دایكم زۆر كاری تێكردم ، به‌و قسانه‌ هه‌ستم كرد گه‌وره‌ بووم یانی به‌ ته‌واوی بووم به‌ پیاوێك كه‌ ئه‌بێ وه‌كوو شێر هه‌ڵگری خه‌مه‌كانی دایكم بم. هه‌تا ئه‌و رۆژه‌ دایكم منی گه‌وره‌ كرد و لایه‌نگری شه‌و و رۆژم بوو، ته‌ربێتی كردم فێری كردم چۆن مرۆڤ بم و رێز بۆ نرخی مرۆڤ بوونی خۆم و ده‌وروبه‌رم دانێم.
ئه‌و بۆ به‌رهه‌م هێنانی من ته‌واوی به‌رپرسیاره‌تی و ئه‌ركی  خۆی به‌ جێ هێنا بوو، له‌و رۆژه‌وه‌ ئیدی ئه‌ركی منه‌ كه‌ دایكم له‌ به‌رامبه‌ر قسه‌ی ناشیرین و نیگای سووكی خه‌ڵك بیپارێزم .ئایا ده‌توانم ئه‌م ئه‌ركه‌ قورسه‌ به‌ جێ بهێنم ؟ نازانم .
دووگیان بوونی دایكم وه‌ك تۆپ له‌ نێو ئاوایدا ته‌قیه‌وه‌ گه‌وره‌ و بچووك ده‌یزانی، كه‌س به‌ لاماندا نه‌ده‌هات هه‌ر كه‌س سڵی لێده‌كردین، كه‌ ده‌رۆیشتم بۆ به‌نزین فرۆشتن هه‌ر له‌یه‌كه‌م ماڵه‌وه‌، ژن و پیاو و پیر و جوان به‌یت و بالۆره‌یان پێم ده‌ووتم، یه‌كێك ده‌یووت : گه‌واد، یه‌كێكی تر دیووت : بێ غیره‌ت، چۆن له‌ شه‌رما نامری، بۆ خۆت ناكوژی، ئه‌م ئاواییه‌ بێ ناموس قه‌بووڵ ناكات. سه‌رتان هه‌ڵگرن و بڕۆن ، سێ مانگ به‌ سه‌ر مردنی شووه‌كه‌یا تێنه‌په‌ڕی ئه‌وه‌نده‌ دانی به‌ خۆیا بنایه‌ت تا ساڵی مێرده‌كه‌ی ده‌چوو، ئه‌وسا حه‌ره‌امزاده‌ی بخستایه‌ته‌وه‌ .
دایكم رۆژ له‌ رۆژ لاوازتر ده‌بوو، ده‌مزانی كه‌ بۆ خۆی كه‌متر نیگه‌رانه‌ و ده‌یزانی كه‌ من چه‌ند به‌و قسه‌ و ته‌ماشا كردنانه‌ی خه‌ڵك زه‌لیل و داماوو بووم و چۆن هه‌لا هه‌لاده‌بم. ئیدی به‌ هۆی دایكم شه‌وان زوو ئه‌چومه‌وه‌ بۆ ماڵ. شه‌وێك كه‌ ئه‌گه‌ڕامه‌وه‌ بۆ ماڵ دوو سێ لاو له‌ سه‌ر كۆڵانه‌كه‌مان راوه‌ستا بوون، كه‌ من به‌ لایاندا تێپه‌ڕیم گوێم لێ بوو بێ حورمه‌تییه‌كیان به‌ دایكم كرد، ئیدی خۆم پێ رانه‌گیرا ئاگر له‌ جه‌سته‌م بڵێسه‌ی ده‌كێشا، رۆیشتمه‌وه‌ دواوه‌ و له‌ گه‌ڵیان به‌شه‌ڕدا هاتم ،  كه‌ هۆشم هاته‌وه‌ سه‌ر خۆم ته‌ماشام كرد شه‌ل و په‌ت  بووم جله‌كان هه‌موو له‌ به‌رمدا دڕا بوون، به‌ نیوه‌ گیانی خۆم ڕاده‌كێشا تا گه‌یشتمه‌ ماڵ، كلیله‌كه‌م خسته‌ نێو ده‌رگاكه‌ و ده‌رگاكه‌م كرده‌وه‌ و رۆیشتمه‌ ژوره‌وه‌ ئه‌ی خوایه‌ ئه‌مه‌م ئیدی بۆ ته‌حه‌مول ناكرێت خوایه‌ بۆ من نامرم كه‌ ئیدی شاهیدی ئه‌م هه‌موو چاره‌ڕه‌شیه‌ نه‌بم. دایكم  له‌ من شه‌ل و په‌تتر بوو هه‌موو گیانی نتڵی خوێن بوو قژ به‌ سه‌ریه‌وه‌ نه‌مابوو، خاڵه‌كانم هه‌ر پێنجیان له‌وێ بوون ئه‌وه‌نده‌یان له‌ دایكم دا بوو كه‌ وه‌كوو ته‌رمێكی بێ گیان له‌ نێو هۆَڵه‌كه‌ كه‌وتبوو ،خۆم كرد به‌ ژووردا په‌لاماری دایكم دا هه‌ستم ده‌كرد خه‌ریكم له‌ تاوی ئێش و نه‌فره‌تا ئه‌توێمه‌وه‌. خوایه‌ په‌نا بۆ كوێ به‌رم. تاقه‌تم نه‌هێناو په‌لاماری خاڵه‌ گه‌وره‌كه‌مدا و مستێكم له‌ ناو ده‌میدا و پێیانم گووت : هه‌ی بێ شه‌ره‌فینه‌ كێ ئیزنی به‌ ئێوه‌ داوه‌ بێنه‌ نێو ماڵی ئێمه‌ و وا له‌ دایكم بكه‌ن، خاڵه‌ كانی ترم هاتن و ده‌ستیان گرتم و خاڵم پێی گوتم بێ شه‌ره‌ف تۆی كه‌ دایكت له‌ پاڵی تۆدا حه‌رامی خستۆته‌وه‌وه‌. هاتووین ئه‌م سه‌ر شۆڕیه‌ یه‌ك لایی بكه‌ینه‌وه‌، دایكت حه‌یاو شه‌ره‌فی بۆ ئێمه‌ نه‌هێشتووه‌، روومان نیه‌ له‌ نێو خه‌ڵكا سه‌ر به‌رز كه‌ینه‌وه‌. هه‌ر ئێستا بۆ ئه‌وه‌ی قه‌ره‌بووی ئه‌م بێ ئابڕوییه‌ بكه‌ینه‌وه‌ یا  ئه‌بێ خۆت بیكوژی یا خۆمان ده‌یكوژین نه‌مده‌زانی چۆن پێیان بسه‌لمێنم كه‌ ئه‌م مناڵه‌ هی باوكمه‌ و دایكم وه‌كو ئاو پاك و خاوێنه‌ باش خاڵه‌كانیشم ده‌ناسی قه‌ت بروایان نه‌ به‌ من و نه‌ به‌ به‌ڵگه‌ی دكتۆره‌ كانه‌ له‌و پیاوانه‌ بوون كه‌ بۆیه‌كیان مه‌نتیق نه‌بردبوو هه‌رچی غه‌ریزه‌و هه‌سته‌كانیان فه‌رمانی پێ بدایه‌ن ئه‌وه‌یان ده‌كرد .
دایكم هیچی نه‌ده‌گووت : چاوه‌كانی بڕیبووه‌ نێو چاوانم ، ترسم تێدا نه‌ده‌دیت، به‌ڵام چاوه‌كانی ئه‌یانه‌ویست بمێنن، هێشتا ژیان له‌ چاویدا شه‌پۆلی ئه‌دا چاوه‌رێی بڕیاری من بوو. خاڵه‌ گه‌وره‌كه‌م ده‌مانچه‌یه‌كی له‌ به‌رۆكی ده‌رهێنان ووتی هانێ بێ غیره‌ت هه‌ر چی زوورتر ئه‌م په‌ڵه‌ بێ ئابڕویه‌ له‌ نێو چه‌وانمان پاك كرده‌وه‌ .
قیڕاندم به‌ سه‌ریا و گوتم نا، هه‌ر ئێستا ده‌ركه‌ون له‌م ماڵه‌ دا تا هه‌مووتانم نه‌كووشتوه‌.
خوێن په‌ریه‌ هه‌ر دوو چاوی، هات ده‌ستی گرتم ووتی هه‌ی  بێ باوكی بێ ناموس هه‌ر ئێستا ده‌یكوژیت یا خۆم وه‌كو ته‌رمی هه‌ردوكتان ده‌خه‌مه‌ ئه‌م ناوه‌.
دایكم چریكاندی و پارایه‌وه‌ تو خوا كاكه‌ واز له‌ هێمن بێنن. هێمن گیان هه‌ر چی ده‌ڵێن وا بكه‌ سوێندت ده‌ده‌م به‌گۆڕی باوكت هه‌رچی ده‌ڵێن به‌ گوێیان بكه‌ با نه‌تكوژن ئه‌مانه‌ بێبه‌زه‌یین دڵ ره‌قن ، به‌ قسه‌یان بكه‌ با هه‌ر یه‌كێكمان بمرین كوڕم تۆ ده‌توانی ژیان بكه‌ی هێشتا گه‌نجی هێشتا زۆرت ماوه‌، بمێنه‌ و به‌هه‌موان بسه‌ڵمێنه‌ كه‌ دایكت به‌ شه‌ره‌فه‌ .
نه‌مده‌زانی چی بكه‌م ؟ بێ گومان دڵنیا بووم كه‌ ئیدی شێتی سنووری عه‌قڵی به‌زاندووم. خاڵم ده‌مانچه‌كه‌ی خسته‌ باوه‌شم ده‌مانچه‌كه‌م هه‌ڵگرت گووتی زامنه‌كه‌یم كێشاوه‌ ئاماده‌ییه‌.
ده‌مانچه‌كه‌م رووبه‌ڕووی دایكم گرت ، سه‌رتا پێم ده‌له‌رزی، ئاره‌قێكی سارد له‌شمی داگیر كرد، خوێن له‌ ده‌ماره‌كانما به‌ستی و ئه‌وجار ده‌نگی ده‌ستم بۆ ماشه‌كه‌ی برد.
وای له‌ من چیم ده‌كرد من چه‌كم له‌ دایكم كێشاوه‌ ئه‌مه‌وێ ژیان  له‌و كه‌سه‌ بگرم كه‌ ژیانی پێم به‌خشی، به‌ڵام ده‌مزانی كه‌ ئیدی قه‌ت دایكم ناتوانێ ره‌حه‌ت بژی، دایكم هه‌ر له‌و رۆژه‌وه‌ كه‌ باوكم مرد ئه‌ویش مرد، ته‌نیا مردویه‌كی سه‌ر پێیان بوو .
دایكم به‌ ده‌نگێكی نه‌رم ووتی خێرا كه‌ كوڕم با ئازارت نه‌ده‌ن، ئه‌مانه‌ دڕنده‌ن ده‌تكوژن. دیسان سارد بوومه‌وه‌ وه‌كو به‌فرێك كه‌ ساڵهایه‌ له‌ سه‌ر یه‌ك نیشتووه‌ و نایه‌وێ بتوێته‌وه‌ .
(ده‌نگی ده‌مانچه‌كه‌ ناوچه‌ی هه‌ژاند)
كه‌ چاوم كرده‌وه‌ ته‌رمی دایكم بێده‌نگ بوو.
خۆم فڕێ دایه‌ باوه‌شی، هه‌ناسه‌ی نه‌ده‌كێشا له‌شی گه‌رم گه‌رم بوو وه‌كوو ئاگر،  وه‌كوو خۆڵه‌مێش, چاوه‌كانی كراوه‌ بوون وه‌كو جاران جوان و پاك و به‌رێز. هێشتا ژیانیان ده‌ویست. من دایكی خۆمم كوشت. وای كه‌ نازانم قرێژی ئه‌م تاوانه‌ چۆن له‌ گیان و رۆحمدا بشۆمه‌وه‌؟
له‌وه‌ به‌دواوه‌ خه‌ڵكی ئاوایی هه‌موو شانازیان پێوه‌ ده‌كردم. كه‌ به‌ رێدا ده‌رۆیشتم ده‌یانووت ئافه‌رین كوڕ بۆ غیره‌تت.


بۆچوونه‌کان
بۆچوون بنووسه‌

ناو:  

ئیمه‌یل:  

تێکستی کۆمێنته‌که‌ت  
ژماره 62
بڵاوکراوه‌یه‌کی سیاسی گشتییه، ئۆرگانی ڕاگه‌یاندنی یه‌کێتی دیموکراتی کوردستان ده‌ریده‌کات‌
01 02 03 04 05 06 07 08 09 10 11 12
چاند هۆنه‌ر
ژیــــــان له‌ پێشی ڕوودا/ چیرۆك (4)
پایان یک راه
مافی کۆپی کردن پارێزراوه‌ بۆ سایتی یه‌کێتی دیموکراتی کوردستان 2009 ده‌سپێک l هه‌واڵ l بۆنه‌ و ڕێوڕه‌سم l کۆمیته‌کان l خه‌باتی ئاشتیخوازانه‌ l ئه‌رشیف l ڤیدیۆ l په‌یوه‌ندی